Össur með stórveldi í vasanum

Utanríkisráðherra er ekki einhamur stjórnarerindreki okkar Frónbúa. Bandaríkin eta úr lófa ráðherra og nú undirbýr hann hælkrók til að fella Evrópusambandið. Össur Skarphéðinsson leggur á ráðin um Brusselför í Þjóðmenningarhúsinu áður en hann sendir vaska sveit að kenna Brussel að kyngja íslenskum hagsmunum. Bandaríkin eru sem fyrr okkar bestu vinir þótt sérvinur Össurar á Bessastöðum hafi móðgað síðasta sendiherra Sáms frænda. Og við trúum hverju orði ráðamanna.

 

Samskipti við Bandaríkin með besta móti

Fjórflokkur og þjóðfundur

Fjórflokkurinn valdar opinbera umræðu. Almennt líta þátttakendur í stjórnmálum svo á, þótt sjaldnast sé það sagt upphátt, að flokkarnir fjórir rúmi stjórnmálaumræðuna sem þjóðin þarf. Viðhorfið er að breidd fjórflokksins sé slík að ekki sé þörf á öðrum vettvangi.

Stundum er fjórflokkurinn skoraður á hólm, núna síðast með framboði Borgarahreyfingarinnar, en einatt stendur fjórflokkurinn keikur eftir atlöguna.

Utan fjórflokksins eru fulltrúar viðhorfa og sjónarmiða sem stundum reyna nýjan vettvang stjórnmálaumræðu. Á hinn bóginn er hætt við að þegar hlutir eins og þjóðfundur um framtíðarsýn Íslendinga fer af stað að annað tveggja gerist. Að hagsmunaöfl yfirtaki sviðið eða að kverúlantar leggi undir sig hreyfinguna. Hvorugt er ávísun á langlífi félagasamtaka.

Jónas Kristjánsson er ekki bjartsýnn á að þjóðfundurinn takist og viðrar efasemdir um aðferðir og fyrirkomulag.

 Tilraunin er í það minnsta virðingarverð.

Þjóðfundur um framtíðarsýn Íslendinga

Lilja kveður Icesave

Við getum einfaldlega ekki samþykkt Icesave-samningin ríkisstjórnar Jóhönnu Sigurðardóttur, höfum ekki efni á því.

Icesave-samningnum var þröngvað upp á Íslendinga vegna þess að bankakerfi Evrópu riðaði til falls út af óvissu um innistæðutryggingar.

Til að fá nýjan samning þurfum við nýja ríkisstjórn. Við eigum að fá minnihlutastjórn Vinstri grænna með Lilju Mósesdóttur sem fjármálaráðherra og Steingrím J. sem forsætisráðherra.

Viðurkenna lífskjararýrnun

Kaupþing skuldar skýringar

Yfirtaka Nýja Kaupþings á eignarhaldsfélagi Haga fór fram fyrir tveim til þrem vikum, samkvæmt forstjóra Samkeppniseftirlitsins. Hvers vegna hefur það verið leyndarmál í þennan tíma að ríkisbankinn tók yfir Haga?

Ótækt er að halda áfram undirferli útrásarinnar þar sem auðmenn og fjármálastofnanir bröskuðu í skjóli bankaleyndar.

Nýja Kaupþing skuldar þjóðinni skýringar.

 

Kaupþing og 1998 formlega í eina sæng

Brandarafélagið ASÍ

Forseti ASÍ viðurkennir að hafa fallist á launalækkun, bara ekki svona mikla. Eins og segir orðrétt í fréttatilkynningu forsetans

Báðum þessum hugmyndum hafnaði samninganefnd ASÍ strax og tilkynnti SA að við myndum aldrei samþykkja svona mikla frestun á launahækkunum- þeir gætu eins sagt kjarasamningum upp strax. (Leturbreyting pv)

Punkturinn í málinu er að ASÍ semur um lágmarkstaxta, nær öll laun eru þar fyrir ofan. Stéttarfélag með lágmarksvirðingu fyrir baráttu launþega myndi aldrei fallast á að lækka lágmarkstaxta.

Ef allt væri með felldu hjá ASÍ hefði það sagt Samtökum atvinnulífsins að éta það sem úti frýs. ASÍ er hins vegar í bandalagi við SA um að stjórna landinu og var alveg til í að fórna umsömdum launahækkunum í þágu samstarfsins. Hagsmunir launafólks eru ekki í forgangi hjá ASÍ.

Segir fullyrðingar Ragnars rangar

Ísland, Þýskaland og ESB

Sameining Þýskalands og flutningur höfuðborgarinnar frá Bonn til Berlínar markar tímamót í eftirstríðsárasögu Evrópu. Eftir seinna stríð var álfunni skipt í austur og vestur. Bandaríkin héldu lífi í vesturhlutanum með Marshall aðstoð og hervernd en Sovétríkin réðu lögum og lofum fyrir austan.

Þýska sameiningin og tilfærslan austur á bóginn felur í sér að landpólitík Þjóðverja beinist að gömlum áhrifasvæðum á þar sem núna er Pólland, Eystrasaltslönd, Úkraína, Hvíta-Rússland og sjálft Rússland.

Þýskaland er þungavikt í Evrópusambandinu. Til að auka á austurhneigð Sambandsins eru flest nýlöndin á þeim slóðum; Rúmenía, Búlgaría, Króatía.

Norðurslóðir verða áfram nokkurt áhugamál Evrópusambandsins, einkum vegna auðlinda. Auðvelt er að sjá fyrir sér aðstæður þar sem álitamál í norðri væru til úrlausnar á sama tíma og samskipti í austurvegi væru til umfjöllunar. Í norðri og austri er helsti viðsemjandi Evrópusambandsins sá hinn sami; Rússland.

Í hrossakaupum við Rússland, þar sem annars vegar væru auðlindahagsmunir í norðri og hins vegar togstreita í austri, yrðu íslenskir hagsmunir eins og krækiber í helvíti - ef við létum Evrópusambandið um okkar málefni.

Eitt og sér getur fullvalda Ísland tekið þátt í alþjóðlegu samstarfi um norðurslóðir þar sem Bandaríkin, Evrópusambandið, Rússland, Kanada og Noregur eiga aðkomu.

Skattar, fullveldi og réttlæti

Ríkisstjórnin er á dauðastigu hærri skatta, tapaðs fullveldis og réttlætis sem sópað er undir teppið. Utanaðkomandi gætu haldið að ríkisstjórnin reyndi sitt ítrasta til að sýnast óskynsöm, óbilgjörn og ótuktarleg. Og tekst það nokkuð vel.

 

47% skattur á launatekjur?

Launalöggan ASÍ

Alþýðusambandið var einu sinni baráttusamtök launafólks fyrir bættum kjörum. Á síðari árum hagar ASÍ sér oft sem stjórnvald án umboðs. Skrifstofulið ASÍ mótar stefnu í málaflokkum sem ekki endilega koma þeim við og berja á stjórnvöldum að lækka vexti eða ganga í Evrópusambandið, svo að tvö dæmi sé tekin af handahófi.

Eyjan segir frá bloggi Ragnars Þórs Ingólfssonar sem teflir fram upplýsingum að Alþýðusambandið sé orðin að launalöggu sem berji niður umsamdar launahækkanir. 

Möguleg skýring á launalækkunarstefnu ASÍ er að kontóristarnir vilji fyrir hvern mun fækka gjaldþrotum fyrirtækja vegna þess að það muni auka afskriftir lífeyrssjóðanna. ASÍ-elítan mannar lífeyrissjóðina og aukar afskriftir gætu orðið til þess að óþægilegar spurningar vaki um starfshætti elítunnar á útrásartímabilinu.

Pirraður Steingrímur J.

Formaður Vg var áberandi pirraður í Sjónvarpsfréttum fyrr í kvöld þegar hann var spurður hvort þingmenn Vinstri grænna fylktu sér um Icesave-frumvarpið, sem nú kemur fyrir þingið í annað sinn í sérstöku boði Breta og Hollendinga og ríkisstjórnarinnar.

Steingrímur J. var spurður hvort hann hefði alla þingmenn flokksins um borð í málinu og hann kvaðst þreyttur að ræða málið á þessum forsendum.

Auðvitað vill formaðurinn leggja til forsendurnar sjálfur, sem hann og gerði í viðtalinu. Forsendurnar eru þær helst að þetta sé úrvalsgóður samningur sem í einn stað er veðsetning framtíðarkynslóða Íslandsbarna og í annað stað tryggir að Steingrímur J. þarf ekki að segja af sér fyrir stærsta samningaklúður Íslands frá 1262.

Steingrímur J. er leggur framtíð þjóðarinnar að veði fyrir persónulegan frama. Það er dálítið pirrandi að vera minntur á það.

Táknpólitík og athafnastjórnmál

Vinstrimenn eru hallir undir táknpólitík sem gengur út á falleg orð sem tapast einatt í óhönduglegri framkvæmd. Hægrimenn telja athafnir sér til tekna en hættir til að hugsa lítt um afleiðingar framkvæmdanna.

Við þurfum stjórnmál þar sem jafnvægi er á milli yfirvegunar og framkvæmdagleði.