Krítík í stað baugsblaðamennsku

Baugsblaðamennska er að selja sál sína auðdólgi og svíkja grunngildi blaðamennskunnar að hafa það sem sannara reynist og starfa í almannaþágu. Gunnar Smári Egilsson, Sigurjón bróðir hans og Reynir Traustason eru meðal þekktustu iðkenda baugsblaðamennskunnar. Háborg þessarar gerðar blaðamennsku er 365 miðlar sem slúðrað er um að séu til sölu, þótt enginn skyldi veðja á það.

Jón Ásgeir Jóhannesson Baugsstjóri fjármagnaði baugsblaðamennskuna enda var hún rekin í hans þágu og viðskiptaspillingarinnar sem þreifst í kringum hann.

Dauði baugsblaðamennskunnar er löngu tímabær. Hugsjónir um blaðamennsku lifa og hópur fólks sem kennir sig við krítík lofar góðu.

Össur eða ríkisstjórnin

Umsóknarörvænting Össurar Skarphéðinssonar utanríkisráðherra eykst með hverju nýju útspili. Skósveinn hans, Þorsteinn Pálsson fyrrum formaður Sjálfstæðisflokksins, fór í hraksmánarlega för til Valhallar að boða fagnaðarerindið um Evrópusambandið: tollafgreiðslukerfi sambandsins eru rök fyrir inngöngu.

Þorsteinn Pálsson nýtur einskins trúnaðar í Sjálfstæðisflokknum eftir að hann gekk Jóni Ágeiri og Baugsveldinu á hönd á tímum útrásar. Dómgreindarleysi Össurar að beita manni með orðspor Þorsteins fyrir ESB-vagninn mælist í gígabætum.

Samfylkingarhluti ríkisstjórnarinnar er rökþrota í umræðunni um aðild Íslands að Evrópusambandinu. Evrópa stendur báli gjaldþrota evru-ríkja og allar sambandsfréttir úr álfunni verða merktar hörmungum næstu tvö til fjögur árin. Snautlegar röksemdir um inngöngu vegna tollafgreiðslukerfa eða einhvers annars tittlingaskíts afhjúpa himinhrópandi getuleysi að útskýra hvers vegna Ísland ætti að afhenda fullveldi og forræði sinna mála til félagsskapar meginlandsríkja Evrópu.

Samfylkingin getur ekki öllu lengur átt aðild að ríkisstjórn Íslands þegar búið er að kippa fótunum undan helstu ástæðunni fyrir ríkisstjórnarmynduninni. Samfylkingin hafði eitt mál: umsókn Íslands um aðild að Evrópusambandinu. Eina leiðin sem er fær ríkisstjórninni er að Össur Skarphéðinsson utanríkisráðherra og aðalábyrgðarmaður á misheppnaðri Evrópustefnu víki sæti.

Valið stendur um líf ríkisstjórnarinnar og ráðherradóms Össurar.

Bófi biðst vægðar

Auðmannaklíkan sem stundaði svindl og eyðilagði samfélagsinnviði undir formerkjum útrásar telur sig hafa hreinan skjöld og að glæparannsóknir á athöfnum þeirra séu sprottnar af illu hvötum. Jón Ásgeir Jóhannesson kenndur við Baug er hvað þekktastur auðdólganna.

Viðskiptavild Jóns Ásgeirs var byggð á mútufé annars vegar og hins vegar hótunum um að beita dagskrárvaldi fjölmiðla til að ráðast á æru þeirra sem stóðu gegn yfirgangi hans.

Jón Ásgeir var óvandur að meðölum en æmtir þegar endurreisn laga og reglna hittir hann fyrir. Samfélagið þarf að ganga svo frá málum að Jón Ásgeir og hans nótar fái hvergi frið til að endurvekja bófasiðferði í viðskiptum. 

 

Yfirheyrðir fram á kvöld

Aularök Þorsteins Pálssonar

Samlíking Þorsteins Pálssonar á upplýsingum um ESB annars vegar og hins vegar forvirkum rannsóknaraðferðum er aulaleg í besta falli. Efni og umræða um Evrópusambandið er til á óteljandi vefsetrum og öðrum fjölmiðlum. Forvirkar rannsóknaraðferðir eru sérúrræði lögreglu og afkimaumræða. Samlíkingin sýnir inn í ruglheim helsta sjálfstæðismannsins úr röðum aðildarsinna.

Ógrynni upplýsinga liggja fyrir um Evrópusambandið. Þeir sem nenna kynna sér þær. Þorsteinn og aðildarsinnar reyna að telja fólki trú um að upplýsingar sem fást með mútuferðum til Brussel eða í aðildarviðræðum bæti einhverju við um það sem þekkt er og vitað um Evrópusambandið. 

Í kjánaheimi Þorsteins og félaga mun Evrópusambandið breytast í veigamiklum atriðum við inngöngu Íslands. Við eigum sem sagt að trúa því að samband 500 milljóna Evrópubúa breytist við að 300 þúsund Íslendingar gangi inn.

Eiga ekki að hræðast upplýsingar

Þorsteinn skilur Össur eftir í snörunni

Össur Skarphéðinsson utanríkisráðherra handvaldi Þorstein Pálsson fyrrum formann Sjálfstæðisflokksins til að taka sæti í viðræðunefnd Össurar vegna aðlögunarferlis Íslands í Evrópusambandið. Þorsteinn átti að byggja brú mill Samfylkingar og aðildarsinna í Sjálfstæðisflokknum.

Orð Þorsteins um að ríkisstjórnin hafi ekki bolmagn til að ljúka aðlögunarferlinu staðfestir einangrun Samfylkingarinnar í íslenskri pólitík.

Össur Skarphéðinsson og feigðarförin til Brussel eru gangandi pólitískt stórslys á vinstri væng stjórnmálanna. Það mun fljótlega renna upp fyrir samfylkingarfólki að til að ná vígstöðu á ný þarf að fórna umsókninni og Össuri með. Samfylkingin fórnaði Ingibjörgu Sólrúnu fyrir minni sakir.

Efast um að stjórnin geti lokið viðræðum

Vinstri græn, aðlögunin og næstu kosningar

Aðildarsinnar vilja ekki lengur hraðferð inn í Evrópusambandið vegna þess hversu andstaðan við aðild er öflug. Engar líkur eru á því að aðlögunarferlinu ljúki á kjörtímabili ríkisstjórnar Vg og Samfylkingar. Það þýðir, verði ekkert að gert, að Vg mun heyja kosningabaráttu í skugga aðlögunar og yfirvofandi innlimunar Íslands í Evrópusambandið.

 

Forysta Vinstri grænna getur ekki komið í næstu kosningabaráttu með þann boðskap að flokkurinn standi vörð um fullveldi Íslands og telji hagsmunum okkar betur borgið utan Evrópusambandsins - ef aðlögun Íslands heldur áfram. Almenningur gerir einfaldlega aðrar kröfur til Vinstri grænna en Besta flokksins.

Vinstri grænir verða í útrýmingarhættu við næstu kosningar. Vinstri græn hleyptu aðlögunarferlinu af stað og beygðu sig fyrir ofríki Samfylkingar. Eini kostur flokksins er að bæta fyrir mistökin vorið 2009 með því að tryggja að umsóknin verði dregin tilbaka.

 

 

Sverrir í vörn fyrir pólitískan þjófnað

Stjórnmálaflokkar eru á opinberu framfæri og þjóna því hlutverki í samfélaginu að bjóða fram pólitíska valkosti. Trúnaður við almenning er höfuðskylda stjórnmálaflokka. Kjarnaatriði trúnaðarins er að stjórnmálaflokkur segi það sem hann meinar og meini það sem hann segi.

Vinstrihreyfingin grænt framboð sagðist við síðustu kosningar vera á móti aðild Íslands að Evrópusambandinu. Frambjóðendur flokksins tónuðu þetta stef á framboðsfundum og formaðurinn tók sérstaklega fram að Vinstri grænir væri ,,stefnufastur" flokkur.

Eftir kosningar brá svo við að forysta Vinstri grænna gerði samkomulag við Samfylkinguna um að ríkisstjórnarmeirihluti þessara tveggja flokka skyldi standa að umsókn Íslands um aðild að Evrópusambandinu.

Samkomulag Vinstri grænna við Samfylkinguna um að styðja aðildarumsókn Íslands er pólitískur þjófnaður sem þverbrýtur höfuðskyldu stjórnmálaflokks en það er trúnaður við almenning. 

Sverrir Jakobsson sagnfræðingur skrifar grein í Fréttablaðið í dag þar sem hann reynir að verja pólitískan þjófnað forystu Vinstri grænna með því að segja að ,,grasrót" flokksins hafi blessað þjófnaðinn.

Vinstri grænir sóttu umboð sitt til almennra kjósenda í þingkosningum. ,,Grasrót" flokksins hefði skilað framboðinu tveim til þrem þingmönnum. Samband ,,grasrótar" og forystu flokks er með ýmsum hætti en hvort sem ,,grasrótin" er meðvirk forystunni eða veitir henni aðhald getur engin ,,grasrót" verið forystu skálkaskjól fyrir trúnaðarbrot gagnvart almenningi.   

Yfirþyrmandi tækifærismennsku sína undirstrikar Sverrir með því að spyrja gagnrýnendur innan flokksins með þjósti hvort þeir vilji að ríkisstjórnin falli. Fyrir það fyrsta getur ríkisstjórn sem mynduð er með pólitískum þjófnaði ekki vænst langra lífdaga. Í öðru lagi er spurningin um aðild Íslands að Evrópusambandinu mikilvægari en svo að muni einni ríkisstjórn til eða frá.

 

 

 

Aðlögun er innlimun

Evrópusambandið gerir ráð fyrir að umsóknarríki hafi staðfastan vilja til inngöngu. Talsmaður sambandsins staðfestir að aðein ein leið er í boði og það er aðlögunarleiðin. Aðlögun felur í sér að lög og reglur sambandsins eru tekin upp samhliða viðræðuferlinu. Evrópusambandið fylgist með framvindu aðlögunarinnar og skrifar reglulega skýrslur sem gefa yfirlit yfir aðlögunina.

Í lok aðlögunar er búið að innlima Ísland og þjóðaratkvæðið staðfesting á orðnum hlut. Í munni aðildarsinna heitir þetta lýðræði.

ESB hafnar hugmyndum Ögmundar

Írland á sjúkrabörum ESB

Írsk-evrópskur farsi hefur verið á dagskrá alþjóðlegu fjölmiðlanna um helgina. Fréttir um að írsk stjórnvöld séu í viðræðum við Evrópusambandið um neyðaraðstoð eru bornar til baka í Dublin. Eftir helgi er ekki lengur hægt að neita því augljósa. Írland er á sjúkrabörum Evrópusambandsins og fær litlu ráðið um meðferðina.

Írland á aðeins einn kost, segir Peter Oborne aðalstjórnmálaskýrandi Telegraph, og það er að hætta dauðadæmda samstarfinu við meginlandsríkin um evru og taka upp írska pundið á ný.

Írland er í spennitreyju evrunnar og getur sig hvergi hrært. Hér á landi er minnihlutahópur sem vill írskt ástand fyrir Ísland. Afgerandi meirihluti þjóðarinnar segir nei takk, ekkert ESB. Drögum umsóknina misráðnu tilbaka.

Viðræður milli Írlands og ESB

ESB-rýni staðfestir aðlögunarferlið

Rýnifundir íslenskra embættismanna út í Brussel staðfesta að Ísland er í aðlögunarferli en ekki óskuldbindandi samningaviðræðum. Rýnivinnan er undanfari þess að Ísland breyti löggjöf sinni til samræmis við lög og reglur Evrópusambandsins. Ef aðeins væri um samningaviðræður að ræða þyrfti ekki rýnifundi.

Aðlögunarferli Íslands felur í sér að við tökum jafnt og þétt upp lög og reglur Evrópusambandsins. Í reynd er Ísland innlimað í sambandið.

Þjóðaratkvæði í lok aðlögunarferlis er aðeins til málamynda. Ríkisstjórn Jóhönnu Sig. hefur líka gefið út að þjóðaratkvæðagreiðslan verði ,,ráðgefandi."

Rýnt í samningaviðræður við ESB