Sjálfstæði smáþjóða og sameiginlegt forræði Evrópuþjóða

Aðildarumsókn að Evrópusambandinu er stórt skref að taka og hefur víðtækar afleiðingar bæði til skamms tíma og til framtíðar.

Skammtímaáhrif aðildarumsóknar verða þau að þjóðfélagið mun loga í illdeilum þar sem stórfelldir þjóðarhagsmunir eru í húfi. Í stjórnmálasögu lýðveldisins er aðeins eitt mál sem kemst í hálfkvisti við umræðuna um aðild landsins að Evrópusambandinu og það er herstöðvarmálið og innganga Íslands í Nato um miðbik síðustu aldar.

Það er ábyrgðarhluti að efna til innanlandsófriðar um utanríkismál og smáþjóð er það sérlega hættulegt. Það liggur í hlutarins eðli að sjálfstæði og fullveldi er smáþjóðum viðkvæmara en stórþjóðum.

Grundvallarbreytingar í utanríkismálum þjóða, hvort heldur stórra eða smárra, gerast einkum með tvennum hætti. Í fyrsta lagi með átökum, stríði eða annars konar hagsmunabaráttu, og í öðru lagi með hægfara langtímaþróun. Afstaða Íslendinga til aðildar að Evrópusambandinu verður að meta út frá seinna sjónarhorninu, hægfara langtímaþróun.

Sjálfstæðisbaráttan er samofin stjórnmálum og varðveislu íslenskrar menningar síðustu 150 árin. Markmið sjálfstæðisbaráttunnar var fullt forræði Íslendinga í eigin málum. Í áföngum tókst að ná markmiðinu og nærtækt að líta svo á að síðasti stóri áfanginn hafi verið útfærsla landhelginnar í 200 mílur á áttunda áratugnum.

Á meðan Íslendingar sóttust eftir sjálfsforræði varð til málamiðlun á meginlandi Evrópu um að framselja forræði í lykilmálum þjóðríkja til yfirþjóðlegs valds. Tvær heimsstyrjaldir, báðar með upptök í Evrópu, leiddu stórþjóðirnar Frakka og Þjóðverja að þessari niðurstöðu og nágrannaþjóðir létu til leiðast. Kola- og stálbandalagið var undanfari Evrópusambandsins en kol og stál voru ein mikilvægustu hráefni stríðsrekstrar. Með sameiginlegu forræði yfir auðlindum ætluðu meginlandsríkin að draga úr innbyrðis átökum.

Evrópusambandið er málamiðlun meginlandsþjóða álfunnar. Sambandið er einnig orðið valdamiðstöð þangað sem þjóðir leita skjóls frá voldugum nágrönnum, Írar gagnvart Bretum og Finnar frá Rússum. Þjóðir sem liggja ekki nærri átakasvæðum álfunnar eru með margvíslega fyrirvara á samstarfinu. Bretar hafa ekki tekið upp evru, Írar felldu Lissabonsáttmálann, Svíar og Danir höfnuðu gjaldmiðlasamstarfi og svo má áfram telja. Jaðarþjóðir Evrópu eru af sögulegum og landfræðilegum ástæðum tregar til málamiðlana sem kjarnaþjóðirnar hafa talið nauðsynlegar.

Ísland er bæði hvað sögu og landafræði varðar á annarri siglingu en Evrópa meginlandsins. Ef við nánast upp úr þurru myndum gerbreyta utanríkisstefnu okkar og ganga í Evrópusambandið yrðum við áttavillt. Þjóð verður áttavillt þegar hún kastar hugsunarlaust fyrir róða stefnumiðum sem hafa dugað öldum saman. Og þjóð sem veit ekki sinn veg lendir í raunum.

Þessari tillögu að þingsályktun ber að hafna.

(Ofanritaður texti er samhljóða umsögn sem var send utanríkismálanefnd Alþingis um þingskjal 38, tillögu til þingsályktunar um aðildarumsókn að Evrópusambandinu. Í dag, 15. júní, rennur út fresturinn til að senda inn umsögn, sjá slóð á utanríkismálanefnd hér).

Búðarlokusálfræði Mogga

Auglýsingasálfræðin í spurningu Morgunblaðsins er hliðstæð venju sumra verslana að setja sælgætisrekka í rétta hæð fyrir börn til að þau nauði í foreldrum að kaupa gotterí. Í öllu sínu veldi er spurning Morgunblaðsins þessi: Ertu hlynnt(ur) eða andvíg(ur) því að taka upp aðildarviðræður við ESB?

Lykilorðin eru að taka upp. Málfarslega er eðlilegra að segja hefja aðildarviðræður... o. s. frv. En sögnin að hefja vísar til ákvörðunar, maður ákveður að hefja eitthvað. Og Morgunblaðið vill ekki láta þjóðina halda að hún sé að taka ákvörðun um að hefja aðildarviðræður með því að sækja um aðild. Nei, Moggalygin er að það sé verið að taka upp aðildarviðræður, svona eins og maður tekur upp pakka til að sjá hvað er í honum.

Allir sem kunna að lesa vita að í Evrópusambandspakkanum er aðeins eitt: Evrópusambandið. Moggalygar fela ekki þá bláköldu staðreynd.

Mykjukláfur útrásarinnar

Sigurði G. Guðjónssyni hæfir að leiða endurreisn útrásarmanna og kveða í kútinn gagnrýni á auðmannaræði undanfarinna ára. Sigurður G. var handlangari Jóns Ólafssonar í Skífunni, kosningastjóri Ólafs Ragnars Grímssonar, grátkona Jóns Ásgeirs Jóhannessonar þegar hann missti bankann sinn, Glitni, í aðdraganda hrunsins. Dæmalaust glæsileg ferilsskrá.

Málflutningur Joly gagnrýndur

Moggalygi

Hugtakið Moggalygi varð til á kaldastríðsárunum og vísaði til þess að blaðið hagræddi sannleikanum í þjónkun við hugmyndafræði. Moggalygi er enn iðkuð og núna til þvæla Íslendingum inn í Evrópusambandið. Spurningin sem Morgunblaðið notar í þessari könnun er beinlínis hönnuð til að draga fjöður yfir pólitískan veruleika eins og hann blasir við öllum með réttu ráði.

Fyrir Alþingi Íslendinga liggur fyrir eftirfarandi þingsályktunartillaga: Tillaga til þingsályktunar um aðildarumsókn að Evrópusambandinu. Ályktunin er ein setning, svohljóðandi:  Alþingi ályktar að fela ríkisstjórninni að leggja inn umsókn um aðild að Evrópusambandinu og að loknum viðræðum við sambandið verði haldin þjóðaratkvæðagreiðsla um væntanlegan aðildarsamning.

Eina eðlilega spurningin sem hægt er að spyrja í þessu samhengi væri eftirfarandi: Ertu hlynnt(ur) eða andvíg(ur) að Ísland sæki um aðild að Evrópusambandinu?

En hvað gera viðundrin á ritstjórn Mogga? Jú, þeir panta þessa spurningu hjá Capacent: Ertu hlynnt(ur) eða andvíg(ur) því að taka upp aðildarviðræður við ESB?

Við stöndum ekki frammi fyrir vali um aðildarviðræður heldur hvort við ætlum að sækja um aðild eða ekki. Meira að segja málfarslega er spurningin tómur bjánagangur. Hverjir taka upp viðræður?

Íslendingar hafa um langa hríð verið í viðræðum við Evrópusambandið um hverskyns mál. Íslenskar sendinefndir hafa reglulega farið til Brussel til að kynna sér stöðu mála. Moggalygin gengur út á að flétta saman viðræðum og aðildarumsókn.

Fjölmiðill á að upplýsa og bregða ljósi á menn og málefni. Morgunblaðið spinnur lygavef. 

58 prósent fylgjandi ESB-viðræðum

Valtýr og kanselísk svarthol

Valtýr Sigurðsson getur ekki komið gögnum á milli embætta en kvartar undan því að vera í fjársvelti og vill ráða Evu Joly til að afla peninga. Þegar það er upplýst að gögnin sem hurfu í kanselíska svartholið varða hagsmuni fyrirtækja nátengdum syni Valtýs verður málið undarlegra en ella. Maður sem hefur jafn gott skopskyn og Valtýr hlýtur að geta útskýrt málið í burtu með eins og einum fimmaurabrandara.

Hvað með þennan: Ritarinn minn var í fríi.

Sendi skýringar á töf

Icesave-samning á að fella

Alþingi á fella Icesave-samninginn og jafnframt samþykkja nýtt umboð til samninganefndar um að erlendar eigur þrotabús einkabankans sem bauð Icesaveinnlán, þ.e. Landsbankans, séu til ráðstöfunar til að mæta kröfum Breta og Hollendinga - annað ekki.

Jón Helgi Egilsson hefur tekið saman helstu rökin gegn Icesave-samningnum. Áður hefur Stefán Már Stefánsson lögfræðingur og sérfræðingur í Evrópurétti sett fram rökstuddar efasemdir um að íslenska ríkið beri ábyrgð á skuldbindingum vegna Icesave.

Almennur hræðsluáróður um að við verðum að borga til að verða ekki varpað út í ystu myrkur siðaðra þjóða er ómerkilegur. Ef við hefðum tileinkað okkur það hugarfar hefðum við ekki fært út landhelgina nema með samþykki Breta og það leyfi hefði aldrei fengist.

Alþjóðapólitík kemur við sögu í Icesave-málinu og þar verður Ísland að spila með. Fórnir þarf að færa til að sannfæra eljara okkar utanlands að niðurstaðan sé fengin með þrautum. Fórn sem stjórnmálamenn í öllum ríkjum skilja er stjórnarslit. Við eigum að færa þá fórn. 

----------

Viðbót kl. 7:09 Ég les á bloggi Kristins Péturssonar að Stefán Már og Lárus Blöndal eru með grein um málið í Morgunblaðinu í dag - sem hefur ekki enn borist vestur á Nes. Kristinn birtir greinina og takk fyrir það.

Verslunin hótar uppsögnum

Í góðærinu komust verslunarfyrirtæki upp með að halda óbreyttu verði á innfluttri vöru þótt gengið hafi styrkst. Hagnaðinn notaði verslunin til að auka einkaneyslu eigenda sinna annars vegar og hins vegar í góðærisfjárfestingar, t.d. steypuhallir eins og Smáralind.

Góðærið er búið og þá er komið að timburmönnum verslunarinnar. Þeir verslunareigendur sem sýndu skynsemi og ráðdeild í góðærinu rifa seglin og eru búnir undir samdrátt. Þeir sem skrúfuðu upp einkaneysluna og létu byggja yfir sig stærra en góðu hófi gegndi eru í vandræðum.

Talsmaður verslunarinnar kom í Sjónvarpsfréttum í kvöld og hótaði uppsögnum starfsfólks ef gengið yrði ekki lagfært. Hótanir af þessu tagi hitta aðeins verslunarmenn sjálfa fyrir. Launataxtar verslunarinnar hafa ekki verið þannig skrifaðir að landsmenn hópist þangað í vinnu og þess vegna eru útlendingar fjölmennir á afgreiðslukössum. Sennilega hefði átt að hafa skýringartexta við hræðsluáróður talsmannsins - á pólsku.

Áttræð Bond-stelpa ræður íslenskum skuldurum heilt

Honor Blackman var Bond-stúlka í Goldfinger og hefur eitt um áttrætt. Hún er í viðtali við Daily Telegraph í föstum dálki um frægð og fjármál og gjörla má lesa að hún hefur marga fjöruna sopið. Eitt ráð hennar á einkar vel við þann minnihluta íslenskra heimila sem er með allt niðrum sig í fjármálum.

Hún hefur þetta að segja: Ekki kenna bankanum um ef þú hefur tekið of stór lán. Maður ber ábyrgð á eigin fjármálum og þótt bankinn vilji ólmur lána verður maður sjálfur að meta hvað fjárhagurinn stendur undir stóru láni.

Hér er viðtalið.

Illa gerðir Íslendingar

Hégómi, undirferli, aulaháttur og svik eru samofin útrásinni. Íslenskri kaupsýslumenn eru fjarska margir illa gerðir einstaklingar og yfirleitt verri sem þeir eru efnaðri. Ein deild kaupsýslumanna, Félag íslenskra stórkaupmanna, snaraði út fyrir heilsíðuauglýsingu í Morgunblaðinu í dag til að krefjast hraðferðar inn í Evrópusambandið.

Í þriðju línu er bein lygi: Breið samstaða er á Alþingi um aðildarviðræður við ESB, segir þar. Rétt er að einn flokkur þingmanna, Samfylkingin, hefur verulegan áhuga á inngöngu, aðrir minni en þorri þingheims hefur engan áhuga á aðild að Evrópusambandinu og endurspeglar þar þjóðarvilja.

Ómerkingarnar sem skrifuðu auglýsinguna koma upp um sitt rétta eðli þegar þeir skrifa að nú þurfi Persónulega sannfæringu og drengskap. Sá sem vill heita drengskaparmaður heldur orð sín. Þingmenn sem kosnir voru út á stefnuskrá um að Íslandi væri betur borgið utan ESB en innan verða lítilmenni ef þeir ganga bak orða sinna.

Útrásin og hrunið voru í boði íslenskra kaupsýslumanna. Eigum við í ofanálag að leyfa þeim að framselja um varanlega framtíð fullveldi þjóðarinnar og forræði eigin mála? 

 

Spjallað um spillingu

Bæjarstjórinn í Kópavogi vill viðræðunefnd þar sem rætt verður hvort ekki sé allt í sóma að veita tugum milljóna króna yfir langt árabil til fyrirtækis dóttur bæjarstjórans. Ef allt væri með felldu í íslensku samfélagi mætti líta á málið sem einkabrandara Kópavogsbúa. En óvart erum við í djúpum spillingarskít sem þýðir að ekki gilda nein vettlingatök þegar menn verða uppvísir að misnotkun almannafjár.

Gunnar I. er sekur eins og syndin og verður að víkja. 

Leggur til að skipuð verði viðræðunefnd