Blairismi og baugsfylking

Blairisminn sem Jóhanna Sig. gerði upp við á flokksstjórnarfundi Samfylkingar í gær var forsenda þjónkunar Samfylkingarinnar við baugsveldið. Blair viðraði sig upp við kaupsýslumenn í Bretlandi en samfylkingarútgáfan var að mylja undir ósvífnustu viðskiptahætti Íslandssögunnar.

Samfylkingin tók slaginn með Baugi þegar reisa átti skorður við fjölmiðlaveldi Baugs með fjölmiðlalögum 2004. Samfylkingin tók þátt í málsvörn Jóns Ásgeirs baugsstjóra sem byggðist á að hann væri lagður í einelti af Davíð Oddssyni forsætisráðherra.

Þegar Samfylkingin gagnrýndi Sjálfstæðisflokk og Framsóknarflokk fyrir helmingaskipti var það í þeim eina tilgangi að fá spillingarkvótanum skipt í þrennt; þannig gæti Samfylkingin fengið sitt.

Lengstan hluta líftíma síns hefur Samfylkingin verið í þjónustu auðmanna. Flokkur með þá fortíð á enga framtíð.

 

Vinkonur iðrast

Vinkonurnar Þorgerður Katrín Gunnarsdóttir og Ingibjörg Sólrún Gísladóttir iðrast sama daginn í ræðustólum stjórnmálaflokka sinna. Iðrun Þorgerðar Katrínar er tímabundin og Ingibjörg Sólrún skilyrðir afsökun sína við tvö ár.

Á eftir iðrun þarf að koma yfirbót. Ingibjörg Sólrún fetar sig í áttina með því að viðurkenna að ESB-umsóknin var feigðarflan. Þorgerður Katrín á eftir að taka afstöðu til fortíðar sinnar sem laumu-aðildarsinna.

Án þess að ástæða sé að taka heljarstökk af gleði eru stjórnmálaflokkarnir að fikra sig í áttina að uppgjöri við fortíðina og ástæða til að óska þeim velfarnaðar.

Uppgjör án afleiðinga er merkingarlaust

Hrunið varð vegna óhófs og hömluleysis. Þorgerður Katrín með 1700 milljónir króna, segi og skrifa seytján hundrað milljónir króna, skuld vegna persónulegra fjármálasnúninga  er hvorki trúverðugur varaformaður flokks sem ætlar sér hlut í endurreisn þjóðlífsins né þingmaður í þágu almannahagsmuna.

Sjálfstæðisflokkurinn þarf að taka á honum stóra sínum ef flokkurinn ætlar að mæta almenningi í kosningabaráttu sem verður án efa áður en núverandi kjörtímabili lýkur. Gott gengi í skoðanakönnunum verða fljótt falsvonir ef Sjálfstæðisflokkurinn sýnir ekki fram á að hann hafi hvorttveggja lært af pólitískum mistökum liðinna ára og axlað ábyrgð með því að útrásarlitaðir forystumenn víki.

Þorgerður Katrín ber meginábyrgð á myndun hrunstjórnarinnar undir forsæti Geirs H. Haarde. Varaformaðurinn leiddi Samfylkinguna til öndvegis í landsmálum enda Þorgerði Katrínu og Ingibjörgu Sólrúnu vel til vina. Þorgerður Katrín er ein meginástæðan fyrir taugaveiklun sem greip Sjálfstæðisflokkinn eftir hrun þegar Samfylkingin komst upp með að stjórna flokksstarfi Sjálfstæðisflokksins; ákveða að það skyldi haldinn landsfundur og að Evrópumál ættu að vera þar á dagskrá. Þorgerður Katrín tók undir Evrópusjónarmið Samfylkingarinnar vitandi að Sjálfstæðisflokkurinn hafi margítrekað að hagsmunum Íslands sé betur borgið utan Evrópusambandsins.

Útrásaróhófið og Brusselvegferðin eru greinar af sama pólitíska meiði. Að baki liggur ævintýramennska og glámskyggni á raunveruleg verðmæti. Útrás og ESB-umsókn verða til þegar fólk gleymir að forræði á eigin málum krefst ráðdeildar og forsjálni. Stórar hugmyndir löðrandi í peningum eru pólitísk Nígeríubréf og þeir sem falla fyrir slíkum brellum eiga ekkert erindi í forystu móðurflokks íslenskra stjórnmála.

 

Vilja að varaformaðurinn víki

Þorgerður Katrín næst á dagskrá

Varaformaður Sjálfstæðisflokksins þarf hvorttveggja að segja af sér flokksembættinu og þingmennsku. Þorgerður Katrín Gunnarsdóttir er holdgervingur útrásaróhófsins. Hún getur hvorki verið fulltrúi almennings né flokksmanna Sjálfstæðisflokksins, ef flokkurinn ætlar sér framtíð.

Sekt Illuga er tvöföld og þarf ekki sérfræðihóp til að staðfesta það. Í fyrsta lagi sat hann í stjórn peningamarkaðssjóðs sem fjárfesti þvert á eigin samþykkir og leiddi það til tapaðra fjármuna einstaklinga. Stærri sekt Illuga er þó sú að hafa yfir höfuð tekið sæti í sjóði sem Glitnir rak. Jón Ásgeir Baugsstjóri réð Glitni og Illugi hafði sem aðstoðarmaður forsætisráðherra kynnst vinnubrögðum og siðvitund Baugsliðsins. Maður sem gengur í þjónustu slíkra er dómgreindarlaus, svo vægt sé til orða tekið.

Á eftir Þorgerði Katrínu þarf Guðlaugur Þór Þórðarson að segja af sér. Öll þrjú eiga að segja af sér ótímabundið.

Við bíðum, en þó ekki lengi. 

Illugi fer í leyfi frá þingstörfum

Þýskir að gefast upp á evru

Minnisblað frá Morgan Stanley segir að svo gæti farið að Þjóðverjar hætti myntsamstarfi við önnur 15 ESB ríki sökum þess hve veik efnahagsstýring er á evrusvæðinu. Þjóðverjar eiga hægara um vik að hætta í evrusamstarfi en þjóðir með veikt efnahagslegt orðspor eins og Grikkland, Portúgal, Spánn og Ítalía.

Deilur eru í Þýskalandi um að hve miklu leyti þýska ríkiskassanum sé heimilt að koma óráðssíuríkum eins og Grikklandi til hjálpar. Nokkrir þýskir prófessorar hóta að kæra til stjórnlagadómstóls fyrirhugaðar björgunaraðgerðir.

Hér er umfjöllun í Telegraph um möguleikann á því að Þjóðverjar segi sig frá evrunni.

Össur staðfestir aðlögunarferli að ESB

Þjóðinni var talin trú um að Ísland hæfi samningaviðræður við Evrópusambandið og fengi að þeim loknum samning sem þjóðaratkvæði yrði greitt um. Gagnrýnendur umsóknar um aðild sögðu að Evrópusambandið byði ekki upp á viðræður, aðeins aðlögunarferli.

Össur Skarphéðinsson utanríkisráðherra staðfestir að Ísland er í aðlögunarferli að Evrópusambandinu en ekki í samningaviðræðum.  Össur reynir að telja þjóðinni trú um að í aðlögun að Evrópusambandinu sé lykill að endurreisn landsins. Reyndin verður þveröfug; með aðild færum við úr öskunni í eldinn.

Aðlögunarferli að Evrópusambandinu þverbrýtur meginforsendur loforðs ríkisstjórnar Jóhönnu Sig. um samningaviðræður við ESB og þjóðaratkvæði um samninginn. Í aðlögunarferlinu innleiðum við regluverk ESB og þegar að þjóðaratkvæði kemur stendur þjóðin frammi fyrir orðnum hlut.

Samfylkingin er að fremja valdarán.

Tímabundin afsögn telur ekki

Björgvin G. Sigurðsson eykur aðeins útgjöld ríkisins með tímabundinni afsögn og skyldi ætla að þessi þingmaður væri þjóðinni þegar allof dýr. Þegar við bætist að Björgvin G. ætlaði sér að sitja af sér umræðuna um vanrækslu í starfi sem viðskiptaráðherra hrunstjórnarinnar er morgunljóst að þingmaðurinn er ekki hótinu betri en útrásarhyskið sem hann var á mála hjá.

Björgvin G. verður að segja af sér þingmennsku fyrir fullt og fast. Á eftir honum eiga Illugi Gunnarsson, Guðlaugur Þór Þórðarson og Þorgerður Katrín Gunnarsdóttir að segja af sér þingmennsku.

Ef alþingi ætlar að halda reisn sinni verða þeir þingmenn sem ataðir eru útrásareðju að segja af sér.  Ótímabundið.

Anna Margrét sest á þing

Ofnæmi gagnvart auðmönnum

Eyjan segir frá dæmum um ofnæmisviðbrögð almennings gagnvart auðmönnum. Félagsleg útskúfun af þessu tagi er eðlilegt viðbragð við glæpum útrásarauðmanna. Þeim á ekki að líðast að ganga um götur og torg eins og ekkert hafi í skorist.

Enginn útrásarmannanna hefur gengist við afbrotum sínum og all margir þeirra ætla sér hlut í íslensku atvinnulífi. Björgólfur yngri var nærri búinn að fá lög samþykkt á alþingi sem veitti fyrirhuguðu gagnaveri hans skattaafslátt; Jón Ásgeir Baugsstjóri fær í umboði Arions banka að maka krókinn í smásöluversluninni og á fjölmiðlamarkaði í boði Landsbankans; Ólafur Ólafsson fékk Samskip gefins frá Arion banka. Dæmin eru fleiri.

Auðmennirnir og meðhlauparar þeirra eru ekki næmir á ofnæmisviðbrögð almennings. En með tíð og tíma síast það inn hjá þeim að þeirra framlag til íslensks samfélags er afþakkað.

Lífeyrissjóðir og hrunið

Lífeyrissjóðir létu útrásarauðmenn spila með sig. Lífeyrissjóðirnir hafa ekki horfst í augu við ábyrgð sína, skýrsla sem þeir keyptu sér til hvítþvottar er til skammar. Í stað þess að efna til uppgjörs um sinn hlut í útrásinni hafa lífeyrissjóðir stuðlað að myrkvun málsatvika hrunsins t.d. með því að samþykkja nauðasamninga fyrirtækja sem ættu að fara í gjaldþrot.

Lífeyrissjóðirnir útdeila fátækt til sjóðsfélaga eftir hrun í formi lægri lífeyrisgreiðslna. Hversu skarpt hafa laun og þóknanir starfsmanna og stjórnenda lækkað?

Lífeyrisgreiðslur lækka

Kratafrjálshyggja fjármögnuð með útrásarauð

Þór Saari benti á það í Kastljósi kvöldsins að Samfylkingin gekk til liðs við Sjálfstæðisflokkinn í ríkisstjórn Geirs H. Haarde í því skyni að auka útrásina og einkavæða áfram. Kratafrjálshyggjan tröllríður húsum í Samfylkingunni og þykir fara vel með Evrópusambandsáherslum.

Á Eyjunni kemur fram að útrásarfyrirtækin voru svo ánægð með kratafrjálshyggju Samfylkingarinnar að stjórnmálamenn flokksins fengu hvaða mesta fjármuni. Bragð er að þá barnið finnur.

Í hrunskýrslunni er staðfest að Samfylkingin notaði nokkrar kennitölur til að fela styrki frá útrásarfyrirtækjum. 

Allt ber að sama brunni; Samfylkingin yfirbauð frjálshyggju Sjálfstæðisflokksins með kratafrjálshyggju.