Pólitískur stuðningur við Jón Ásgeir

Baugsfeðgar, Jón Ásgeir og Jóhannes Jónsson, njóta pólitísks stuðnings til að fá afskrifaðar skuldir upp á tugi milljarða króna hjá ríkisbankanum Kaupþing/Arion og halda einokun sinni á matvörumarkaði í gegnum Haga. Frá árinu 2002, þegar Jón Ásgeir eignaðist Fréttablaðið, hefur verið pólitískt og fjárhagslegt bandalag milli Samfylkingar og Baugs.

Baugsfeðgar fjármögnuðu stjórnmálastarf Samfylkingarinnar í gegnum ýmis dótturfélög. Líkur eru á að margir stjórnmálamenn Samfylkingarinnar hafi verið beint á spena Baugs. Á þingi gætti Samfylkingin hagsmuna Baugs. Flokkurinn leiddi andstöðuna við fjölmiðlafrumvarpið veturinn 2004 en þar þótti Baugi vegið að hagsmunum sínum. Í lögreglurannsókn og dómsmálum, Baugsmálum svokölluðum, lögðu frammámenn í Samfylkingunni sig fram um að gera embættismenn tortryggilega og bæta þannig áróðursstöðu Baugs.

Í Evrópumálum er Fréttablaðið einn af fáum bandamönnum Samfylkingarinnar, auk liðhlaupa eins og Þorsteins Pálssonar.

Samfylkingin mun gera sitt ýtrasta til að Baugsfeðgar fái nauðsynlega fyrirgreiðslu hjá Kaupþingi/Arion. Gangi þessar fyrirætlanir fram getur almenningur þakkað  Samfylkingunni að útrásarauðmenn einoki áfram matvörumarkaðinn á Íslandi.

Uppgjöf eða endurreisn

Valið er einfalt. Þeir sem vilja endurreisn íslensks samfélags og telja Ísland ákjósanlegt land að búa í, þeir hafna Samfylkingunni. Þeir sem hafa gefist upp og eru sannfærðir um að íslensk þjóð geti ekki eða kunni ekki að búa Ísland, þeir kjósa Samfylkinguna.

Ísland eða Samfylkingin. Valið er þitt.

Áhlaup á Arion undirbúið

Kaupþing sem nú heitir Arion íhugar alvarlega að gefa eftir tugmilljarðaskuldir Baugsfeðga og leyfa þeim að halda verslunareinokun sinni hér á landi. Fjármálastofnun sem er þess albúin að lýsa yfir stríði á hendur þjóðinni er vitanlega ekki á vetur setjandi.

Viðskiptavinir Kaupþings/Arion loka vitanlega reikningum sínum hjá bankanum og munu krefjast þess að lífeyrissjóðir og aðrir almannasjóðir eigi ekki viðskipti við banka sem leyfir fjármálalegt og siðferðislegt hryðjuverk eins og að afskrifa skuldir Baugsfeðga. 

Í framhaldi verður Kaupþing/Arion lagður af og settur undir Landsbankann. Þar á bæ virðist lágmarkstilfinning fyrir þeirri samfélagslegu kröfu um að útrásarmenn eigi ekki að fá krónu afskrifaða.

Nígeríubréf Glitnis og mannréttindi

Jón Ásgeir Jóhannesson Baugsstjóri sagði það rán þegar ríkið yfirtók 75 prósent af Glitni í lok september á síðasta ári. Útrásarskáldið Hallgrímur Helgason fékk draumfarir sem birtust á netinu um alræði Davíðs Oddssonar á Íslandi og hversu Jón Ásgeir og Glitnismenn áttu bágt.

Áður en vika var úti reynist meint rán vera örlát björgunartilraun á banka sem var margfalt gjaldþrota enda bæði eigendur og stjórnendur fjármálaglópar.

Hlutabréfi í Glitni féllu stórkostlega í verði við yfirtöku ríkisins á 75% eignarhlut í lok september og viku síðar urðu þessi bréf algjörlega verðlaus rétt eins og í hinum bönkunum. Allir máttu vita um áhættuna að kaupa hlutabréf í íslenskum banka. Kaup á hlutabréfum í byrjun október 2008 var hreint glæfraspil.

Samkvæmt auglýsingu í Morgunblaðinu í dag voru þeir töluvert margir sem keyptu í Glitni rétt fyrir þrot bankans í trausti þess að ríkið myndi tryggja verðmæti hlutafjárins. Alls voru 878 viðskipti með Glitnisbréf upp á 3,9  milljarða króna.

Í auglýsingunni segir að í mörgum tilvikum hafi hlutafjárkaupendur tapað öllu sínu sparifé. Þeir ætla að stofna samtök og stefna ríkinu fyrir Mannréttindadómstól Evrópu.

Listin yfir þá sem keyptu Nígeríubréf í Glitni verður vonandi birtur.

Arion safnreikningur útrásar

Á útrásartímanum var til Arion safnreikningur sem var notaður til að fela eignarhald auðmanna. Arion safnreikningur kom fram sem hluthafi í fjölmörgum fyrirtækjum eins og sjá má ef heitið er gúgglað.

Varla er það ætlun Kaupþings að drösla útrásarfortíðinni með sér í framtíðina. Nema, auðvitað, hér sé um óbeina viðurkenningu á því að Kaupþing, afsakið Arion, sé enn í útrás með Högum hans Jóns Ásgeirs Jóhannessonar.

Kaupþing verður Arion banki

Völd og deilur í Samfylkingu

Stundum er deilt innan stjórnmálaflokka um málefni. Á öðrum stundum eru málefni notuð sem yfirvarp fyrir deilur er stafa ef metnaði og persónulegri óvild manna á milli. Samfylkingin var stofnuð á grunni vinstriflokka sem stóðu í illvígum deilum um áratugi, Alþýðubandalags og Alþýðuflokks. Jafnframt voru innanflokksátök einkennandi fyrir flokkstarfið í báðum flokkum.

Á síðasta skeiði A-flokkanna voru það Ólafur Ragnar Grímsson og Svavar Gestsson sem elduðu grátt silfur í Alþýðubandalaginu og Jón Baldvin Hannibalsson og Jóhanna Sigurðardóttir í krataflokknum.

Samfylkingin var stofnuð fyrir tíu árum til á ná völdum. Til að ná völdum þurfti samstöðu og breitt var yfir ágreining, bæði málefnalegan og persónulegan, í nafni sameiginlegs markmiðs.

Völdin eru Samfylkingarinnar. Deilurnar hefjast.

Uppstillingarnefnd vann gegn Össuri og Ástu

Samráðið gegn íslensku bönkunum

Seðlabankar í Evrópu, með þátttöku þess bandaríska, höfðu samráð um að skera á lánalínur til íslensku bankanna og gulltryggðu að Kaupþing, Glitnir og Landsbankinn myndu falla. Styrmir Gunnarsson heldur þessu fram í nýrri bók um hrunið.

Líkur eru að Styrmir hafi rétt fyrir sér. Íslensku bankarnir voru reknir af mönnum sem ekki kunnu undirstöðuatriði alls bankareksturs. Traust á fjármálastofnun þarf að vaxa í réttu hlutfalli við umsvifin. Íslensku bankastrákarnir voru svo einfaldir að halda vöxtur efnahagsreiknings væri upphaf og endir á bankarekstri. Ofgnótt af ódýru lánsfé skóp útrásina. Traust er ekki hægt að fá út á krít. 

Íslensku bankapiltarnir ýmist keyptu eða hótuðu sér til áhrifa á Íslandi. Erlendis komust þeir ekki upp með slíkar starfsaðferðir. Samráðið gegn íslensku bönkunum voru samantekin ráð heilbrigðrar skynsemi gegn kjánum með fullar hendur fjár en lítið rekstrarvit og ekkert siðvit.

Þjóðaratkvæði um Icesave

Icesave-frumvarp ríkisstjórnarinnar ætti að fara fyrir þjóðaratkvæði. Það getur gerst með tvennum hætti. Í fyrsta lagi að ríkisstjórnarmeirihlutinn ákveði að setja málið í þjóðaratkvæði. Í öðru lagi, láti ríkisstjórnin ekki segjast, að forsetinn synji frumvarpinu staðfestingar og fer það þá sjálfkrafa í þjóðaratkvæðagreiðslu - nema að ríkisstjórnin dragi það tilbaka.

Forseti Íslands synjaði fjölmiðlafrumvarpinu staðfestingar fyrir fimm árum. Rökin voru eftirfarandi

Því miður hefur skort samhljóminn sem þarf að vera milli þings og þjóðar í svo mikilvægu máli. Fjölmiðlarnir eru sá hornsteinn í lýðræðisskipan og menningu okkar Íslendinga að ekki er farsælt að varanlega verði djúp gjá milli þingvilja og þjóðarvilja. Slíka gjá þarf að brúa.

Skuldbindingarnar vegna Icesave eru drápsklyfjar komandi kynslóða. Forsetinn getur ekki neitað þjóð sinni sömu afgreiðslu og hann veitt Jóni Ásgeiri Jóhannessyni og Baugi fyrir fimm árum.

 

 

Forsætisráðherra er til

Möskvastærðin ákveðin í Brussel

Á morgun hittast sjávarútvegsráðherrar ESB-ríkjanna til að taka ákvarðanir um möskvastærð, leyfilega lágmarksstærð á lönduðum þorski og margt fleira sem lýtur að rekstri sjávarútvegsstefnu Evrópusambandsins. Ráðherrum þjóðríkjanna og framkvæmdastjórn ESB liggur á að klára málin sem liggja fyrir áður en Lissabon-sáttmálinn tekur gildi 1. desember næst komandi.

Ástæðan? Jú, málin eru nógu flókin eins og þau standa í dag. Hver þjóð er með sinn ,,innkaupalista" sem þarf að semja um við allar hinar þjóðirnar. Eftir 1. desember bætast 736 þingmenn Evrópuþingsins við sem mögulegir þátttakendur í hrossakaupum um sjávarútveg. Lissabon-sáttmálinn gerir ráð fyrir veigameiri hlutverki Evrópuþingsins við mótun sjávarútvegsstefnu.

Umsókn Samfylkingarinnar liggur í Brussel um að Íslendingar fari með fiskveiðistjórnun sína til Evrópusambandsins.

Hérer umfjöllun European Voice um fundinn á morgunn.

Icesave þarf að ræða fram að jólum - hið minnsta

Icesave-frumvarpið er bresk-hollensk blaut tuska framan í andlit þjóðarinnar og það er ríkisstjórnin sem heldur á og neitar að sleppa. Efnahagsleg rök, lagarök og siðferðisrök hníga öll í sömu átt. Ísland á að hafna afarkostum Breta og Hollendinga. Við eigum ekki að samþykkja að ábyrgðin á ónýtu regluverki Evrópusambandinu skuli eingöngu hvíla á öxlum Íslendinga.

Stjórnarandstaðan þarf að ræða Icesave fram að jólum, hið minnsta. Reynslan sýnir að hægt og sígandi rennur upp fyrir ríkisstjórninni að sumu má ekki játast.

Icesave-umræðan hafin