Evran þarf eldvegg - pólitíkin leyfir ekki

Evru-svæðið er við það að furða upp og þarf á eldvegg að halda, skrifar John Give í Telegraph þar sem hann ber saman aðdraganda falls Lehmans bankans og yfirvofandi stóráhlaups á evruna. Give þekkir vel til gangverks fjármálamarkaðarins og hann telur að ekkert minna en sameiginleg skuldbinding allra evruríkjanna um að standa sameiginlega vörn um myntina geti hrundið áhlaupinu.

Nær engar líkur eru á því að Þjóðverjar samþykki sameiginlega ábyrgð á skuldum evruríkjanna þar sem jafnvel þýski ríkissjóðurinn er ekki ótæmandi.

Hönnuðir evrunnar gerðu ráð fyrir góðkynja kreppu sem myndi leiða evruríkin nær sameiginlegu markmiði embættismanna í Brussel um Stór-Evrópu. Kreppan sem nú er skollin á er líklegri til að tæta í sundur Evrópusamstarfið.

 

Óeining um efnahagsaðgerðir

ESB kveikir ekki á perunni

Evrópusambandið bannaði glóperur til að spara orku. Í stað glópera skyldi almenningur nota sparperur, þótt þær væru margfalt dýrari. Embættismannakerfið í Brussel þvingaði fram þessa niðurstöðu þrátt fyrir efasemdir margra. Niðurstaða þýskrar rannsóknastofu bendir til að ESB hafi fórnað heilsu fólks fyrir orkusparnað.

Samkvæmt fréttum þýskra fjölmiðla er kvikasilfursinnihald sparpera 20 sinnum meira en leyfilegt er.

Íslendingum stóð til boða að segja sig frá þessari ESB-vitleysu en gerðu ekki.

Rekur alþingi bankaeftirlit?

Svör bankastjóra Landsbankans í viðtalsþætti í síðustu viku er tilefni kröfu þingmanna Sjálfstæðisflokksins um fund í viðskiptanefnd alþingis. Steinþór Pálsson bankastjóri segir fullum fetum að eftirlitsnefnd alþingis hafi samþykkt vafasama gjörninga bankans. Hér er brot af viðtalinu, útskriftin er fengin af síðu Guðlaugs Þórs Þórðarssonar þingmanns

Spyrill:Jakob Valgeir, afskriftir hans og lán sem hann fær að ábyrgjast upp á einn milljarð. Hann eignast eftir kennitöluflakk eignir útgerðarfyrirtækisins Festi sem var sett í þrot af hálfu Landsbankans.
Bankastjóri:„Ég skal bara benda á eitt – við erum með eftirlitsnefnd frá alþingi, inni hjá okkur sem er að yfirfara hvernig við stöndum að málum.  Þeir eru að skoða mál alveg niður í smæstu smáatriði.  Og þeir segja, ... og þeir gefa okkur góða umsögn... að jafnræðis sé gætt.“

Þingnefnd hefur fundað af minna tilefni.

 

 

Ófriður á vinnumarkaði í aðsigi

Handvömm, forystuleysi og vangeta ríkisstjórnar Jóhönnu Sig. í endurreisnarstarfinu mun reynast dýrkeypt. Frestun á frestun ofan í málefnum skuldara frestar efnahagsbatanum um 12 til 18 mánuði. Ríkisstjórnin mun ekki vinna tilbaka þann tíma og getur ekki endalaust gengið á langlundargeð fólks.

Á vinnumarkaði hefur verið í gildi friðarskylda. Tilhlaup einstakra hópa til að skara eld að eigin köku hafa verið barin niður í nafni samstöðu um endurreisn efnahags þjóðarinnar.

Eftir því sem vangeta ríkisstjórnarinnar kemur betur í ljós verður ókyrrðin á vinnumarkaði meiri. Tiltrúin ríkisstjórnina minnkar og flóðgáttir opnast þegar friðarskyldan rofnar.

Kennarar ekki með í samfloti

Ísland, Írland og hugleysi Jóhönnustjórnar

Sjálfstæðismenn í ríkisstjórn Geirs H. Haarde björguðu því sem bjargað varð í október 2008 þegar íslensku bankarnir fóru í þrot. Neyðarlögin sem voru studd af Framsóknarflokknum, eins og Sigmundur Davíð Gunnlaugsson, formaður flokksins, bendir á í Morgunblaðsgrein í dag, komu í veg fyrir að almenningur á Íslandi yrði lagður í skuldafjötra að írskum hætti.

Í október 2008 stóð valið milli þess að þóknast erlendum kröfuhöfum eða verja íslenska hagsmuni. Forsætisráðherra og fjármálaráðherra, Geir H. Haarde og Árni Mathiesen, tóku þjóðarhagsmuni fram yfir kröfur útlendra fjármagnseigenda.

Icesave-kröfur Breta og Hollendinga komu upp í eftirmála hrunins. Hugleysi ríkisstjórnar Jóhönnu Sig. var komið í stað kjarks í stjórnarráðinu. Aðeins með liðsinni forsetans tókst að bjarga íslenskum almenningi frá skuldaklafa með því að þjóðin hafnaði Icesave-samkomulaginu í þjóðaratkvæðagreiðslu.

Jóhanna Sig. tilkynnti að hún sæti heima í Icesave-atkvæðagreiðslunni sem og fjármálaráðherra, Steingrímur J. Sigfússon.

Evru-neyð í byrjun viku

Mánudagurinn byrja ekki vel fyrir evruna. Juncker forsætisráðherra Lúxembúrg og Tremonti fjármálaráðherra Ítalíu segja í Financial Times að efna verði til skuldabréfamarkaðar fyrir evru-bréf til að að auka aðgengi skuldugra evru-ríkja að fjármagni. Skuldabréfamarkaðurinn fæli í sér sameiginlega ábyrgð evru-ríkja á skuldum sem í reynd þýddi að þýski ríkissjóðurinn ábyrgðist skuldir óreiðuríkjanna.

Þjóðverjar munu að óbreyttu ekki samþykkja að axla ábyrgð á skuldum evru-ríkjanna án undangenginna breytinga á stofnsáttmálum Evrópusambandsins. 

Tilboð gjaldþrota evru-ríkja í Suður-Evrópu til Þjóðverja um að undirgangast þýskan aga í fjármálum er á hinn bóginn ekki sannfærandi.

Ætli Össur fylgist með evru-dramatíkinni í beinni?

Neysla og fátækt

Fátækt hált orð sem ætti að nota af varúð. Fjölskylda sem þarf að sleppa utanlandsferð er ekki fátæk fyrir bragðið. Almenn neysla virðist ekki benda til fátæktar á Íslandi. Svo dæmi sé tekið kostar 20 þús. kr. fyrir þriggja manna fjölskyldu að fara á jólatónleika með Björgvini Halldórssyni. Tónleikarnir seldust upp og aukatónleikar sömuleiðis. Ekki þarf að fara víða um verslunarhús borgarinnar til að sannfærast um kaupgetu almennings.

Frjálst framboð af matvælum Fjölskylduhjálparinnar og annarra góðgerðasamtaka segir okkur að eftirspurn sé eftir ókeypis mat en ekki hverjir séu eftirspyrjendur.

Í byrjun aldar og fram að hruni vandist fólk á neyslu sem stenst ekki. Samdráttur á þeirri neyslu þýðir ekki fátækt - nema að frjálslega sé farið með hugtakið.

Telur millistéttina enda í fátækt

Útsvar, bíóferðir og rekstur Porsche

Útsvarshækkun upp á tæpt prósent er ígildi bíóferðar á viku fyrir einstakling með 350-400 þús. kr. í mánaðarlaun. Einstaklingur með tífalt hærra kaup borgar tæpa hálfa milljón króna meira í útsvar á ári, svipuð fjárhæð og maður borgar á mánuði fyrir Porsche á kaupleigu.

Bíóferð er lúxus, að ekki sé talað um ef hún er farin vikulega. Millistéttarfólk flest hvað veit það og gerir ráðstafanir í samræmi. Porsche er stöðutákn fólks sem á nóg af peningum og þarf að láta aðra vita af því.

Millistéttin er hryggstykkið í samfélaginu og skilur að óráðssía liðinna ára felur í sér samdrátt í neyslu og lagar sig að þeirri staðreynd. Porsche-fólkið lítur öðrum augum á tilveruna og berst með kjafti og klóm gegn hækkun útsvars. Maður á Porsche getur aldrei orðið hamingjusamur á Ford.

Ætla að hækka útsvar

Skattar og Sjálfstæðisflokkurinn

Viðbrögðin við hækkun útsvars á Seltjarnarnesi sýnir að Sjálfstæðisflokkurinn telur lága skatta eitt helsta trompið á hendi sinni. Flokkurinn vann sigur á Seltjarnarnesi í síðustu kosningum og hefur raunar aldrei annað stjórnmálaafl komið við sögu meirihluta í bæjarfélaginu en Sjálfstæðisflokkurinn. Af því leiðir að Sjálfstæðisflokkurinn á landsvísu telur samþykkt Seltirninga fordæmisgefandi.

Sjálfstæðisflokkurinn veður í villu og svíma ef forystan hefur gefið sér að skattar verði stóra kosningamál næstu kosninga. Skattar skipa máli en þeir eru einfaldlega of margir sem vita of mikið um óráðssíu undanfarinna ára til að hægt verði að reka kosningabaráttu á grunni skattaprósentu.

Ríkustu Íslendingarnir missa sig iðulega í skattaumræðu enda einatt það fólk sem hefur minnstan greiðsluvilja til samneyslunnar. Millistéttin, aftur á móti, er ekki sérlega uppnæm fyrir skattaumræðu. Millistéttin vill hafa hlutina i lagi og veit að til þess þarf að borga skatta, prósenta til eða frá er ekki lífsspursmál.

Í síðustu kosningum tapaði Sjálfstæðisflokkurinn millistéttinni. Flokkurinn vinnur hinn breiða fjölda ekki tilbaka með tilboði um lægri skatta.

Mótmæla útsvarshækkun á Seltjarnarnesi

Össur: Forsetinn bara einhver Íslendingur

Risið á ríkisstjórninni lækkar jafnt og þétt í réttu hlutfalli við fleiri axarsköft og minni tiltrú almennings. Samfylkingarráðherrar fara fyrir niðurlægingu ríkisstjórnar lýðveldisins og þar er utanríkisráðherra í sérflokki. Össur Skarphéðinsson utanríkisráðherra ber höfuðábyrgð á sneypuförinni til Brussel og sundurtættu orðspori þjóðarinnar.

Ólafur Ragnar Grímsson forseti stendur fastur fyrir gegn yfirgangi ESB-þjóða sem halda sig hafa hagsmuni Íslands í hendi sér þegar við liðleskjur eins og Össur er að eiga. Í stað þess að þakka forsetanum að standa í ístaðinu sendi Össur þessa kveðju á visir.is

„Það þvælist ekki fyrir utanríkisráðherra þó að forseti Íslands hafi skoðanir á málunum. Ef það er einhver Íslendingur sem hefur getið sér orð fyrir það að hafa sterkar skoðanir í gegnum tíðina þá er það nú einmitt forsetinn," segir Össur.

Tónninn sem utanríkisráðherra sendir forseta lýðveldisins er í hæsta máta óviðeigandi.