Icesave-samninga verður að fella

Ónýtir samningar um ríkisábyrgð á Icesave-reikningum voru gerðir illskárri með með fyrirvörum Alþingis. Hafni Bretar og Hollendingar fyrirvörum þingsins verður að fella frumvarp ríkisstjórnarinnar um Icesave-samninginn.

Réttarstaða okkar er mun betri en hún var þegar grunnur var lagður að samningunum. Björn Bjarnason segir frá því á heimasíðu sinni í kvöld að ESB hyggst breyta reglum um starfsemi fjármálastofnana sem starfa í tveim eða fleiri löndum. Þar með hefur ESB viðurkennt galla í regluverki sínu. Af því leiðir Íslendingar eigi ekki einir að bera ábyrgð Icesave-klúðrinu.

Icesave-fyrirvörum breytt

Útrásin var glæpamenning sett á stall

Útrásin var kennd við dirfsku, skilvirkar ákvarðanir, hugvit og sigrandi stjórnendamenningu. Í reynd var ofdekruðum,  ofmetnum og ofurgráðugum ungum mönnum sleppt lausum, fyrst á íslenskt efnahagslíf og síðar á evrópska sparifjáreigendur.

Hægt og bítandi kemur í ljós hversu víðtækt svindlið var og hve óforskammaðir auðmennirnir voru. 

Fyrir utan að skilja og læra af útrásarfirringunni þarf samfélagið að ganga milli bols og höfuðs af þeim afgangi útrásarinnar sem enn lætur á sér kræla. Exista, Hagar, 365 miðlar og Geysir Green eru þar á meðal.

Meint allsherjarmisnotkun Kaupþings til saksóknara

Líkur á minnihlutastjórn aukast

Meirihluti þjóðarinnar hafnar Alþjóða gjaldeyrissjóðnum og meirihluti er á móti ríkisábyrgð á Icesave-reikningum. Meirihluti er jafnframt á móti inngöngu í Evrópusambandið. Samfylkingin er með öllu því sem þjóðin er á móti.

Jóhanna Sigurðardóttir nýtur sífellt minna trausts en Steingrímur Jóhann er traustur og stöðugur í mælingum.

Líkur á að minnihlutastjórn Vinstri grænna taki við í haust aukast.

Meirihluti vill segja upp samningi við AGS

Ólafur digri og tapað sjálfstæði Færeyja

Það sama sumar [1024] komu utan af Færeyjum til Noregs að orðsending Ólafs konungs Gilli lögsögumaður, Leifur Össurarson, Þórálfur úr Dímon og margir aðrir bóndasynir.

[...]

En er þeir Færeyingar komu á fund Ólafs konungs þá kallaði hann þá á tal og átti stefnu við þá. Lauk hann þá upp við þá erindi þau er undir bjuggu ferðinni og segir þeim að hann vildi hafa skatt af Færeyjum og það með að Færeyingar skyldu hafa þau lög sem Ólafur konungur setti þeim. 

- Tekið úr Heimskringlu. (Mál og menning, Rvík 1991 bls. 408)

Færeyingarnir játtu Ólafi digra Haraldssyni skatti og löghlýðni. Þeir voru innlimaðir í Noregsveldi tæpum þúsaldarfjórðungi áður en Ísland var tekið yfir af Hákoni konungi. Báðar eyþjóðirnar fylgdu Noregi inn í Kalmarssambandið 1397. Við leiðréttum mistökin 1918 en Færeyingar eiga eftir að klára sín mál.

Alþjóðastjórnmál eru keimlík í dag og þau voru fyrir þúsund árum.

Skrílræði að festa rætur

Ein fegursta hugsjónin hefur á Íslandi fengið ömurlegan málsvara. Fólkið sem þykist berjast fyrir hugsjón mannréttinda þegar það gerir hróp að dómsmálaráðherra og efnir til mótmælastöðu fyrir utan heimili ráðherra er á villigötum.

Það er með öllu ótækt að skrílræði fái það vægi í íslenskri þjóðamálaumræðu að mark sé á því tekið. Viðrinin sem þverbrjóta viðurkennda hegðun í opinberum deilumálum eiga ekki að vera virt viðlits.

Gerðu hróp að ráðherra

Egill er tribúnal

Tribúnal að fornu gat ýmist verið vettvangur til að viðra almenn sjónarmið eða einstaklingur sem talaði fyrir munn margra um opinber álitamál.

Egill Helgason er tribúnal í hvorttveggja merkingunni. Hann talar fyrir munn margra á bloggslóð sinni og vikulegur spjallaþáttur hans er vettvangur umræðu. Athugasemdakerfi bloggsins hans Egils þjónar ekki aðeins hlutverki umræðu heldur líka viðrun á óánægju; þar örlar jafnframt á ódýrri sálarfró sem sumir fá við að skammast.

Margt má segja um Egil og sjálfsagt að láta hann heyra það, líkt og hann lætur aðra finna til tevatnsins.

En það má ekki leggja tribúnal Egils af. Það einfaldlega má ekki.

Morgunblaðið hnerrar, fjölmiðlaheimurinn veikist

Morgunblaðið stýrir íslenskri fjölmiðlaumræðu. Efasemdarmenn um staðhæfinguna ættu að kíkja á fréttina um að viðskiptablaðamenn Morgunblaðsins ætli að hætta á blaðinu og hefja störf á Viðskiptablaðinu.

Nær allar útleggingar ganga út að að þetta sé hnignunarmerki. Enginn virðist tengja að annar nýráðinna ritstjóra Morgunblaðsins er helsti eigandi Viðskiptablaðsins.

Vanheilög þrenning Icesave, AGS og ESB

Vanheilög þrenning Icesave-samnings, Alþjóða gjaldeyrissjóðsins og Evrópusambandsins er dragbítur á endurmat íslensks þjófélags og endurreisnar. Taugaáfall stjórnkerfisins í kjölfar hrunsins leiddi til þess að þetta framandi útlenda húmbúkk þrinnaðist saman í fávísisfeld sem ríkisstjórnin liggur undir og hrærir sig hvergi.

Hér er lausnin í símskeytastíl: Við segjum Bretum og Hollendingum að uppgjör á Icesave-reikningum verði gert þegar búskiptum Landsbankans sáluga er lokið; við segjum upp samkomulaginu við AGS og við drögum umsóknina um aðild að ESB tilbaka.

Þegar húmbúkkið er frá getum við rætt um hvernig þjóðfélag við ætlum að rækta.

Verið að endurmeta lánaþörf Íslands

Hrunstéttirnar þrjár

Starfsstéttir í landinu bera mismikla ábyrgð á hruninu - og sumar alls enga. Þær þrjár stéttir sem afgerandi eiga stærstan þátt í hruninu eru hagfræðingar, lögfræðingar og blaðamenn. Hagfræðingarnir mönnuðu áróðursdeildir bankanna, sem fengu heitið greiningadeildir en stóðu ekki undir nafni. Hagfræðingar í stjórnkerfinu og háskólum ríða ekki feitum hesti frá hruninu. Meðvirkni og sinnuleysi er það skásta sem hægt er að segja um hagfræðiliðið.

Lögfræðingar brugðust algjörlega í eftirliti með viðskiptalífinu almennt og fjármálastofnunum sérstaklega. Lögfræðingar í bankageiranum og á endurskoðunarskrifstofum eru réttnefndir lagatæknar með bága siðferðiskennd og vændishugarfar.

Íslenskir blaðamenn eru á Albaníustigi hvað fagvitund snertir. Allnokkur fjöldi þeirra lærði handverkið í blaðamannaakademíu Baugs þar sem lágkúra og undirlægja voru helstu námsgreinarnar. Blaðamenn, í það stóra og heila, voru gengilbeinur útrásarauðmanna.

Litli Klás gegn Stór-Evrópu

Vaclav Klaus forseti Tékklands neitar að skrifa undir Lissabonsáttmálann fyrr en hann fær tryggingu fyrir því að Súdentaþjóðverjar og afkomendur geti ekki gert kröfu um bætur vegna miska sem þeir urðu fyrir í eftirmálum seinni heimsstyrjaldar. Sáttmálinn verður ekki virkur fyrr en öll 27 aðildarríki Evrópusambandsins samþykkja hann.

Hér tæpir Daniel Hannan  á baráttu Litla Klás við Stór-Evrópu.

Hér er brusselsk pæling um framhaldið.