Síma -Tóti í stjórn Exista?

Einu sinni var flokksgæðingur sem stútað lífeyrissjóði á Vesturlandi en fékk að launum forstjórastól í fjarskiptafyrirtæki sem var í eigu ríkisins. Hann launaði trúnaðinn með því að skrifa á fjarskiptafyrirtækið kostnað við að koma sér upp sumarbústað og tilbehör.

Forstjórinn lét það verða sitt síðasta verk áður en hann varð að skila kreditkorti fjarskiptafyrirtækisins sökum spillingar að fylla tankinn á jeppanum.

Síma-Tóti er vonandi ekki kominn á kreik aftur til að maka krókinn á kostnað almennings?

Ný stjórn kjörin í Exista

Peningaprentun Jóns Ásgeirs

Eignir Baugs í útlöndum eru samkvæmt Jóni Ásgeiri Baugsstjóra peningaprentsmiðjur sem munu stoppa upp í Icesave-gatið, en það mun hlaupa á 400-800 milljörðum króna. Pennalipurð Jón Ásgeirs lætur ekki að sér hæða.

Ef Jón Ásgeir átti ígildi peningaprentsmiðju í útlöndum hvers vegna þurfti hann að ræna íslenska banka innan frá?

Eignir Baugs skila verðmætum

Björgólfur Thor er trúr sínu

Björgólfur Thor skilur ekki siðferðishugsun almennings vegna þess að hann lifir í öðrum heimi. Í veröld Björgólfs Thors trompa peningar allt siðferði. Maður með fjármuni þarf ekki siðvit aðeins tungulipurð og slægð.

Í gagnaversmálinu sýndi Björgólfur Thor slægð þegar hann tók höndum saman við peningamann úr röðum Samfylkingar, Vilhjálm Þorsteinsson. Tungulipurð  heitir það þegar Björgólfur Thor, sem veit ekki skulda sinna tal, fullyrðir að hann ætli að standa við allar sínar skuldbindingar. Þjóðin veit um Björgólfana tvo og Icesave. Meira þarf ekki að segja.

Björgólfur Thor finnur fífl á Íslandi til að beita fyrir vagn sinn. Þau fífl verða skilin eftir í foraðinu en Björgólfur hirðir sitt enda trúr sínu.

Skilur réttláta reiði almennings

Þjóðstjórn er samstaða um spillingu

Við sérstakar aðstæður neyðar og yfirvofandi hörmunga er þjóðstjórn réttlætanleg. Þær aðstæður eru ekki uppi núna. Umræður stjórnmálaflokka um þjóðstjórn undirstrika þrekleysi flokkanna við að axla ábyrgð á hruninu.

Þjóðstjórnarhugmyndir eru settar fram til að skapa samstöðu hjá stjórnmálaelítunni um óbreytt ástand. Krafa almennings er að stjórnmálaflokkar geri hreint fyrir sínum dyrum og þeir stjórnmálamenn víki sem eru löðrandi í útrásarspillingu.

Stjórnmálaflokkar eru ríkisrekin félög til að standa fyrir umræðu um landsins gagn og nauðsynjar jafnframt sem þau eru vettvangur þar sem fulltrúar almennings eru valdir í trúnaðarstöður. Þeir sem fara fyrir stjórnmálaflokkum landsins ættu að hafa þetta í huga. Þjóðstjórn er þöggun á umræðu og kippir fótunum undan rökum fyrir ríkisstyrkjum til stjórnmálaflokka.

 

Pólitísk lán til Jóns Ásgeirs

Enginn lánar Jóni Ásgeiri Baugsstjóra á viðskiptalegum forsendum. Maðurinn er með rekstrarlegar tætlur í höndunum, Haga og 365-miðla, og handónýtt mannorð. Lán sem Jón Ásgeir fær eru veitt á pólitískum forsendum.

Annað tveggja er að Jón Ásgeir hafi þau tök á pólitískum áhrifamönnum að þeir greiða enn götu hans eða að slíkur veigur þyki í málafylgju 365-miðla að stjórnmálamenn beiti sér fyrir hönd Jóns Ásgeirs og fái greitt með ritstjórnarlegum stuðningi.

Hver hættir ærunni til að lána Jóni Ásgeiri?

Jón Ásgeir fékk 440 milljónir króna að láni

Sporlausir peningar Guðlaugs Þórs

Í prófkjöri Sjálfstæðisflokksins haustið 2006 gerði Guðlaugur Þór Þórðarson þingmaður atlögu að Birni Bjarnasyni dómsmálaráðherra með tilstyrk Baugsveldisins sem hafði horn í síðu ráðherra. Guðlaugur Þór safnaði 25 milljónum króna í kosningasjóð til verkefnisins.

Viðskiptablaðið og Amx fullyrða að hvergi hafi komið fram hverjir séu styrkveitendur Guðlaugs Þórs.

Finnst Guðlaugi Þór allt í lagi að þiggja sporlausa peninga? Finnst Sjálfstæðisflokknum það í lagi?

ESB-andstaða í atvinnulífinu

Yfir 54 prósent stjórnenda fyrirtækja eru á móti aðild Íslands að Evrópusambandinu. Samfylkingin, sem eini stjórnmálaflokkur landsins með ESB-aðild á dagskrá, hefur reitt sig á stuðning úr atvinnulífinu við leiðangurinn til Brussel.

Atvinnulífið er í meirihluta á móti inngöngu í ESB. Andstaða almennings við inngöngu mælist milli 60 og 70 prósent.

Samt heldur ríkisstjórnin leiðangrinum áfram. Í þágu hverra starfar ríkisstjórn Jóhönnu Sigurðardóttur?

Stjórnendur fyrirtækja andvígir ríkisstjórninni

Auðmenn fá aflátsbréf frá Jóhönnustjórninni

Björgólfur Thor keypti sér aflátsbréf hjá ríkisstjórninni með því að taka með sér samfylkingarfjárfesti í gagnaverið á Keflavíkurflugvelli. Kjördæmapotarar eins og Jón Gunnarsson skrifa undir aflátið með viðhorfum um að auður kaupi réttlæti.

Jón Ásgeir Baugsstjóri fær aflátsbréf frá Jóhönnustjórninni vegna þess að hann stjórnar enn fjölmiðlaveldi sem mylur undir ríkisstjórnarflokkana, Samfylkinguna sérstaklega. Til dæmis er Fréttablaðið helsti málssvari ESB-stefnu Samfylkingarinnar.

Undanþága auðmanna, sem ríkisstjórnin veitir, grefur undan réttarríkinu. Almenningur horfir upp á að stjórnvöld taka upp á arma sína stærstu efnahagsglæpamenn Íslandssögunnar. Ríkisstjórnin hefur dekkað borðið fyrir stórslys. 

Svarar engu um hlunnindi

Samfylkingarsiðferði; auðmenn teknir í sátt

Samfylkingin tekur útrásarauðmenn í sátt með frumvarpi fyrir gagnaver Björgólfs Thor. Aðstoðarmaður Jóhönnu Sigurðardóttir, Hrannar B. Arnarson, gaf tóninn fyrr í vetur þegar hann lét þau boð út ganga að saman væri hvaðan gott kæmi.

Jón Gunnarsson þingmaður Sjálfstæðisflokksins segist skilja andstöðu við að stunda viðskipti við auðmennina sem komu landinu kné en hann er búinn að tileinka sér samfylkingarsiðferð: Auðmenn geta keypt sér fyrirgefningu með því að setja peninga í rétt kjördæmi.

Alþingi tekur útrásarauðmennina í sátt og heldur hlífiskildi yfir þingmönnum sem voru á spena auðmannanna. Með háttalagi sínu dæmir alþingi sig úr leik. Þingmenn eru einfaldlega siðlausir.

Þingið kveður upp siðferðisdóm

Ríkisgjaldþrot í Evrópu - Samfylkingin þangað

Grikkir eru gjaldþrota. Spurningin er aðeins hvort þeir verði látnir taka skellinn og verða reknir úr evrusamstarfi með skít og skömm eða hvort Þjóðverjar taki að sér að greiða grískar skuldir. Þýskir skattgreiðendur eru ekki ýkja hrifnir af botnlausri skuldahít Suður-Evrópu og óttast að á eftir Grikkjum komi Portúgalar, Spánverjar og Ítalir.

Evru-verkefnið er á krossgötum. Annað tveggja gerist; Evrópusambandið fær auknar heimildir til að stýra fjármálum evruríkja og þar með verður risaskref tekið í átt að sambandsríki Evrópu eða að myntbandalagið liðist í sundur.

Samfylkingin á Íslandi vill fyrir hvern mun verða hluti af ríkisgjaldþrotum í Evrópu og stíga hrunadansinn með ESB. Ísland hefur ekki efni á flokki eins og Samfylkingunni.

„Grikkir munu ekki borga okkur til baka”