Sjálfstæðisflokkurinn stóð með lýðveldinu

Sjálfstæðisflokkurinn tekur með sér gott veganesti í síðustu viku kosningabaráttunnar. Flokkurinn stóð einn gegn atlögu annarra stjórnmálaflokka að stjórnarskránni. Atlagan var hvorttveggja að heiðri og virðingu alþingis og lýðveldinu sjálfu.

Stjórnlagaþingsbastarðurinn var bullmál kokkað upp við opinn eld á Austurvelli að næturlagi. Alþingi er málstofa kjörinna fulltrúa þjóðarinnar og stjórnlagaþing yrði útvötnun á alþingi. Í annan stað átti að nota stjórnarskrárbreytinguna til að auðvelda kvislingaleiðangur Samfylkingarinnar til Brussel þangað sem stendur til að selja landið í hendur Evrópusambandsins.

Sjálfstæðismenn skiluðu góðu dagsverki í lok þings.

 

Morgunblaðið styður Samfylkinguna

Morgunblaðið styður Samfylkinguna í þessari kosningabaráttu. Sannfæring ritstjóra Morgunblaðsins fyrir inngöngu Íslands í Evrópusambandið ræður því að samfylkingarlínan ræður ríkjum á blaðinu. Í leiðara dagsins er tekið undir með Samfylkingunni að innganga Íslands í Evrópusambandið sé töfralausn sem leysi flestan vanda Íslendinga.

Í stað þess að segja fullum fetum að Morgunblaðið styðji Samfylkinguna fer blaðið þá leið að endursegja gífuryrta grein Benedikts Jóhannessonar frá því í blaðinu í gær.

Morgunblaðið segir fáar fréttir af efnahagshruninu í evrulöndunum Spáni, Írlandi, Grikklandi og Austurríki. Þær fáu fréttir um hörmungarástandið í löndum Evrópusambandsins sem rata á síður blaðsins eru faldar í litlum eindálkum.

Morgunblaðið er fimmta herdeild Evrópusambandssinna á Íslandi.

 

Hrunið býr til þriggja flokka kerfi

Gamla fjórflokkakerfið með einum eða tveim viðhengjum ætlar að hverfa í kjölfar hrunsins. Stjórnmálakerfið sem við höfum búið við nær öll lýðveldisárin er við það að taka stakkaskiptum. Fái Framsóknarflokkurinn útreiðina sem kannanir spá, engan mann kjörinn í Reykjavík og afgangsálversfylgi á Austurlandi, er flokkurinn búinn að vera. Líklega skiptist hann á milli Samfylkingar og Sjálfstæðisflokks á næsta kjörtímabili - Vinstri grænir eru búnir að sækja sinn hluta.

Eitt sterkasta vopn Sjálfstæðisflokksins var ótti kjósenda við þriggja flokka vinstristjórn. Glundroðakenningin leyfði Sjálfstæðisflokknum að vera stór án þess að hafa ýkja mótaða stefnu. Þegar hann einnig með sterkan foringja þurfti hann alls enga stefnu. Þeir tímar eru liðnir og flokkurinn mun þurfa að kafa ofaní sjálfan sig eftir kosningar og finna út hvað hann stendur fyrir.

Fyrirsjáanlegt þriggja flokka kerfi á eftir að slípast. Það er til dæmis ekki trúlegt að til langframa verði þrír flokkar allir með fylgi á bilinu 23 - 30 prósent. Samfylkingin er líkleg til að verða minnsti flokkurinn af þessum þrem. Bæði er fylgi flokksins með óheppilega dreifingu, óeðlilega hátt fylgi í þéttbýli en lítið í dreifbýli, og svo er hitt að flokkurinn er að upplagi tækifærisinnaður.

Jóhanna Sigurðardóttir er límið sem heldur Samfylkingunni saman. Þegar hún hættir eftir tvö ár tekur við eyðimerkurganga sem dregur fylgið niður í 10 - 15 prósent.

 

VG í sókn - Samfylking stærst

Vöggustofuíhald vill ESB-aðild

Atvinnurekendur eru með allt niðrum sig vegna hrunsins. Jafnvel þeir sem ekki voru beinlínis í fararbroddi útrásarinnar eru með böggum hildar. Þeir sjá enga framtíð fyrir fullvalda Ísland heldur eigum við að skríða á hnjánum til Brussel og biðjast griða. Benedikt Jóhannesson skrifar grein í Morgunblaðið í dag og fær birta á besta stað, enda ritstjórinn löngu genginn fyrir Evrópubjörg.

Grátklökkur krefst Benedikt þess að við leitum inngöngu. Annars gerist þetta, segir hann:

 

1. Stórfyrirtæki flytja höfuðstöðvar sínar úr landi.

2. Útlendingar þora ekki að fjárfesta á Íslandi.

3. Fáir vilja lána Íslendingum peninga.

4. Þeir sem vilja lána þjóðinni gera það gegn okurvöxtum.

5. Atvinnuleysi, vaxtaokur og gjaldþrot verða viðvarandi.

6. Þjóðin missir af Evrópulestinni næstu 10 ár.

7. Íslendingar verða áfram fátæk þjóð í hafti.

 

Stórfyrirtæki hafa ekki gert annað en að baka vandræði fyrir okkur Íslendinga, þannig að séu einhver eftir er best að þau fari úr land. Útlendingar hafa fjárfest hér á landi þegar þeir sjá hag í því, til dæmis í álverum og það breytist ekki. Við fáum lán eins og við viljum og samkvæmt alþjóðlegu áhættumati. Nýverið var það áhættumat hækkað hjá evrulöndum eins og Spáni, Írlandi og Grikklandi. Atvinnuleysi er viðvarandi í Evrópu en hefur ekki verið það hér vegna þess að við erum utan Evrópusambandsins. Evrópuhraðlestin veit ekki hvert hún er að fara, ekki einu sinni hvort einn viðkomustaður eigi að vera Istambúl - hvers vegna ættum við að hoppa upp í stefnulausa lest?

Fyrir útrás vorum við með ríkustu þjóðum í heimi og erum það enn. 

Vöggustofuíhaldið og mussulið Samfylkingarinnar ætti að fara á sjálfshjálparnámskeið áður en það útskrifast af leikskólanum.

Sósíalismi neyðarinnar

Laun voru skrúfuð niður á Íslandi eftir bankahrunið. Almenn samstaða myndaðist í þjóðfélaginu um að laun skyldu lækkuð, þau hæstu mest. Afleiðingin verður launajöfnun.

Skattar verða hækkaðir, burtséð frá því hverjir sitja næstu ríkisstjórn. Reynt verður að skerða sem minnst í mennta- og heilbrigðiskerfi en líklega verður kroppað þar í en þó meira í málaflokka eins og samgöngumál.

Gengisskráning krónunnar fækkar utanlandsferðum landsmanna. Vannýttir sumarbústaðir verkalýðsfélaga eru yfirbókaðir.  Bílaflotinn eldist næstu misserin en það leiðir aftur til meiri vinnu á bifreiðaverkstæðum.

Heimilisiðnaður nær sér á strik með prjónaskap og matjurtaræktun. 

Þjóðin vinnur skemmri vinnudag. Hverskyns félagsstarf blómstrar sem aldrei fyrr.

Við kjósum Vinstri græna 25. apríl.

Gulli í boði Baugsafganga

Forsíðufrétt Fréttablaðsins í dag er skrifuð til að bera blak af Guðlaugi Þór Þórðarsyni: Styrkirnir veikja ekki Sjálfstæðisflokkinn. Í netútgáfu systurmiðils Fréttablaðsins, DV, er að finna árásir á Agnesi Bragadóttur blaðamann sem hefur fjallað um mútumálið.

Baugsmiðlar eru sérfræðingar í vonlausum málstað: Útrásinni, auðmönnum, Evrópusambandinu og núna Guðlaugi Þór Þórðarsyni.

Ósigur Sjálfstæðisflokks engin tilviljun

Í andarslitrum ríkisstjórnar Geirs H. Haarde var ekki hægt að sjá fyrir gagnólíka vegferð Sjálfstæðisflokks og Samfylkingar fram að kosningum. Flest er Sjálfstæðisflokknum mótdrægt á meðan Samfylkingin siglir þöndum seglum í kosningasigur.

Hrunið varð þrátt fyrir allt á sameiginlegri vakt S-flokkanna en aðeins annar þeirra situr uppi með svartapétur. Hvers vegna?

Heppni er hluti af svarinu. Jóhanna Sigurðardóttir datt í hlutverk forsætisráðherra og kom á daginn að hún kunni rulluna. Til liðs við Samfylkinguna gekk flokkur með þrautreynda forystu sem varla hefur stigið feilspor. Utanþingsráðherrarnir gera sig og gamla ráðherrasett Samfylkingar hefur hægt um sig í skjóli Jóhönnu.

Óheppnin hefur að sama skapi elt Sjálfstæðisflokkinn. Endurnýjunin í forystu var fyrirsjáanleg og lítt spennandi. Björn Bjarnason var siðferðileg kjölfesta sem flokkurinn getur illa verið án. Varaformaðurinn er lemstraður af Kaupþingsvenslum. Oddvitar beggja Reykjavíkurlistanna eru upp fyrir haus í útrásarmykju.

Stríðsgæfan er á hinn bóginn eitthvað sem maður býr sjálfur til í pólitík og snýst að jafnaði á sveif með þeim sem hafa trú á sjálfum sér. Sjálfstæðisflokkurinn gerði þau reginmistök eftir hrunið að fallast á eitthvað sem hét endurskoðun Evrópustefnu. Allir heilvita menn sjá og skilja að hvorki höfðu Evrópumál neitt með hrunið að gera né var bjargráð að finna í Brussel eftir októberflóðölduna. Afstaðan til inngöngu er langtímamál.

Sjálfstæðisflokkurinn lét undan kröfum Samfylkingarinnar um að endurskoða afstöðuna til Evrópusambandsins og lagði upp í ferð án fyrirheits. Samfylkingin kom með þessa kröfu til að setja samstarfsflokkinn úr jafnvægi og það tókst fullkomlega. Úfar risu innanflokks og meðal stuðningsmanna Sjálfstæðisflokksins. Þegar Samfylkingin sprengdi engu að síður ríkisstjórnina var samstarfsflokkurinn kominn á hnén. Úr þessu mun Sjálfstæðisflokkurinn ekki koma sér á lappir fyrir kosningar.

Sjálfstæðisflokkurinn missti sitt helsta skjól

Í sögulegu samhengi er Sjálfstæðisflokkurinn málssvari atvinnurekenda, en sá þjóðfélagshópur á ekki upp á pallborðið hjá kjósendum vegna hrunsins sem var í boði fyrirtækja. Sjálfstæðisflokkurinn átti þó skjól í mönnum eins og Davíð Oddssyni og Birni Bjarnasyni sem andæfðu yfirgangi auðhringa. Andóf þeirra benti til að ærlegan þráð væri að finna í flokknum.

Þegar mútumálið kemst í hámæli og forystan slær skjaldborg um mann sem hefur milligöngu um tugmilljónagjafir auðhringa til flokks og ætlar síðan að selja sömu auðhringjum opinberar eigur er fokið í flest skjól fyrir móðurflokki íslenskra stjórnmála.

Fólk segir sín á milli að atkvæði greitt Sjálfstæðisflokknum er atkvæði greitt óuppgerðri spillingu. En það er einmitt uppgjör við spillingu sem er helsta mál íslenskra stjórnmála í dag og næstu árin. 

Samfylking stærst

Fréttaskýringin neglir Guðlaug Þór

Fréttaskýring í Morgunblaðinu 4. nóvember 2007 neglir Guðlaug Þór Þórðarson við FL-group og Landsbankann. Guðlaugur Þór safnaði peningum hjá þessum fyrirtækjum haustið 2006, en hann hafði tekið við stjórnarformennsku í Orkuveitu Reykjavíkur þá um vorið. Guðlaugur Þór lét af störfum sem stjórnarformaður Orkuveitunnar í júní 2007.

Fréttaskýringin er skrifuð löngu áður en 55 milljón króna styrkir FL-group og Landsbankans til Sjálfstæðisflokksins komust í hámæli. Hér eru tilvitnanir sem staðfesta óyggjandi að Guðlaugur Þór Þórðarson var í samningum við bæði FL-group og Landsbankann um eignir Orkuveitunnar.

Stofnaðilar lögðu fram 7 milljarða með peningum og eignum og var miðað við að félagið gæti ráðist í fjárfestingar sem næmu yfir 70 milljörðum. Af hálfu GGE var óskað eftir því að Orkuveitan yrði einn eigenda, því talið var að það myndi styrkja félagið mikið. "Þær umræður kláruðust aldrei," segir Hjörleifur B. Kvaran, forstjóri OR.

Undir það tekur Björn Ingi. "Þáverandi stjórnarformaður [Guðlaugur Þór, innsk. pv] átti í viðræðum um aðkomu að því félagi, að OR tæki þátt í stofnun þess, en viðræður stóðu líka yfir við Landsbankann. Það var búið að ákveða að við færum inn í GGE, en síðan gerði eitthvað það að verkum að ekkert varð úr því. Það var búið að ræða við mig um það af hálfu forstjóra OR og stjórnarformanns og ég vissi af málinu."

Og aftur hér, þar sem bæði Hannes Smárason forstjóri FL-group og Sigurjón Árnason bankastjóri Landsbankans koma við sögu:

Hjörleifur B. Kvaran forstjóri Orkuveitunnar segir að gert hafi verið ráð fyrir því alla tíð að fá til félagsins með einhverjum hætti öfluga fjárfesta og rætt um að til framtíðar myndi Orkuveitan eiga 40% í félaginu. Viðræður áttu sér stað milli Guðlaugs Þórs og Hjörleifs og Sigurjóns Árnasonar, forstjóra Landsbankans, og Atorku, um að standa saman í útrásarfyrirtæki. "Það var ekkert nýtt að REI væri hugsað fyrir einkaaðila," segir Hjörleifur.

Þessar hugmyndir virðast hinsvegar fyrst og fremst hafa strandað á Guðlaugi Þór, sem vildi ekki að rasað yrði um ráð fram. "Hannesi Smárasyni fannst ekkert gaman að tala við mig," segir hann íbygginn. "Ég vildi fara varlega með opinbert fyrirtæki og starfa með öllum." Ef til vill hefur spilað inn í að hann var upptekinn í baráttu fyrir þingkosningar í maí. Og þá vilja menn ekki rugga bátnum.

Líklega vildi Guðlaugur Þór hvorttveggja starfa með FL-group og Landsbankanum vegna þess að hann hafði haft milligöngu um að bæði fyrirtækin styrktu Sjálfstæðisflokkinn um samtals 55 milljónir króna.

Siðfræðistofnun, ekki Ríkisendurskoðun

Guðlaugi Þór Þórðarsyni væri nær að biðja Siðfræðistofnun að gera úttekt á sjálfum sér en Ríkisendurskoðun. Áhugavert væri að vita hvernig Siðfræðistofnun leysti úr álitamálum Guðlaugs Þórs Þórðarsonar.

Eftirfarandi staðreyndir liggja á borðinu:

a) Guðlaugur Þór safnaði peningum í flokkssjóð Sjálfstæðisflokksins haustið 2006

b) Frá Landsbanka og FL-group söfnuðust samtals 55 milljónir króna

c) FL-group sérstaklega, en einnig Landsbankinn, höfðu áhuga á eigum Orkuveitu Reykjavíkur

d) Guðlaugur Þór var stjórnarformaður Orkuveitunnar

e) Guðlaugur Þór beitti sér fyrir samningum Orkuveitunnar við FL-group árið 2007

Þá er það milljón króna spurningin: Hvað kostar það Guðlaug Þór og Sjálfstæðisflokkinn að kaupa sér hreint siðferðisvottorð?

Óskar úttektar á störfum sínum