Hönnun nýrrar forréttindastéttar

Launamál Seðlabankastjóra verður að skoða í samhengi við nýja valdastétt í landinu. Vinstrimenn ætla sér að fitna í embættum ríkisins næstu árin. Samningar við Seðlabankastjóra eiga að opna leiðina fyrir aðra embættismenn að hækka í launum.

Seðlabankastjóri er vel meðvitaður um það sem í húfi er. Í Kastljósviðtali sagði hann að laun undirmanna gætu þurft að lækka gangi málin ekki fram með þeim hætti sem áætlanir gerðu ráð fyrir.

Forréttindastétt vinstriflokkanna er í mótun og seðlabankamálið er angi af þeirri vinnu. Mótunarferlið átti að fara leynt enda ekki gert ráð fyrir að launataxtar hækki almennt. Sumir eru jafnari en aðrir.

ESB drepur sjávarútveginn - nema á Spáni

Evrópusambandið hyggst endurvinna sjávarútvegsstefnu sína. Meðal atriða sem koma til álita er að fiskveiðiheimildir verði framseljanlegar milli landa. Er það í takt við almenna stefnu ESB um opna markaði.

Ef af verður mun kerfið virka þannig að Spánverjar, sem stærstu þiggjendur byggðastyrkja, kaupa upp kvóta annarra þjóða.

Í Viðskiptablaðinu er hugmyndin sögð dauðadómur yfir skoskri útgerð.

Þingsæti sem lén

Sjálfstæðisflokkurinn hefur engin úrræði til að víkja þingmanni sem veldur flokknum tjóni. Prófkjör eins og þau hafa verið tíðkuð veita þingsæti sem lén og handhafi getur farið sínu fram án tillits til almannahagsmuna.

Sjálfstæðisflokkurinn er uppnefndur nafnlausi flokkurinn enda sjálfstraustið farið með fylginu. Á meðan situr Guðlaugur Þór sem fékk tugmilljónir í flokkssjóðinn frá útrásarauðmönnum sem hann var í samningum við um opinberar eigur OR - þessar tugmilljónir varð flokkurinn að endurgreiða - og aðrar tugmilljónir runnu beint til lénsherrans sjálfs til að gera atlögu að þingmanninum og ráðherranum Birni Bjarnasyni.

Blinda Guðlaugs Þórs á aðra hagsmuni en sína eigin væri hans einkamál ef í húfi væru ekki ríkir almannahagsmunir. 

Kjósendur verða að stúta Sjálfstæðisflokknum til að senda lénsmanninum skilaboð.

Guðlaugur hyggst ekki víkja

Krónan er bjargvættur

Íslenska krónan tók höggið sem annars hefði leitt til fjöldaatvinnuleysis eftir hrun. Grikkir höfðu fórnað drökmu fyrir evru og töldu sig hólpna í skjóli Evrópusambandsins. Falskt öryggi Grikkja leiðir yfir þá efnahagslega hlekki sem munu vara í áratug eða lengur.

Talsmenn ESB-aðildar Íslands beittu einkum fyrir sig evru-rökum. Þegar þau rök falla niður dauð og ómerk í ljósi reynslunnar er ekki annað eftir en að játa að aðildarmálstaðurinn er tapaður.

Ísland á að draga tilbaka umsókn sína um aðild að Evrópusambandinu.

Steingrímur þakkar fyrir krónuna

Pressan, málgagn auðmanna

Pressan.is er málgang auðmanna. Málsvörn fyrir Kaupþingseigendur birtist reglulega í málgagninu og upp á síðkastið fær Jón Ásgeir Baugsstjóri sérmeðhöndlun til að sýna fram á að í raun sé hann fórnarlamb en ekki gerandi.

Björn Ingi Hrafnsson er eigandi málgagnsins en hann fékk frægt sms frá Jóni Ásgeiri þar sem Binga var hrósað fyrir stærsta díl Íslandssögunnar þegar eigum Orkuveitu Reykjavíkur var slakað til útrásarauðmanna.

Bingi er sniðugur strákur. Til að klæða málgagn auðmann í feluliti hefur hann skríbenta á sínum snærum sem finnst gaman að láta taka sig í rassgatið. Hver myndi til dæmis trúa að Hannes Hólmsteinn skrifaði í málgagn auðmanna?

Arion veitir syndaaflausn

Arion banki tók upp á arma sína tvo helstu gerendur útrásarinnar, Baugsfjölskylduna og Ólaf Ólafsson sem átti stóran hlut í Kaupþingi og góðkunningi arabískra prinsa. Baugsfjölskyldan fær að halda um stjórnartaumana á verslunarveldi sínu, Högum með tilheyrandi fákeppni, og Ólafur fékk Samskip frá Arion banka.

Baugsfjölskyldan makar krókinn með því að láta Haga kaupa auglýsingar hjá 365-miðlum sem aftur eru notaðir til að skapa pólitískan þrýsting á stjórnmálamenn. Til viðbótar lætur Baugsfjölskyldan Haga greiða fyrir sig útrásarlíferni í bílaflota og jafnvel matarreikningurinn er niðurgreiddur fyrir fjölskylduna.

Á meðan bankar og stjórnvöld verðlauna helstu gerendur útrásarinnar er ekki von til að réttlætið nái fram að ganga.

Black: Bankarnir sekir um glæpi

Rök auðmanna og styrkja-stjórnmálamanna

Auðmenn segjast engin lög hafa brotið og því eigi að leyfa þeim að stunda viðskipti eins og ekkert hafi í skorist. Stjórnmálamenn sem þáðu stóra styrki frá auðmönnum segjast engin lög hafa brotið og ætla að sitja áfram í trúnaðarstöðum á launum frá almenningi.

Almenningur lætur ekki blekkjast og krefst þess að siðferðileg og pólitísk ábyrgð á hruninn nái til auðmannanna, sem bera meginábyrgð, og stjórnmálamanna sem tóku þátt í hrunadansinum með því að þiggja milljónir af útrásarpeningum.

Stóru flokkarnir tveir, Sjálfstæðisflokkur og Samfylkingin, reyna að sammælast um að smáfórnir eins og þingflokksformennska, varaformennska og tímabundið leyfi frá störfum séu nógar til að friðþægja almenning. Það  er ekki nóg.

 

Ísafold vekur athygli á hræsni ASÍ

ASÍ keypti heilsíðuauglýsingar í dag til að mótmæla atvinnuleysi á baráttudegi verkalýðs. Það er falskur tónn í ASÍ sem í einu orðinu harmar atvinnuleysi en krefst engu að síður að Ísland gangi í Evrópusambandið þar sem landlægt atvinnuleysi heldur verkalýðsbaráttu í heljargreipum.

Sannleikurinn er sá að skrifstofuliðið í ASÍ er að hugsa um eigin atvinnu þegar það berst fyrir inngöngu í Evrópusambandið. Kontóristar ASÍ hafa fyrir löngu komist að þeirri niðurstöður að innganga myndi auka starfsmöguleika þeirra. Jón og Gunna hér á Íslandi munu ekki sækja skrifstofuvinnu í Brussel. 

Ísafold, félag ungs fólks gegn Evrópusambandsaðild, vekur athygli á undarlegri afstöðu ASÍ eins og segir frá á Evrópuvaktinni.

Baráttan um Styrkja-Gulla og Sjálfstæðisflokkinn

Guðlaugur Þór Þórðarson þingmaður gerði sjálfan sig út til að klekkja á Birni Bjarnasyni þáverandi dómsmálaráðherra í prófkjöri Sjálfstæðisflokksins 2006. Auðmenn styrktu Guðlaug Þór um  25 milljónir króna enda Björn skotskífa þeirra, einkum Baugsliðsins.

Krafa er um að Guðlaugur Þór víki enda ekki æskilegt að móðurflokkur íslenskra stjórnmála tefli fram handbendi auðmanna.

Vinir og velunnarar Guðlaugs Þórs koma honum til varnar. Eflaust er það gert af góðum hug en þeir fórna Sjálfstæðisflokknum fyrir Guðlaug Þór og miklir mega mannkostir hans vera til að réttlæta þá fórn.

80 bloggarar í kringum umræðuna

Jónas Kristjánsson tók saman 80 bloggara sem hann segir spanna umræðuna. Til skamms tíma var opinber umræða hér á landi bundin við fjölmiðla þar sem tveir hópar voru í fyrirrúmi; starfsmenn fjölmiðlanna og tiltölulega breiður hópur sem skrifaði reglulega í blöðin. Síðar taldi hópurinn átti aðgengi að síðum blaðanna undir stjórnendum þeirra.

Þorri bloggaranna sem Jónas nefnir skrifa í hjáverkum og starfa við annað en fjölmiðlun. Bloggið hefur gert opinbera umræðu fjölbreyttari og dreift dagskrárvaldi fjölmiðla.

Ísland þarf meira fjölræði og bloggið gagnast valddreifingunni.