Bankar í eigu huldumanna til óþurftar

Í útrásinni hættu bankar að þjóna almenningi og atvinnulíf. Bankar sátu yfir hlut annarra, notuðu afl sitt og innherjastöðu til að deila og drottna. Skæðustu útrásarauðmenn gerðu sér enda far um að eignast banka.

Föllnu bankarnir voru endurreistir eftir hrun og gerðir að ríkisbönkum. Tveir þeirra, Arion og Íslandsbanki, hafa að stórum hluta verið færðir undir eignarhald huldumanna.

Ef ekki liggur hið snarasta fyrir hvað bankarnir ætlast fyrir og hverjir eigendur þeirra eru hlýtur að vera ástæða til að efna til herútboðs meðal almennings að hætta viðskiptum við huldubankana.

Hryðjuverk afhjúpa mótsögn í lífstíl

Öfgamenn í Yemen skipuleggja misheppnað hryðjuverk í aðflugi Airbusvélar að Detroit í Bandaríkjunum. Í kjölfarið ganga alþjóðlegar flugsamgöngur úr skorðum. Hátimbraður vestrænn lífstíll riðar til falls vegna þess arabískir miðaldamenn afhjúpa mótsögn Vesturlandabúans sem hvorttveggja vill öryggi og neyslufrelsi. Annað tveggja mun gefa eftir og það verður neyslan og frelsið.

Hryðjuverk, efnahagskreppa og ímynduð eða raunveruleg náttúrvá leiðir til breytinga á dæmigerðum vestrænum lífsháttum næstu misserin og árin.

Þotuflug skreppur saman og gönguskórnir verða meira nýttir á heimaslóðum.

 

Þingmenn Samfylkingar tala

Samfylkingarþingmenn tóku loks til máls um Icesave-frumvarpið í kvöld en þeir hafa hingað til keppst við að þegja. Meginröksemd þingmanna Samfylkingar er að vegna þess að Sjálfstæðisflokkurinn sat hjá við afgreiðslu gildandi Icesave-laga þá þurfti að búa til nýtt frumvarp sem afnemur fyrirvara frá lögunum í sumar.

Samfylkingin er sem sagt að refsa Sjálfstæðisflokknum með því að leggja fram Icesave-frumvarp sem bindur þjóðina á skuldaklafa um langa framtíð.

Blint hatur Samfylkingar á mönnum, flokkum og málefnum verður þjóðinni dýrt.

Lokaumræða um Icesave

Stjórnað í skjóli útlends valds

Ríkisstjórnin leitar í skjól Breta, Hollendinga, Dana og Alþjóða gjaldeyrissjóðsins til að koma fram málum sem eru í bága við hagsmuni þjóðarinnar en bjarga ríkisstjórninni frá falli. Ríkisstjórn sem ber útlendan skjöld gegn vilja þjóðar sinnar verður ekki langlíf.

 

Kostnaður vegna Icesave hærri ef samkomulag verður fellt

Landsfundur Samfylkingar og ESB

Á landsfundi Samfylkingar fyrir sex árum var meðfylgjandi tillaga borin fram. Tillagan var frá andstæðingum aðildar Íslands að Evrópusambandinu og fékk ekki framgöngu. Tillagan er birt hér til að sýna fram á þá fáránlegu stöðu að ríkisstjórn Íslands hefur sent umsókn um aðild að Evrópusambandinu án þess að hafa skilgreint samningsmarkmiðin. Frá Samfylkingu hefur aldrei heyrst hósti né stuna um samningsmarkmið.

Landsfundur Samfylkingarinnar 31. okt. 2003

Tillaga að efnisgrein í ályktun landsfundar um utanríkismál.

,,Samfylkingin hefji þegar í stað vinnu við að skilgreina samningsmarkmið Íslendinga til að undirbúa hugsanlega aðildarumsókn að Evrópusambandinu. Skilgreining á samningsmarkmiðum Íslendinga liggi fyrir eigi síðar en í maí 2004."

Rökstuðningur.

Í póstkosningu Samfylkingarinnar haustið 2002 var spurt hvort Íslendingar eigi að skilgreina samningsmarkmið sín gagnvart Evrópusambandinu. Í litprentuðum bæklingi sem fylgdi atkvæðaseðlinum var skýrt tekið fram að ekki væri verið að taka afstöðu til inngöngu: ,,Í atkvæðagreiðslu um stefnu Samfylkingarinnar í Evrópumálum er Samfylkingarfólk ekki að taka afstöðu til þess hvort Ísland eigi að ganga í Evrópusambandið."
Eftir atkvæðagreiðsluna var ekkert unnið í skilgreiningu samningsmarkmiða. Í kosningastefnuskrá flokksins vorið 2003 var sagt að það væri verkefni næstu ríkisstjórnar væri að skilgreina samningsmarkmið okkar.
Ekki er trúverðugt að tala um að í framtíðinni eigi einhverjir aðrir en Samfylkingin sjálf að skilgreina samningsmarkmið þjóðarinnar. Tímabært er að flokkurinn geri upp við sig hvort og þá á hvaða forsendum Samfylkingin er tilbúin að mæla með umsókn um aðild að Evrópusambandinu.

Páll Vilhjálmsson

Eyjólfur Eysteinsson

Hörður Guðbrandsson

Oddbergur Eiríksson

Davíðsheilkenni Samfylkingar staðfest

Með því að Samfylkingin teflir fram Jóni Sigurðssyni í stjórnarformennsku ríkisbanka staðfestir flokkurinn að maður sem hvorttveggja var í Seðlabankastjórn og formaður stjórnar Fjármálaeftirlitsins sé prýðilega hæfur í forstöðu fyrir nýjum ríkisbanka.

Samfylkingin fékk samþykkt sérstök lög til að koma Davíð Oddssyni úr Seðlabankanum. Málpípur flokksins ætluðu að ganga af göflunum þegar Davíð varð ritstjóri Morgunblaðsins. Í báðum tilvikum var málefnalegum rökum beitt, sem sé að maður sem var í stóru hlutverki fyrir hrun í fjármálakerfinu ætti ekki að koma nálægt ábyrgðastöðum í samfélaginu eftir hrun.

Samfylkingin stendur afhjúpuð eftir að Jón Sigurðsson er kominn til vegs í ríkisbanka. Í augum samfylkingarforystu er aðalatriðið að maðurinn heiti ekki Davíð Oddsson.

Verða trúnaðarmenn tjónvaldar?

Þeir 63 þingmenn sem sitja Alþingi eru þar á vegum þjóðarinnar. Þegar til kasta þingsins kemur mál sem er jafn illa unnið af hálfu framkvæmdavaldsins og Icesave-samningurinn ber þingmönnum skylda að hafna málinu. Hvorki innihald samningsins né málsmeðferð réttlætir samþykkt frumvarpsins.

Við höfum samþykkt ábyrgð okkar á innistæðusjóði bankareikninga með samþykkt frumvarps í sumar. Lengra verður ekki gengið án þess að tefla í tvísýnu fjárhagslegri afkomu þjóðarinnar.

Þingmönnum ber skylda til að hafna frumvarpinu.

 

 

Icesave á Alþingi á morgun

Eftir hrun er tími kraftaverka

Útrásin var hápunktur efnisgæðatrúar. Hrunið opnaði gáttir fyrir kraftaverkatrú. Skemmtilegasta útgáfan af nýfenginni handanheimatísku er kona sem segist láta álfa serða sig í tíma og ótíma.

Fjölskyldur í lagi, fyrirtæki í ólagi

Um 80 prósent fjölskyldna er í skilum og þarf ekki á aðstoð að halda. Fyrirtæki í skiptum við Íslandsbanka eru með öfugt hlutfall; 80 prósent í ólagi. Samtök atvinnulífsins, Viðskiptaráð og önnur samtök fyrirtækja þurfa að útskýra fyrir almenningi hvers vegna stór hluti þeirra félagsmanna kunna ekki fótum sínum forráð.

Allsherjarríkisvæðing á atvinnurekstri hlýtur að vera næsta skrefið, ef ekki koma skynsamlegar skýringar á frammistöðu forráðamanna íslenskra fyrirtækja. 

Hvað hafa annars margir forstjóragemsar verið látnir taka pokann sinn?

20% þurfa ekki aðstoð

Uppgjöf meirihlutans

Ríkisstjórnin laug að þjóðinni í sumar þegar gerðir voru heimskustu milliríkjasamningar sem nokkru sinni hafa verið gerði á Íslandi. Ríkisstjórnin ætlaði að keyra Icesave-samningana í gegnum þingið á fáeinum dögum og lét eins og himinn og jörð myndu farast ef ekki væri farið að kröfu stjórnarinnar.

Icesave-málið, bæði samningarnir sjálfir og málsmeðferð, sýna að ríkisstjórn Jóhönnu Sigurðardóttur er ofviða að gæta hagsmuna þjóðarinnar andspænis Bretum og Hollendingum.

Ríkisstjórnin gafst upp í öndverðu og þessi jólaspuni um að við höfum spillt fyrir okkur með því að birta lögfræðiálit undirstrikar það eitt að enginn endir er á sleifarlagi stjórnarinnar.

Vöruðu við því að birta álitið