Leynimakk veit á lygi

Á yfirborðinu snýst Icesave-málið um það hvort skuldbindingar upp á 650 milljarða króna verði lagðar á þjóðina. Kjarni málsins er annar: Málsmeðferð ríkisstjórnarinnar er slík að stjórninni er ekki lengur treyst til að leiða málið til lykta. Lögfræðileg rök, hagfræðileg rök og pólitísk rök standa öll gegn ríkisstjórninni.

Þar á ofan bætist að ríkisstjórnin stendur siðferðilega veik eftir leynimakkið í kringum kynningu á samningnum, eða réttara sagt skort á kynningu. Stjórnin sagði almenningi að samningurinn yrði ekki birtur opinberlega vegna þess að viðsemjendur okkar, Bretar og Hollendingar, kröfðust leyndar. Allt bendir til það sé uppspuni frá rótum.

Ríkisstjórn sem ekki kemur hreint fram gagnvart þjóð sinni í jafn stóru máli og Icesave er ekki á vetur setjandi.

 

Gjaldþol ríkisins ekki í hættu

Icesave sýnir ríkisstjórn í henglum

Fábjánahringekjan sem kallst Icesave-samningurinn verður æ kostulegri. Í framhaldi af frétt í Sjónvarpinu í kvöld framkallar fjölmiðill útrásarinnar, Fréttablaðið/Vísir.is, ónafngreindan ,,áhrifamann innan ríkisstjórnarinnar" sem vitnar um að samningurinn sé sérdeilis fínn og veð séu eingöngu í útlendum eigum Landsbankans.

Áhrifamaður innan ríkisstjórnar getur varla verið annað en ráðherra, nema átt sé við Hrannar hennar Jóhönnu. Þegar slíkir aðilar eru farnir að koma fram nafnlaust til að verja íslenska Versalasamninginn er fokið í flest skjól. 

Ríkisstjórnin er algjörlega búin að missa Icesave-samninginn úr höndum sér og vei þeim þingmönnum sem láta sér detta í hug að samþykkja hann.

Enskir dómstólar skera úr Icesave-deilum

Hvernig skal böl bæta?

Verðmætin sem eyddust í hruninu voru óáþreifanleg, peningarnir voru tölur í gagnabönkum og tapað orðspor þjóðarinnar skilur eftir tilfinningu tómleika og depurðar sem er hægt að skynja en ekki sjá. Þegar einhver tekur sig til og brýtur og bramlar naglfasta eign fær eymdin ásýnd. Hús sem var heimili er rúst.

Örþrifaráð af þessu tagi er ekki hægt að mæla bót. Ef hrunið gerir okkur að niðurrifsfólki erum við enn að blóta græðgisguðinn sem lék lausum hala alltof lengi og rændi fólk sjálfsvirðingunni og reisn. Látum gott heita af stjórnleysi og temjum okkur hófstillingu. Finnum leiðir til að sýna álit okkar á ástandinu án þess að tortíma.

Bankinn fékk ekki lyklana

Lýðveldið - drög að grafskrift

Í skjóli efnahagskreppu er komin til valda ríkisstjórn sem með takmarkað umboð ætlar að flytja til útlanda helstu valdheimildir lýðveldisins. Innanmein lýðveldisins eru svikráð sumra trúnaðarmanna almennings sem virðast ætla að greiða atkvæði sitt tillögu um aðildarumsókn að Evrópusambandinu þrátt fyrir yfirlýsingu um annað fyrir kosningar.

Til að koma í veg fyrir að drögin verði frágengin grafskrift lýðveldisins þarf að koma ríkisstjórninni frá völdum. Það er verðug heitstrenging 17. júní 2009.

Lýðveldið veikara en nokkru sinni

Neðanmálsgrein dagsins

Bloggið er neðanmálgrein opinberrar umræðu. Fræðirit opnast lesendum þegar neðanmálsgreinar eru athugaðar. Opinber umræða verður gegnsærri þegar bloggið er lesið.

Neðanmálsgrein dagsins á Jóhann Björnsson.

Gunnar I. fórnarlamb, já er það ekki?

Gunnar I. Birgisson bæjarstjóri í Kópavogi opnaði bæjarsjóð fyrir dóttur sína sem skrifaði reikninga fyrir  verk sem sum voru varla unnin og ofurreikninga fyrir önnur störf. Núna virðist hann þurfa að víkja sem bæjarstjóri og stillir sjálfum sér upp sem fórnarlambi vinstrimanna og fjölmiðla.

Gunnar er álíka fórnarlamb og þjófur sem staðinn er að verki og er kallaður lögbrjótur.

Framkvæmdaglaður bæjarstjóri

Villi og orðræða atvinnulífsins

Vilhjálmur Egilsson framkvæmdastjóri Samtaka atvinnulífsins segir að ekki megi skattleggja fyrirtækin þannig að atvinnulífið ,,falli niður." Atvinnulíf óvart getur ekki fallið niður í neinni eiginlegri merkingu orðanna að falla niður. Tungubrjótur framkvæmdastjórans kemur sennilega til af því að honum er orðs vant. Fyrirtækin töpuðu frjálshyggjuorðræðunni sinni í hruninu. Þið munið stefið um lægri skatta, meiri gróða - og allir djollí.

Núna verðum við sem sagt að passa að atvinnulífið falli ekki niður. Góður brandari, Villi.

Það verður að passa upp á skattstofnana

Siðferðisbrot gert að lagaþrætu

Fróðlegt verður að fylgjast með hvort sjálfstæðismenn í Kópavogi ætli að hampa manni sem lætur tugmilljónakróna verktakagreiðslur renna úr sjóðum bæjarins til dóttur sinnar á hæpnum forsendum og felur slóðina með því að dreifa greiðslunum á mörg bókhaldsnúmer.

Í siðferðilegri umræðu eru lögfræðingar lygarar til leigu. Þeir hafa aðeins það fram að færa sem þeir eru keyptir til að segja. Af sjálfu leiðir að það er ómarktækt.

Var ekki skylt að bjóða verkin út

Sigmundur Davíð svarar kalli samtímans

Við þurfum ekki beyglaða og bælda stjórnmálamenn sem með slitgiktarkrókóttum vísifingri vísa til himins en ætla okkur til ESB-heljar. Þjóðin þarf á glaðbeittum foringjum að halda sem geisla af sjálfstrausti, telja kjark í þjóðina og  rísa gegn aumingjalegum undirlægjuhætti.

Sigmundur Davíð Gunnlaugsson er með framgöngu sinni í Icesave-málinu að vísa veginn. Andstæðingar hans í pólitík skynja það og þess vegna er hafin herferð ófrægingar gegn honum. Þar spila með nafnlausir bloggarar, lauslátir prestar og afturkreistingar fjölmiðaelítunnar.

Sigmundur Davíð fær pólitíska umbun áður en elliheimilið tekur fjanda hans í geymslu.

Plottið um að fella Icesave

Icesave-samningurinn er dæmdur. Vélað var um fall samningsins áður en hann var kynntur. Tortryggilega skammur aðdragandi og léleg upplýsingagjöf áttu að efla mótstöðuna gegn samningnum. Það hefur gengið eftir, Icesave fær ekki stuðning á Alþingi og verður felldur.

Ráðamenn eru þegar farnir að plotta næsta skref; hverjum verður þakkað að fella samninginn og hver situr uppi með Svarta-Pétur. Það liggur ekki fyrir hvort ríkisstjórnin muni standast áfallið, þess vegna er þegar rætt um þjóðstjórn.

Krefjast þess að þingmenn fái aðgang að samkomulaginu