Aðildarsinnar í vanda með veruleikann

Einn stjórnmálaflokka stendur Samfylkingin að umsókn Íslands um aðild að Evrópusambandinu. Fáeinir stuðningsmenn aðildar úr röðum sjálfstæðismanna segjast óánægðir að geta ekki beitt afgerandi meirihluta flokksmanna þöggun. Ónægðu sjálfstæðismennirnir þora ekki sjálfir að stofna flokk þrátt fyrir hótanir þar um.

Forysta Samfylkingarinnar hefur sumarið til að ákveða hvort hún sjálf hafi frumkvæðið að því að draga umsóknina tilbaka eða þingmeirihluti allra flokka taki af Samfylkingunni ómakið.

Líklega ætla aðildarsinnar flestir sér framhaldslíf í íslenskum stjórnmálum. Þeir gerðu vel í því að kannast við veruleikann eins og hann blasir við eftir helgina.

Kjarnahagsmunir Íslands varðir

Sjálfstæðisflokkurinn stóð vaktina um kjarnahagsmuni Íslands þegar landsfundur flokksins samþykkti ályktun um að draga tafarlaust tilbaka umsókn Íslands að Evrópusambandinu. Kjarnahagsmunir Íslands eru forræði yfir náttúruauðlindum og frelsi til milliríkjasamninga.

Evrópusambandsaðild fæli í sér ólíðandi skerðingu á fullveldi okkar með því að aðgangi að fiskimiðum yrði stýrt frá Brussel og sömuleiðis yrði þar ráðskast með skipan landbúnaðarmála hérlendis. Evrópusambandið yfirtæki einnig umboð ríkisstjórnar Íslands til að gera milliríkjasamninga. Íslendingar væru fastir í neti stórveldahagsmuna meginlandsþjóða Evrópu og gætu sig lítið hrært þegar í húfi væru annars vegar séríslenskir hagsmunir og hins vegar hagsmunir milljónaþjóða.

Aðildarsinnar á Íslandi eru pólitískir ævintýramenn sem sækjast eftir skyndilausnum á langtímaúrlausnarefnum. Landfræðileg staða Íslands og þróun alþjóðastjórnmála í okkar heimshluta kallar á endurmat á utanríkisstefnu þjóðarinnar. Eftir landsfundarsamþykkt Sjálfstæðisflokksins ætti öllum að vera ljóst að skyndilausnir eru ekki lengur í boði.

Þrengir ekki stöðu Sjálfstæðisflokksins

Tifandi tímasprengja sem grínið gæti bjargað

Þingsályktun um að Ísland dragi tilbaka umsókn um aðild að Evrópusambandinu liggur fyrir alþingi. Í haust kemst tillagan til umræðu og þingmenn Vg standa frammi fyrir þeim kosti að gefa dauðann og djöfulinn í kjósendur sína og grasrót flokksins, og tryggja lífdaga Jóhönnustjórnarinnar, eða fylgja sannfæringu sinni og málstað flokksins og fella í leiðinni ríkisstjórnina.

Það myndi henta ágætlega þorra þingamanna Vg og flokksins almennt að láta Evrópumál ríða stjórnarsamstarfinu að fullu. Flokkurinn gæti á trúverðugan hátt bætt fyrir mistökin í fyrra. 

Á hinn bóginn er líklegt að Samfylkingin leiti að öðru máli til að sigla ríkisstjórninni í strand. Umsátursástand ríkir innan flokksins enda stóð aldrei til að Samfylkingin yrði jaðarflokkur.

Sumarvinna velunnara Samfylkingarinnar er að finna leið til að vígstaðan verði ekki jafn vonlaus og flokkurinn á skilið. Reynslan af borgarstjórnarmálum gæti komið hér að notum.

Samfylkingin ætti að finna vaska sveit hirðfífla til að bjóða fram við næstu þingkosningar undir formerkjum gríns og ábyrgðarleysis. Nái fíflaframboð árangri er hægt að vísa á fordæmi samstarfs Besta flokksins í Reykjavík og Samfylkingarinnar. 

Samfylkingar-Benni hótar grasrótinni

Fyrir síðustu þingkosningar hannaði og fjármagnaði Benedikt Jóhannesson í Talnakönnun auglýsingaherferð til stuðnings aðalstefnumáli Samfylkingarinnar - að koma Íslandi í Evrópusambandið. Benedikt gætti samfylkingarhagsmuna í Sjálfstæðisflokknum og beitti sér fyrir því að vilji flokksmanna kæmi ekki fram í ályktunum.

Kröfuharka Benedikts, Sveins Andra Sveinssonar lögmanns og fáeinna fleiri um að kljúfa flokkinn ef afstaða meirihlutans kæmi fram í ályktunum leiddi til þess að forysta flokksins reyndi málamiðlun. Grasrót flokksins tók völdin og talaði skýrt: Ísland á að draga hið snarasta tilbaka umsóknina um aðild að Evrópusambandinu.

Benedikt er ekki ánægður og hótar enn klofningi. Hér er nafn á ný stjórnmálasamtök Benedikts og félaga: Samfylkingin II.

Einangraður jaðarflokkur í stjórnarforystu

Samfylkingin er jaðarflokkur í stjórnmálum og getur ekki haldist lengi á forystu fyrir ríkisstjórn. Samfylkingin kaus að skilgreina sig sem Evrópusambandsflokk og fékk 29 prósent atkvæða út á það við síðustu þingkosningar. Stjórnmálaklækir voru nýttir til að véla forystu Vg til að svíkja stefnu flokksins og fallast á Brussel-leiðangur með Samfylkingunni.

Í Evrópumálum skákaði Samfylkingin í því skjóli að Sjálfstæðisflokkurinn hafði ekki ótvíræða stefnu í málinu. Samfylkingin gat hótað Vg að sækja fulltingi við umsókn um ESB hjá Sjálfstæðisflokknum. Eftir helgina er það ekki lengur hægt. Afgerandi afstaða landsfundar Sjálfstæðisflokksins gegn ESB-aðild og karfa um að umsóknin verði dregin strax tilbaka tekur af öll tvímæli.

Samfylkingin mun hanga í ríkisstjórn eins og hundur á roði. Krafa um afsögn ríkisstjórnarinnar mun hins vegar verða æ háværari. Forysta Vg fékk skýr skilaboð frá grasrótinni um helgina að feigðarflanið til Brussel er án fyrirheits. 

Stjórnmálastaðan er þannig að margir leita að tilefni til að binda endi á lífdaga stjórnar Jóhönnu Sigurðardóttur. Leitin ber árangur fyrir næstu áramót.

Afhroð aðildarsinna og ósigur elítunnar

Evrópusambandssinnar guldu afhroð á landsfundi Sjálfstæðisflokksins í gær þar sem grasrót flokksins tók völdin af forystunni og samþykkti ályktun sem krafðist tafarlausrar afturköllunar á umsókn Íslands um aðild að Evrópusambandinu. Ósigur aðildarsinna í Sjálfstæðisflokknum er jafnframt niðurlæging flokkselítunnar í þrem stjórnmálaflokkum.

Umsóknin um aðild Íslands að Evrópusambandinu var ákveðin af forystufólki tveggja flokka, Samfylkingar og Vg. Forysta vinstriflokkanna vissi um stuðning eða vinsamlegt hlutleysi í forystu Sjálfstæðisflokksins. Þorgerður Katrín Gunnarsdóttir, þáverandi varaformaður Sjálfstæðisflokksins, var aðildarsinni og Bjarni Ben. formaður hafði ásamt samherja sínum, Illuga Gunnarssyni, skrifað alræmda blaðagrein haustið 2008 þar sem daðrað var við umsókn.

Almenningur er afgerandi á móti aðild að Evrópusambandinu. Umræðan er þannig vaxin að meginrök aðildarsinna eru þau að við eigum að bíða og sjá hvaða afburðagóðu undanþágur við fáum frá reglum Evrópusambandsins. Þýlyndi virðist sumum aðildarsinnum í blóð borið, enda eru hópar aðildarsinna innan Samfylkingar og Sjálfstæðisflokks útrásarkámugir og baugsklístraðir.

Móðursýkisleg viðbrögð aðildarsinna við niðurstöðu landsfundar Sjálfstæðisflokksins draga fram annað einkenni þeirra. Aðildarsinnar eru í fjarska litlum tengslum við íslenskan veruleika. Hversu heimskur þarf maður að vera til trúa því að hjárænuhópur sem kallaður er auðrónadeildin í Sjálfstæðisflokknum geti búið til nýja stjórnmálahreyfingu? 

Hvorki mannval né málefni hópsins eru líkleg til stórafreka. Sveinn Andri Sveinsson, Guðlaugur Þór Þórðarson, Þorsteinn Pálsson, Ólafur Stephensen, Árni Þór Sigfússon og bróðir hans Þór eru allir ágætis menn - svo lengi sem þeir halda sig fjarri stjórnmálum. Fyrir utan ESB-aðild gætu félagarnir sameinast um pólitíska, siðferðilega og lagalega sakaruppgjöf handa meðhlaupurum útrásarinnar.

Þegar búið er formlega að draga tilbaka umsókn Íslands að Evrópusambandinu blasir við nýtt landslag í íslenskum stjórnmálum. Þeir sem sigruðu umræðuna eru komnir á bragðið og vilja meira.

Skjaldborg Samfylkingar um Jóhönnu

Flokksstjórnarfundur Samfylkingar var lokaður öðrum en innvígðum þangað til einhver rankaði við sér og taldi það slæmt til afspurnar að forystuklíka flokksins fundaði fyrir luktum dyrum. Sérstök samþykkt var gerð á fundinum um að opna hann. Þá rann upp fyrir viðstöddum að enginn utan flokkskjarnans hafði áhuga á hvað samfylkingarfólk ræddi.

Viðbrögðin voru þau að lýsa yfir stuðningi við formanninn sem löngu er kominn fram yfir síðasta söludag. 

Í Samfylkingunni ríkir umsátursástand. Flokkurinn er einangraður í íslenskum stjórnmálum og situr einn uppi með Svarta-Pétur; umsókn um aðild að Evrópusambandinu.

Lýsa yfir stuðningi

Einangrun Samfylkingar staðfest

Móðurflokkur íslenskra stjórnmála rekur af sér slyðruorðið með afgerandi ályktun um að hafna Evrópusambandsaðild og draga umsóknina um aðild tilbaka. Undir yfirskini málamiðlana var reynt að smeygja loðmullu inn í stjórnmálaályktunina. 

Málamiðlanir á vettvangi Sjálfstæðisflokksins hafa verið notaðar af Samfylkingunni til hnika okkur nær Brussel.

Einangrun Samfylkingarinnar er staðfest með landsfundarsamþykkt Sjálfstæðisflokksins.

 

Óþarfi að sundra flokksmönnum

Heimssýn gegn Evrópusýn

Þorsteinn Pálsson vekur máls á því í Fréttablaðinu í dag að á vettvangi Heimssýnar, hreyfingar sjálfsstæðissinna í Evrópumálum, hafi fólk úr öllum flokkum hist reglulega til að móta andstöðuna gegn aðildarferli að Evrópusambandinu. Ein afleiðing af samstarfi þessa hóps er þingsályktunartillaga sem Unnur Brá Konráðsdóttir er aðalflutningsmaður að og hefur hún með sér þingmenn úr öllum flokknum nema Samfylkingu.

Líkur eru á að flokkstofnanir Vg og Sjálfstæðisflokksins gangi þannig frá málum í dag að aðildarumsókn Íslands að Evrópusambandinu verður formlega dregin tilbaka í haust.

Ný utanríkispólitík Íslands þarf umræðu þegar aðildarumsóknin er frá. Samstarf á vettvangi Heimssýnar þegar búið að leggja og væntanlega verður framhald á því starfi.

Vinstri grænir rétta kúrsinn

Mistök forystu Vg í stjórnarmyndunarviðræðum við Samfylkinguna vorið 2009 eru í leiðréttingarferli. Í janúar á þessu ári tók flokksráðsfundur af skarið og sagði Ísland ekki eiga heima í Evrópusambandinu og hvatti trúnaðarmenn til að berjast gegn aðild. Í dag liggur fyrir krafa um að Ísland dragi umsóknina tilbaka.

Samfylkingin er einangruð í Evrópumálum. Þjóðin er alfarið á móti inngöngu og tímabært að hætta að eyða þreki og fjármunum í leiðangur sem fyrirfram er dæmdur til að mistakast.

Þegar umsóknin hefur verið dregin tilbaka skapast friður til að ræða nýjar utanríkispólitískar áherslur Íslands.

Evrópumálin holgrafa flokkinn