Afsögn Bjarna og siðferði Kristrúnar

Afsögn Bjarna Benediktssonar fjármálaráðherra vegna álits umboðsmanns alþingis setur ný viðmið í pólitík um hæfi til að fara með opinbert vald. Lykilsetningar í yfirlýsingu Bjarna eru eftirfarandi

Stundum er sagt að lítil þúfa velti þungu hlassi og í þessu tilviki snýst málið um þátttöku eins aðila, sem er mér nákominn, í útboði við sölu Íslandsbanka. Í heild voru þátttakendur í útboðunum tveimur um 24 þúsund.

Það er óumdeilt að ég hafði ekki upplýsingar um þátttöku félagsins. Það kemur mér því verulega á óvart að komist sé að þeirri niðurstöðu að mig hafi brostið hæfi í málinu.

og

Ég vil taka af allan vafa um að ég tel mikilvægt að virða álit Umboðsmanns Alþingis, sem er sérstakur trúnaðarmaður þingsins, þótt ég hafi á því þessar skoðanir. Álit hans er að mig hafi brostið hæfi í málinu. Ég virði þá niðurstöðu.

Stutta útgáfan: faðir Bjarna fjármálaráðherra keypti óverulegan hlut í útboði á hlutfé Íslandsbanka og Bjarni segir af sér.

Kristrún Frostadóttir varð uppvís að skattaundanskoti vegna 100 milljón króna hagnaðar af kauprétti á hlutafé í Kviku banka. Hún hefur þegar játað verknaðinn, en ekki lagt fram nein gögn til að upplýsa málið. Formaður Samfylkingar lítur svo á að skattaundanskot sé einkamál geranda. Þolendur eru íslenskur almenningur, breiðu bökin sem bera þunga skattbyrði. Áður hafði Kristrún þverneitað skattaundanskotum og kallað hagnaðinn ,,lukkupott" sem væri undanþeginn tekjuskatti.

Kristrún segir í viðtengdri frétt að rétt hafi verið af Bjarna að segja af sér. Þar með viðurkennir hún að þegar vafi leikur á siðferðilegri háttsemi stjórnmálamanns eigi viðkomandi að axla ábyrgð. 

Ætlar Kristrún að sitja áfram?

Rétt ákvörðun hjá Bjarna

Perluhöfn og Hamas, pólitík launsáturs

Árás Japana á Perluhöfn 7. desember 1941 breytti gangi seinna stríðs. Bandaríkin hrukku í stríðsgír. Fjórum árum síðar blasti við ósigur Þjóðverja í Evrópu og Japana í Asíu. Árás Japana var úr launsátri og, séð í baksýnisspegli, gerð af sjálfsmorðshvöt. Bandaríkin máttu vita að keisarastjórnin í Tokyo bruggaði launráð.

Árás Hamas á Ísrael sl. laugardag, 7. október, var laumuspil sem enginn átti von á. Það er ráðandi frásögn. Kurlin eru ekki öll komin til grafar. 

Íran er bakhjarl Hamas. Klerkastjórnin í Tehran er umhugað að vinahót Ísrael og Sádí-Arabíu verði ekki að bandalagi. Íranar og Sádar eru keppinautar um valdastöðu í miðausturlöndum. Kína er náinn bandamaður Íran og Rússar eiga í hernaðarsamvinnu við klerkastjórnina. Frá fornu fari eru Sádar skjólstæðiingar Bandaríkjanna þótt heldur hafi kólnað þar á milli.

Viðbrögð Rússa og Kínverja við árásinni á Ísrael eru á sömu lund, tveggja ríkja lausnin. Diplómatískt orðalag um að átökin megi gjarnan dragast á langinn.

Bandaríkin sjá fram á að Úkraína tapi stríðinu við Rússa. Eldglæringar milli Araba og Ísrael gera Úkraínustríðið lítilfjörlegra. Freistandi fyrir Bandaríkin er aðild að ísraelskum sigri. Ófarir í sléttustríðinu falla í skuggann.

Árás Hamas færir Netanjahú forsætisráðherra Ísrael tækifæri til endurnýjunar pólitískra lífdaga. Pólitísk kreppa er viðvarandi í Ísrael síðustu ár. Ekkert sameinar þjóðríki eins og stríð. Gott var á milli Netanjahú og Pútín til skamms tíma. Ísrael studdi ekki Úkraínu með vopnasendingum framan af en mun hafa fyrir þrýsting Bandaríkjanna útvegað Úkraínu skotfæri. Lítil kátína með það í Kreml.

Árásir úr launsátri, þær sem heppnast, t.d. á Perluhöfn, á tvíturnana 11. september 2001 og nú Hamas-árásin, eru rafstuð fyrir þann er fyrir verður. Bandaríkin lögðu upp í stríðsástök í Afganistan, Írak, Libýu og Sýrlandi eftir tvíturnaárásina.

Ísrael gæti, með stuðningi Bandaríkjanna, sett sér stærra markmið en að refsa Hamas. Íran gæti orðið beinn aðili að átökunum, t.d. eftir ísraelska árás.

 

 

 

 

 

 

   

 

„Stofnun Palestínuríkis áreiðanlegasta lausnin“

83 kennarar taka vúdú fram yfir vísindi

Alþjóðadagkennara fimmtudaginn sl. gengu 83 kennarar á Norðurlandi í þjónustu lífsskoðunarfélagsins Samtakanna 78 og losuðu sig við kennara sem ekki skrifaði undir þá skoðun að sum börn séu í röngum líkama. Kennarinn, Helga Dögg Sverrisdóttir, talar fyrir vísindum og viðurkenndri þekkingu. Samtökin 78 og fylgismenn eru iðkendur vúdú-fræða.

Helga Dögg var í fyrra kjörinn formaður Bandalags kennara á Norðausturlandi, BKNE. Formennskan er til tveggja ára í senn. Eftir að Helga Dögg talaði gegn áherslum Samtakanna 78 þótti nauðsynlegt að losna við hana. Rétt fyrir aðalfundinn kom fram tillaga um breytingar á lögum kennarafélagsins, að formaður skyldi kjörinn til eins árs í senn, í stað tveggja áður. Tillagan var samþykkt með 83 atkvæðum, tveir á móti en einn sat hjá. Hallarbylting, segir Akureyri.net.

Vitanlega var engin umræða um málefnið. Það myndi afhjúpa vúdú-ið. Það kom einfaldlega skipun að sunnan að ótækt þótti að Helga Dögg yrði áfram formaður kennarafélags. Út með Helgu Dögg. Kennarar hlýddu. Án umræðu.

Enginn fjölmiðill utan Akureyri.net fjallar um hallarbyltinguna. Allir ganga í takt að þegja um afdrif sjálfstæðrar hugsunar í kennarastéttinni.

Samtökin 78 eru komin í þá stöðu að ráða ráðum kennara, hverjir sitja í trúnaðarstöðum. Fyrir ræður lífsskoðunarfélagið námsefninu er lýtur að líffræði. Ekki skal kenna viðurkennda líffræði, að kynin séu tvö og meðfædd. Hjá lífsskoðunarfélaginu eru kynin fleiri en tvö og hægt er að skipta um kyn í löngufrímínútum.

Yfirlýst markmið Samtakanna 78 er að öllum líði vel - nema þeim sem búa að heilbrigðri skynsemi. Upp á þetta skrifa 83 norðlenskir kennarar og farga eina kennaranum í trúnaðarstöðu sem talar fyrir vísindum og viðurkenndri þekkingu. 

Hamas færir Pútín afmælisgjöf

Pútín átti afmæli í gær. Árás Hamas á Ísrael er afmælisgjöf múslímaheimsins til forseta Rússlands. Afmælisgjöfin færir Rússum sigurstöðu í Úkraínu.

Dálítið langsótt, ekki satt? Kannski.

Árás Hamas á Ísrael setur þjóðríki eftirlifenda helfararinnar í mesta hættu í hálfa öld, frá Yom Kippur-stríðinu 1973, sem, raunar, hófst 6. október. Ekki aðeins eldflaugaárásir heldur sækja Hamasliðar inn á ísraelskt land. Götubardagar eru í þorpum í Suður-Ísrael þar sem m.a. lögreglustöð var hertekin. Gíslar teknir og færðir á Gaza-ströndina.

Árásin er víðtæk sem þýðir að undirbúningurinn stóð marga mánuði. Hamas er ekki í stakk búið að fjármagna og skipuleggja árásina án utanaðkomandi stuðnings. Helsti bakhjarl Hamas er klerkastjórnin í Íran, sem á náið hernaðarsamstarf við Rússa.

Ísrael er vestrænt verkefni í miðausturlöndum í siðferðislegum, trúarlegum, sögulegum, menningarlegum og efnahagslegum skilningi. Án vestræns stuðnings ekkert Ísrael. Punktur.

Úkraínu er haldið uppi af vestrinu. Ef ekki væri fyrir vestræn hergögn og fjármagn hefðu Rússar sigrað Úkraínu á nokkrum mánuðum. Nú þegar er taugaveiklun í Kænugarði um framhald bandarískrar aðstoðar í ljósi deilna á bandaríska þinginu um fjárlög.

Með árás Hamas á Ísrael er barist um vestrænan stuðning á tvennum vígstöðvum. Vestrið er ekki í færum að halda uppi tveimur skjólstæðingum í stríði, sem báðir eru þungir á fóðrum.

Vestrið tekur Ísrael alltaf fram yfir Úkraínu. Ef Rússar sigra fær úkraínska þjóðin frið. Ef Hamas-Íran bandalagið sigrar hefst seinni hálfleikur helfararinnar.

Eina von Úkraínu er að stríð Ísrael við Hamas standi stutt yfir. Yom Kippur 1973 stóð í tæpar þrjár viku og stríðið 1967 í sex daga. Árásin í gær er hernaðarlegur og pólitískur ósigur fyrir Ísraela. Hæpið er að nokkrir dagar nægi til að rétta hlut stjórnarinnar í Jerúsalem. Frekar vikur ef ekki mánuðir.

Stuðningur við Úkraínu dofnar undanfarið. Ef mál skipast þannig að spurt verði hvort eigi fremur að senda dollara og evrur til Kænugarðs eða Jerúsalem er fyrsti, annar og þriðji kosturinn borg frelsarans.

Hamas er skæruliðahópur og stenst Ísraelsher ekki snúning á vígvellinum. En það er ekki barist á sléttum líkt og í Garðaríki heldur einu þéttbýlasta svæði jarðarinnar, Gaza-ströndinni. Sjálfkrafa verður blóðtollur almennra borgara hár. Það veit á stigmögnun átaka. Enn er Vesturbakkinn, hin meginbyggð Palestínumanna í Landinu helga, til friðs. Mögulega ekki lengi.

Gerði Pútín samkomulag við Hamas með milligöngu Írans? Ómögulegt að segja og yrði seint eða aldrei sannað. Víst er að Rússar eru í þann veginn að hefja aðgerðir í Úkraínu sem þeir binda vonir að greiði stjórninni í Kænugarði nægilega þungt högg til að hún riði til falls. Þurrð á vestrænum stuðningi gæti gert útslagið. Ótti um stöðu Ísraels auðveldar hálfvolgum í Úkraínutrúnni að stökkva á Jerúsalemvagninn. Það fara ekki tveir fullir vagnar af aðstoð til Garðaríkis og Landsins helga. Annar verður tómur.

Hamas-árásina á afmælisdegi Pútín má skýra sem tilviljun. Líkt og hrap flugvélar Prigsósjín.

 

Yfirlýsing um hernaðaraðstoð væntanleg

Þórður Snær gagnrýnir frekjuvald Sigríðar Daggar

Sigríður Dögg Auðunsdóttir fréttamaður RÚV og formaður Blaðamannafélags Íslands sveik undan skatti tekjur sem hún hafði af Airbnb-útleigu. Starfsemin var víðtæk. Sigríður Dögg leigði út fjórar íbúðir á Suðurgötu 8 í miðbænum. Samtals voru 8 svefnherbergi í íbúðunum fjórum með svefnplássi fyrir 28 manns. Miðað við umfangið er líklegt undanskotin hafi numið um eða yfir 100 milljónum króna.

Sigríður Dögg játaði skattsvikin í færslu á Facebook 11. september. Hún sagði:

Við hjónin fengum endurálagningu opinberra gjalda vegna útleigutekna fyrir nokkrum árum og greiddum þá skatta.

Síðan er liðinn nær mánuður. Ekki hefur Sigríður Dögg svarað fjölda fyrirspurna um að útskýra nánar umfang og eðli skattsvikanna, hvað þau náðu yfir langan tíma, hvaða fjárhæðir var um að ræða og í hverju ,,endurálagning" skattsins fólst. Blaðamenn hafa látið gott heita að formaður stéttafélags þeirra og fréttamaður á RÚV neiti að veita upplýsingar um skattsvikin.

Þórður Snær Júlíusson ritstjóri Heimildarinnar, sem sjálfur er sakborningur og nýtur friðhelgi fjölmiðla, gagnrýnir Sigríði Dögg harkalega í leiðara sem birtist í gær. Leiðarinn fjallar um frekjurnar í samfélaginu sem komast upp með að svipta aðra frelsi og lífsgæðum í krafti stöðu sinnar sem stjórnendur umræðunnar. Þórður Snær nefnir ekki Sigríði Dögg á nafn en segir um mál formanns Blaðamannafélags Íslands:

Embætti skattrannsóknarstjóra var lagt niður og gert að skúffudeild hjá Skattinum. Nú semja menn frelsisins sig bara frá því þegar skattsvik uppgötvast í stað þess að verða ákærðir.

Það var einmitt það sem Sigríður Dögg gerði. Hún slapp við ákæru, sem aðrir sættu fyrir sambærileg skattsvik. Í krafti þess að vera fréttamaður á RÚV og formaður Blaðamannafélags Íslands býr Sigríður Dögg að umtalsverðu frekjuvaldi í samfélaginu. Frekjuvaldið nýtti hún sér til að komast undan opinberri ákæru fyrir skattsvik. Opinbert sakamál var gert að einkamáli sem mátti fela fyrir almenningi. Sigríður Dögg fær laun frá skattborgurum en var staðin að verki að stela undan skatti. Hrokinn er öllum augljós.

Óneitanlega slær Þórður Snær nýjan tón í umræðunni um stöðu blaðamanna og fjölmiðla. Hann viðurkennir að blaðamenn hafi beitt stöðu sinni til persónulegs ávinnings á kostnað almannahagsmuna. Ekki alveg kominn þangað að játa að sumir blaðamenn eru réttir og sléttir afbrotamenn. Það væri eins og að nefna snöru í hengds manns húsi Heimildarinnar.

Þórður Snær er sem sagt ekki líklegur til að leiða siðbótarhreyfingu blaðamanna. Sjálfur er hann sakborningur í lögreglurannsókn á alvarlegum glæpum; byrlun, gagnastuldi og broti á friðhelgi einkalífs. En um ritstjóra Heimildarinnar má segja að stundum ratast kjöftugum satt orð í munn.

Karlar og konur, vísindi og vúdú

Í vísindalegum skilningi er maðurinn kjöthlunkur með meðvitund. Þyngd skrokksins er oft á bilinu 60 til 100 kg. Meðvitundina er ekki hægt að mæla, aðeins hvort það sé kveikt eða slökkt á henni.

Fæstir tala um manninn á ofangreindan hátt. Það er ómennskt, líkt og maðurinn væri ekkert annað en skrokkur á færibandi sem gerir kjöt hæft til neyslu.

Frá örófi alda kemur maðurinn sér upp trúarsetningum um að hann sé sérstakur, eigi eilíft líf. Það er huggulegra á göngunni um táradal jarðvistarinnar að njóta þeirrar fullvissu að meðvitundin, ég-ið í manninum, fái vísan samastað í eilífðinni.

Vísindin hafa, á síðustu 150 árum eða svo, kippt stoðunum undan eilífðartrúnni. Vísindin, er okkur sagt, útskýra raunveruleikann. Í þeim veruleika er ekkert rými fyrir eilífðina. Ekki einu sinni er sólkerfið okkar eilífðarvél. Það varð til í miklahvelli og mun farast í svartholi.

Sumar staðreyndir mennskunnar glötuðust á vegferð mannsins frá trúarheimi til vísinda. Forsætisráðherrann í landi Newton, þess sem útskýrði gang himintungla með þyngdarlögmálinu, varð að nota dýrmætan tíma í ræðu, sem sker úr um pólitíska framtíð hans, til að segja þetta:

Karl­maður er karl­maður og kona er kona. Þetta er bara heil­brigð skyn­semi

Einkenni heilbrigðrar skynsemi er að hana á ekki að þurfa að segja upphátt. Heilbrigðið felst í að allar skynsamar mannverur vita hvers kyns er. Ekki lengur.

Á dögum Newton sáu karlmenn um vísindi, sem voru nördaiðja. Ármenn vísinda juku skilning og efldu hagsæld. Nýjar vísindagreinar hrærðu aftur saman draumórum og fræðum og settu sér önnur markmið en skilning og farsæld. Lofuðu öllu fögru en leiddu af sér efnislega og andlega örbirgð. í stað þess að skilja heiminn var verkefnið að breyta henni veröld.

Stórbrotnar samfélagstilraunir 1917-1991, kenndar við sósíalisma, skiluðu eymd og volæði. Vinstrimenn snéru sér þá að tilraun til að breyta manninum, aðskilja hann frá heilbrigðri skynsemi. Háskólar tóku að kenna vúdú hugmyndir um að maðurinn gæti verið allt sem hann ímyndaði sér. Ímyndun kom í stað eilífðarinnar fyrrum. Snjall leikur þar sem ímyndun og eilífð eiga það sameignlegt að vera án takmarkana.

Vúdú-ið er tveggja stofna. Í fyrsta lagi algild mannréttindi, ég á mig sjálfur og má gera það sem ég vil. Í öðru lagi það innsæi, ættað frá franska heimspekingnum Descartes, að hver meðvitund er heimur út af fyrir sig. Cogito ergo sum. Ég hugsa, ég er. Stofnarnir eru hvor um sig gildir og góðir, að gefnum hlutlægum veruleika utan vitundarinnar. En sá hluti jöfnunnar er terroriseraður í burtu. Það eru aðeins réttindi og ímyndun, enginn hlutveruleiki. Eftirfarandi gildir:

Mín mannréttindi og mín ímyndun gefa mér fulla heimild að skilgreina sjálfan mig sem tannbursta, bókahillu eða páfagauk. Ég þarf ekki að vísa í hlutlægan veruleika, aðeins mína hugsun sem stendur ofar efnisveruleikanum. Skothelt. Enginn skal efast um sjálfsvitund mína og spyrja hvort í henni búi minnsti vottur heilbrigðrar skynsemi. Það væri hatursorðræða og mannréttindabrot. 

Vúdú-ið breytir heiminum eins og við þekkjum hann. Samsuðan brýtur undir sig almannaróm, breytir tungumálinu og í framhaldi hugsuninni. Kvennafrídagurinn eftir tvær vikur er kynntur sem kvenna- og kvárdagur. Kvár mun vísa í mann sem segist hvorugkyn, líklega þá án kynama. Fyrir vúdú var viðkomandi karl eða kona. Þegar heilbrigð skynsemi hverfur yfirtaka öfgarnar mannlífið. Vitanlega í nafni mannréttinda.

„Karlmaður er karlmaður og kona er kona“

Sigurvissir Rússar í Úkraínu

Forsetakosningar verða í Rússlandi í mars á næsta ári. Líklegt er Pútín standi til endurkjörs. Við þær aðstæður reynda valdamenn að rugga ekki bátnum, skapa ekki óánægju með almennings. Frá 2022 í febrúar standa Rússar fyrir hernaði í Úkraínu, til að koma í veg fyrir nágranninn verði Nató-ríki og ógni öryggishagsmunum Rússlands.

Til að heyja stríð þarf mannskap. Allsherjarherkvaðning á rússneskum körlum á herskyldualdri stendur ekki fyrir dyrum. Herkvaðning ylli óróa í samfélaginu. Tilfellið virðist að nægilega margir rússneskir karlar gefa sig fram til herþjónustu og þiggja laun fyrir.

Úkraínumenn hófu sókn 4. júní með það markmið að knýja Rússa til uppgjafir í Krím og hverfa þaðan á brott. Sóknin misheppnaðist.

Giskað er á að Úkraínumenn hafi misst 250 til 500 þús. fallna frá febrúar í fyrra. Mannfall Rússa er líklega minna, kannski helmingurinn. Óvígir vegna sára eru sennilega tvisvar til þrisvar fleiri en fallnir. Rússar eru 140 milljón manna þjóð en Úkraínumenn voru um 40 milljónir í upphafi átaka. Rússar eru að stærstum hluta sjálfum sér nógir með herbúnað en fá stuðning frá Kína, Íran (drónar) og sennilega Norður-Kóreu (skotfæri).

Vegna misheppnaðrar sumarsóknar og gríðarlegs mannfalls ber á stríðsþreytu hjá vestrænum bakhjörlum Selenskí forseta. Vestrið, Bandaríkin sérstaklega, halda uppi úkraínska ríkinu og skaffa nær öll vopn, skotfæri og önnur hergögn. Úkraínumenn útvega fallbyssufóðrið, menn til að deyja á vígvellinum.

Rússar eru í færum að herja á nær alla Úkraínu með langdrægum vopnum og geta ráðist á skotmörk s.s. þjálfunarbúðir, verksmiðjur og vopnabirgðir. Úkraínumenn ná að skjóta á landamærahéruðin en allt bakland Rússa er úr skotfæri.

Vestrið veðjaði á að vestræn hátækivopn og viðskiptaþvinganir myndu knýja Rússa til eftirgjafar ef ekki uppgjafar. Hvorugt hefur gengið eftir. Efnahagskerfið í Rússlandi er í þokkalegu standi og betra en víða í Vestur-Evrópu. Vígvallarátök síðustu vikna og mánaða gefa fremur til kynna rússneskt frumkvæði en úkraínskt.

Stríð eru ávallt með innbyggðan ófyrirsjáanleika. Sá sem stendur höllum fæti getur með heppni og/eða snjallri hertækni unnið sigur í afgerandi orustu. Siðferðilegt þrek hermanna er með ýmsu móti sem áhrif hefur á hve bardagafúsir þeir eru. Þótt fréttir séu af liðhlaupi í báðum herjum er ekki hægt að slá föstu hvoru megin bardagaviljainn sé meiri.  

Eftir því sem líður á stríðið, það verður tveggja ára í febrúar, minnka líkur á ófyrirséðum atvikum er kynnu að breyta stríðsgæfunni. Stríðsaðilar eru komnir í æfingu að drepa hvorn annan, kunna skil á taktík andstæðingsins.

Rússar gefa út að kostir Úkraínu séu aðeins tveir. Leggja niður vopn og semja frið á rússneskum forsendum eða að Úkraína verði afmáð sem ríki. Digurbarkalega mælt.

Einhver efi er komin í vestrið. Economist spurði nýlega hvort það færi sömu leið og Róm. Stríðið í Úkraínu er ekki staðbundin átök slavneskra bræðraþjóða. Meira hangir á spýtunni.  

 

Skutu niður 29 dróna og eitt flugskeyti

Meðvitundin er kynlaus, líkaminn ekki

Nýburi er með líkamlegt kyn, annað tveggja sveinbarn eða meybarn. Nýfætt barn er einnig með meðvitund, sé það ekki andvana.

Meðvitund er huglægur þáttur heilastarfseminnar. Læknavísindin vita ekki tenginguna þar á milli. Vita þó að hvorugt getur án hins verið; meðvitund þarf heila og heili í vakandi ástandi er með meðvitund.

Ólíkt líkamanum er meðvitundin kynlaus. Það leiðir af sjálfu sér. Meðvitundin er óefnislegur þáttur heilastarfseminnar. Það sem er huglægt getur ekki haft líffræðilegan eiginleika á borð við kyn. Ekki frekar en að tilfinningar eins og ást, hatur, afbrýði og góðvild séu af öðru hvoru kyninu. Tilfinningar, sem slíkar, eru kynlausar. Líkt og meðvitundin.

Flestir ganga að kyni sínu vísu enda er það meðfætt. Fáeinir ímynda sér að hafa meðvitund af öðru kyni en líkaminn er. Ímyndun fárra breytir ekki hörðum staðreyndum lífsins. Kyn er hlutlægt og áþreifanlegt. Meðvitundin er huglæg en ekki efnisleg og þar af leiðandi kynlaus. 

Fyrst hlýnar, síðan hækkar CO2

Nýjar rannsóknir staðfesta að koltvísýringur, CO2, orsakar ekki hitahækkun. Orsakasamhengið er öfugt: hitahækkun veldur hækkun koltvísýrings í andrúmslofti. Almenningur getur með góðri samvisku ekið fjölskyldubílnum þótt hann sé knúinn bensín eða dísil - og sleppt kaupum á rándýrum rafmagnsbílum sem illa þola bleytu og kulda. Góðar fréttir á ísa köldu landi. 

Greint er frá vísindagreinum sem staðfesta ofanritað á heimasíðu loftslagsvísindamannsins Judith Curry, Climate etc,  annars vegar og hins vegar Watts up with that. 

Tvær tilvitnanir úr umfjölluninni:

Niðurstöðurnar eru skýrar: breytingarnar á CO2 geta ekki orsakað hitabreytingar. Þvert á móti, breytingar á hita eru líklegar ástæður breytinga á CO2 hvort heldur í nútíma eða fortíð.

og

Raunar er maðurinn aðeins ábyrgur fyrir 4% af heildarlosun koltvísýrings út í andrúmsloftið. Náttúruleg losun er ráðandi og eykst þrisvar sinnum hraðar en losun af mannavöldum, einmitt vegna hærri hitastigs.

Náttúran losar sem sagt 96 prósent af öllum koltvísýringi í andrúmsloftinu. Jörðin grænkar þar sem koltvísýringur er aðalfæða plantna. Á norðurhveli jarðar, þar sem mesti landmassinn er, taka plöntur koltvísýring úr andrúmsloftinu á sumrin. Á haustin og yfir veturinn losnar koltvísýringur út í andrúmsloftið þegar lauf falla og rotna. Er jörðin grænkar kemst meiri koltvísýringur í umferð. Úthöfin taka bæði við koltvísýringi og anda frá sér lofttegundinni.

Í framtíðinni verður ráðgáta hvernig Gore, Grétu og öðrum ólæsum á vísindi og náttúru tókst að að hræða líftóruna úr fólki með falsfræðum um að maðurinn ylli loftslagsbreytingum. Það er löngu þekkt staðreynd að mannlegar athafnir standa aðeins í ábyrgð fyrir 4%, segi og skrifa fjögur prósent, af koltvísýringi andrúmsloftsins. Náttúran sér um 96%.

Ef koltvísýringur takmarkar útgeislun hita jarðarinnar, samkvæmt gróðurhúsakenningunni, þá er það náttúran sjálf sem er að verki. En nú getum við urðað bábiljuna. Hitabreytingar koma á undan og orsaka hækkun koltvísýrings. 

Vegna ágengra falsspámanna síðustu ára tekur tíma að vinda ofan af vitleysunni. En skriftin er á veggnum. Gengi falsspámanna er boða loftslagsbábiljur fellur hratt.

Hatursglæpur Samtakanna 78

Þriðjudagskvöld í síðustu viku var kærð árás á útlendan mann í miðborg Reykjavíkur. Framkvæmdastjóri Samtakanna 78 sagði á RÚV að um væri að ræða hatursglæp. Maðurinn hafði verið á ráðstefnu samtakanna fyrr um kvöldið.

Lögreglan staðfestir kæruna og kannar hvort um hatursglæp hafi verið að ræða. Ekki er auglýst eftir vitnum en vefmyndavélar skoðaðar án frekari frétta. Miðborgin er vanalega mannmörg á þessum tíma dags og ber þar meira á útlendingum en heimamönnum. Meint hatur gæti verið fóstrað annars staðar í heiminum en á Fróni.

Framkvæmdastjóri Samtakanna 78 sagðist finna til ótta í viðtali við Morgunblaðið, tveim dögum eftir kærða árás. Framkvæmdastjórinn átti fund, bæði með dómsmálaráðherra og forsætisráðherra um öryggismál félagsmanna samtakanna. Jafnframt kemur fram í viðtalinu að þolandi hafi haldið heim á leið þá um morguninn, hálfum öðrum sólarhring eftir atvikið. Ekki eru nánari fréttir að hafa um miska. Merkilegt í ljósi þess að Samtökin 78 stóðu fyrir víðtæku upplýsingaflæði um kærða árás. Var kannski markmiðið að valda ótta og óreiðu fremur en að birta hlutlægar og sannar fréttir af málsatvikum? Víst er að fjölmiðlar éta allt hrátt sem frá samtökunum kemur og spyrja ekki nánar út í efnisatriði.

Á alþingi voru öryggismál félagsmanna Samtakanna 78 rædd og fordæmt að þeir geti ekki um frjálst höfuð strokið í íslenska haturssamfélaginu. Ráðherra kvaðst ,,svolítið hræddur" um líf og limi. Allt þetta vegna atviks sem enn er á huldu hvernig bar að og með hvaða afleiðingum. Enginn er grunaður;  málið er á frumstigi rannsóknar. En ekki skortir stórkarlalegar yfirlýsingar, m.a. frá forsætisráðherra, sem gerir sér far um að ala á ótta og öryggisleysi og ásaka almenning um ofstæki.

Ekki fá allir sérmeðferð ráðherra, þingmanna og fjölmiðla.

Kona varð fyrir hrottalegri líkamsárás um helgina í miðborg Reykjavíkur, að talið var. Síðar kom á daginn einhver rafhjólaði á konuna og skildi hana eftir liggjandi í blóði sínu. Engin samtök taka málstað konunnar, ekki verður þingfundur um líkamsmeiðingarnar. Ráðherrar koma ekki fram í fjölmiðlum til að fordæma og heimfæra upp á gerandann illar hvatir. Mynd af konunni sýnir að hún bar kristið trúartákn, krossinn. Ekki er talað um hatur og ofsóknir í samhengi við atvikið. Konan er þriggja barna móðir og tilheyrir ekki forréttindastétt.