Þingskjalið sem vantar

Eitt þingskjal vantar í þann bunka sem alþingi tekur til afgreiðslu í vor. Ályktun um að alþingi feli ríkisstjórninni að draga tilbaka umsókn um aðild Íslands að Evrópusambandinu.

Þjóðin er staðföst í afstöðu sinni til þess að ganga ekki í Evrópusambandið.

Samfylkingin einn flokka vill aðild - en flokkurinn fékk 29 prósent atkvæða í síðustu kosningum.

Það er bæði skaðlegt inn á við að halda umsókninni til streitu og ekki síður í samskiptum okkar við Evrópusambandið. Í Brussel er mönnum ekki skemmt þegar hugur fylgir ekki máli hjá umsóknarþjóðum.

Á níunda tug þingskjala

Væg skilyrði Samkeppniseftirlits

Skilyrðin sem bönkum eru sett af Samkeppniseftirliti eru of væg. Munar mestu um að Samkeppniseftirlitið er ekki tilbúið að bæta fyrir mistök undanfarinna ára þar sem samþjöppun á markaði var látin átölulaus.

Samkeppniseftirlitið á vitanlega að krefjast þess að yfirtekinn rekstur eigi að brjóta upp til að stuðla að samkeppni.

Samkeppniseftirlitið þarf að undirstrika að nýspilling endurreistra banka og gömlu útrásarviðrinanna verði ekki liðin.

Setja skilyrði fyrir yfirtöku

ASÍ hótar ríkisstjórn og nær árangri

ASÍ boðaði til formannafundar fyrir tveim dögum og eftirfarandi er upphafsmálsgrein í fréttatilkynningu ASÍ um fundinn

Formannafundi Alþýðusambandsins um efnahags og atvinnumál lauk á Grand hótel síðdegis.Áhyggjur vegna stöðu atvinnumála var áberandi á fundinum og var þungt í mönnum.  Framtaksleysi ríkisstjórnar og sveitarfélaga varðandi stærri framkvæmdir voru harðlega gagnrýnd.  

Hótun ASÍ dugði til að ríkisstjórnin lúffaði í þrem málum.

Augljóst er hvaða tökum á að taka ríkisstjórn Jóhönnu Sig. 

Samkomulag um þrjú mál

Baugslygi, ríkisbankar og nýspillingin

Í Fréttablaðinu í dag er haft eftir eiginkonu Jóns Ásgeirs Baugsstjóra að hlutafé upp á einn milljarð króna sé komið í 365 miðla. Eiginkonan, sem varð að taka að sér að vera andlit 365 sökum þess að Jón Ásgeir er dæmdur maður, neitar að gefa upp hverjir séu hinir nýju hluthafar.

Út á þessa lygi eiginkonunnar ætlar Jón Ásgeir að fá fyrirgreiðslu hjá Landsbankanum, sem er ríkisbanki. Á hinum enda nýspillingarinnar er Arion banki að moka fé og fyrirgreiðslu til Haga, sem er gamla verslunarveldi Jóns Ásgeirs. Leppur Jóns Ásgeirs í Högum er Jóhannes faðir hans.

Rekstrarfé sem Baugsfamilían fær frá Arion til Haga er notað til að kaupa auglýsingar hjá 365-miðlum. Það er auglýsingafé sem myndar fjármuni sem eiginkonan kallar hlutafé og sýnir spillingarvinveittum Landsbankamönnum.

Svínarí Baugsliðsins er landsþekkt og komið í sögubækur hrunsins. Nýspilling bankamannanna er að skríða úr holræsinu. 

Frestur 365 hjá NBI rennur út á morgun

ESB-herfræðin sem rann út í sandinn

Samfylkingin ætlaði að setja hraðamet inn í Evrópusambandið og notfæra sér að þjóðin var í taugaáfalli eftir hrun. Össur Skarphéðinsson utanríkisráðherra og plottfélagar hans gerðu ráð fyrir að láta Íslendinga standa frammi fyrir orðnum hlut - umræðan skyldi vera í lágmarki og helst um þær glæsilegu undanþágur sem Ísland fengi.

Samfylkingin ætlaði að selja Evrópusambandinu þá hugmynd að Íslendingar væru sannfærðir aðildarsinnar og ef aðeins væri hægt að leysa þetta smámál með sjávarútveginn væri gatan greið fyrir samþykkt aðildar í þjóðaratkvæðagreiðslu.

Þjóðin kveikti á hvers kyns var og hefur ítrekað mælst sannfærð í andstöðu við inngöngu, en milli 60 og 70 prósent segja nei við ESB-aðild. Undanþágurökin eru líka hvorki fugl né fiskur þegar betur er að gáð.

Æ betur rennur upp fyrir embættismönnum Evrópusambandsins að umsókn Íslands um aðild er frá Samfylkingunni en ekki ríkisstjórninni sem heild og enn síður frá þjóðinni.

Biðstjórn Jóhönnu Sig.

Ríkisstjórnin bíður eftir Bretum og Hollendingum í Icesave-málinu; eftir endurskoðun Alþjóðgjaldeyrissjóðsins; eftir að ESB-ríkin samþykki umsóknina; eftir sáttum við Samtök atvinnulífsins; eftir lækkun vaxta; eftir endurreisninni; eftir efnahagsbatanum; eftir næstu skoðanakönnun...

Ísland kann að skorta stuðning

Skjaldborg fyrir auðmenn

Fréttir um að höfuðstóll allra bílalána lækki um sömu hlutfallstölu, tæp 40 prósent,  þýðir að Range Rover fólkið fær gefins fjórar milljónir króna en hversdagsfólk afskrifaða eina milljón króna. Skilaboðin sem send eru í út í þjóðfélagið eru þau að skuldsetning sé af hinu góða.

Því djarftækari sem fólk er til lána og bruðls því meiri aðstoð fær það frá hinu opinbera.

Næsta skref ríkisstjórnar Jóhönnu Sig. hlýtur að vera að afskrifa lánin á 500 fermetra einbýlishúsunum til að auðmennirnir geti átt húsnæði í stíl við Range Roverinn.

Íslandi úthýst vegna ESB-umsóknar

Norðurslóðaríkin reyna að verjast ágangi Evrópusambandsins enda þykir nóg að finna málamiðlun milli Rússa, Bandaríkjanna, Kanada, Noregs og Grænlands. Eftir misráðna umsókn Samfylkingar um aðild að  Evrópusambandinu var ákveðið að Íslandi yrði ekki boðið að eiga fulltrúa á þessari ráðstefnu.

Í sögulegu og landfræðilegu samhengi eigum við heima í norðurslóðasamstarfi. Íslensk utanríkisstefna getur haft eitthvað að segja í slíku samhengi.

Yrðum við aðilar að Evrópusambandinu værum við búin að gefa frá okkur sjálfstæða rödd í utanríkismálum.

Yfirgaf norðurhjararáðstefnu

Ríkisstjórnin elur á sundurlyndi

Samfylkingin efndi til óvinafagnaðar með ESB-umsókninni; Steingrímur J. ætlaði að einn síns liðs að veðsetja framtíð óborinna Íslendinga með Icesave-samningi; sameiginlega stundar ríkisstjórnin hryðjuverk gagnvart sjávarútveginum.

Það er ríkisstjórnin sem elur á sundurlyndi í þjóðfélaginu.

Vinstristjórn Jóhönnu Sig. stundar pólitík yfirgangs og valdhroka. 

Sundurlyndisfjandann má ekki magna

Valkostir í ríkisstjórnarmyndun

Ríkisstjórn Jóhönnu Sig. er klofin, baklandið í verkalýðshreyfingunni er farið, landsbyggðin er í uppreisn gegn stjórnvöldum og Samtök atvinnulífsins hafa sagt upp stöðugleikasáttmálanum. Í meginatriðum eru þrír valkostir í landsmálapólitík næstu mánaða.

Í fyrsta lagi að boða til kosninga strax, sem tæki þrjá til fimm mánuði í undirbúningi, þannig að kosið yrði um mitt sumar. Þessi leið er ólíkleg enda hvorki hvatar til hennar hjá stjórn né stjórnarandstöðu.

Í öðru lagi myndun nýrrar meirihlutastjórnar. Þar eru tveir möguleikar fyrir hendi. Samfylking og Sjálfstæðisflokkur - endurvakning á hrunstjórninni er varla möguleg rúmu ári eftir að hún féll. Þriggja flokka stjórn Vinstri grænna, Sjálfstæðisflokks og Framsóknarflokks er gerleg. Aðalkosturinn við þessa útgáfu er jafnframt helsti veikleikinn; Samfylkingin yrði utan stjórnar og gæti náð vopnum sínum í stjórnarandstöðu. Þó er fyrirsjáanlegt að forystukreppa eftir að Jóhanna hættir mun tefja fyrir.

Þriðji kosturinn er minnihlutastjórn Vinstri grænna sem studd yrði hlutleysi Framsóknarflokks og Sjálfstæðisflokks. Margt mælir með þessari leið. Starfsstjórn myndi eðli málsins samkvæmt ekki vera með aðra pólitík en að láta hlutina virka. Kosningum yrði frestað fram í desember í ár eða til vors 2011. Vinstri grænir myndu fá tækifæri að sanna sig sem handverksmenn í stjórnarráðinu, Framsóknarflokkur  að safna liði og Sjálfstæðisflokkur að ljúka uppgjörin við hrundeildina.

Sigmundur Davíð og Bjarni Ben. ættu að hnippa í Steingrím J. og Ögmund og selja þeim skynsamlegustu niðurstöðuna fyrir þjóðina og alla stjórnmálaflokka nema Samfylkinguna.