Speki Ingveldar og SpKef

Peningar eru ávísun á verðmæti, er okkur kennt. Lexía sem við erum að læra eftir hrun er að peningar eyða verðmætum sem við getum illa verið án. Sparisjóður Keflavíkur var lengi í rauðu skeljasandshúsi við Suðurgötu, skáhallt á móti barnaskólanum með skrúðgarðinn á milli. Ingveldur kennari sagði stundum sögur af nemendum sem sóttu um lán hjá sparisjóðsstjóranum sem var líka kennari. Forsjárhyggjan var klædd föðurlegri umhyggju. Sparisjóðsstjórinn lánaði síður þeim sem hann þekkti sem hyskna stráka en prúðum stúlkum.

Ingveldur kenndi að maður fíflaðist ekki peninga. Lán sem maður tók þurfti að borga tilbaka með vöxtum. Skilvísi, ábyrgð og ráðdeild voru barnaskólanemum framandi orð en merkingin á bakvið orðin lærðist. Þeir lærðu af sögum Ingveldar að óvarkár umgengni við peninga var löstur.

Lærdómur Ingveldar lifði af verðbólguárin á áttunda og níunda áratug síðustu aldar. Sparisjóður Keflavíkur óx og dafnaði og lagði undir sig nágrannasveitarfélög. Um aldamótin var aftur komið nýtt hljóð í strokkinn. Févæðing allra verðmæta samfélagins fór eins og eldur í sinu og brenndi upp gamlar kerlingabækur um ábyrgð og ráðdeild. Sparisjóðurinn fékk nýtt nafn, SpKef, og nú skyldi sótt á fjarlæg mið. Skálkum, einkum í frændgarði og vinahópi yfirmanna sparisjóðsins, var lánað útá ónýt veð. Þegar fárinu lauk var SpKef gjaldþrota fjármálastofnun í gjaldþrota sveitarfélagi.

Speki Ingveldar fær endurnýjun lífdaga enda geymir hún sígild verðmæti. Sparisjóður Keflavíkur nýtur þeirra ekki enda orðinn að skúffu í útibúi Landsbankans í Reykjanesbæ.

 

Innlán verði færð til NBI

Besti flokkurinn leggur menntun í einelti

Besti flokkurinn er skipaður yfirlýstum fíflum sem lofuðu að svíkja kosningaloforð framboðsins. Frambjóðendur Besta flokksins eru aular sem duttu snemma úr skóla en einhverjir sóttu menntun sína til Núps í Dýrafirði þangað sem óalandi og óferjandi imbar voru tíðum sendir ef ekki á Reykjanes við Ísafjarðardjúp sem hýsti álíka safn.

Besti flokkurinn er gegnsósa vanmetafyrirlitningu á menntun. Herför Jóns Gnarr borgarstjóra gegn grunnskólum Reykjavíkur er í samræmi við andúð hans og félaganna á öllu sem ber keim menntunar. Eðlilega ber imbaframboðið þá leyndu ósk í brjósti sér að almenningur haldi eðjótana til eftirbreytni.  Reykvískt barn hlýtur að líta á borgarstjóra sem fyrirmynd, er ekki svo?

Besti flokkurinn er í boði reykvískra kjósenda og Samfylkingarinnar.

Krata-Eyjan endurnýtir fólk

Krata-Eyjan sem eins og Samfylkingin er komin á framfæri auðmanna stríðir við trúverðugleikavanda. Fjölmargir pistlahöfundar yfirgáfu Eyjuna þegar hún gekk fyrir auðmannabjörg. Nýr ritstjóri sér þann kost vænstan að nota herfræði aðildarsinna sem eru snillingar að endurnýta félagsmenn með því að stofna stöðugt ný samtök utan um sama minnihlutahópinn.

Krata-Eyjan tilkynnir á forsíðu að ,,nýir" pistlahöfundar séu gengnir til liðs við sökkvandi skipið og eru þar þekktir samstarfsmenn ritstjórans Karls Th. Birgissonar af kratamálgagninu Herðubreið: Jón Daníelsson og Vilhjálmur Þorsteinsson. Til að dylja krataslagsíðuna eru fulltrúar frá Besta flokknum, Sjálfstæðisflokknum og Framsóknarflokknum meðal ,,nýrra" pistlahöfunda.

Viðsjár eru framundan í pólitík og atvinnulífi og eflaust mun Krata-Eyjan gagnast húsbændum sínum vel. 

Bresk Icesave-aðför fær stuðning ríkisstjórnar Íslands

Bretar kröfðust íslenskrar ríkisábyrgðar á Icesave-innlánum Landsbankans í Bretlandi, samkvæmt fyrrum bankastjóra Landsbankans. Þáverandi ríkisstjórn Geirs H. Haarde féllst ekki á að íslenskur almenningur ætti að ábyrgjast starfsemi einkabanka.

Bankakerfið á Íslandi hrundi í október 2009. Vorið eftir kemst til valda hér á landi vinstristjórn sem ólm vill leggja þær kvaðir á þjóðina sem fyrri ríkisstjórn hafnaði.

Ríkisstjórn Jóhönnu Sigurðardóttir sýnir sig viljugt verkfæri breskra hagsmuna gegn almannahag á Íslandi.

Þökk sé forsetanum er löggjafavaldið í höndum þjóðarinnar. Notum það til að segja Nei þann 9. apríl

Voru að reyna að knýja fram ríkisábyrgð

Samið á hnjánum í ESB-viðræðum

Samninganefnd Íslands ætlar ekki að halda fram tilmælum utanríkismálanefndar alþingis í aðildarviðræðum við Evrópusambandið um að við höldum forræði okkar í sjávarútvegsmálum. Í greinargerð samninganefndarinnar vegna fundar um sjávarútvegsmál segir ,,að íslensk lög og reglur um sjávarútveg stangast í veigamiklum atriðum á við" sjávarútvegsstefnu Evrópusambandsins. Heildarafli á Íslandsmiðum yrði ákveðinn í Brussel, samningsumboð við önnur ríki um deilistofna færi til ESB og engar hömlur yrðu á erlendar fjárfestingar í útgerð og vinnslu.

Umboðið sem utanríkisráðuneytið fékk frá alþingi var skilyrt. Samninganefnd Íslands ætlar ekki að fylgja skilyrðum alþingis þar sem viðræðurnar myndu við það steyta á skeri. Orðrétt segir í greinargerðinni 

Tilmæli meirihluta utanríkismálanefndar Alþingis lúta að grundvallaratriðum og er því ekki talið rétt að gera fyrirvara við einstakar gerðir löggjafar ESB eða hluta þeirra að svo stöddu.

Klækir af þessum toga eru þekktir í sögunni. Íslendingar gerðu á 13. öld sáttmála við Noregskonung um að gangast konungi á hönd en að uppfylltum skilyrðum, til dæmis að halda íslenskum lögum. Nokkrum árum síðar kom hingað sendimaður, Loðinn Leppur, og vildi að Íslendingar játuðust lögum konungs. Þegar landinn þumbaðist við sagði Loðinn Leppur að búkarlar ættu ekki að gera sig digra, þeir áttu ,,fyrst að já bókinni og biðja síðan miskunnar um þá hluti sem nauðsyn þætti til standa, konunginn og hans ráð," eins og segir í sögu Árna biskups Þorlákssonar.

Össur og menn hans í utanríkisráðuneytinu vilja að við samþykkjum fyrst forræði Evrópusambandsins í okkar málum en förum síðan á hnjánum til Brussel og biðjum um undanþágu. Samningar á hnjánum gáfu ekki góða raun á 13. öld og eru ekki vænlegir til árangurs á þeirri 21. 

 

Karl Th. boðar atvinnubann

Ritstjóri Eyjunnar, Karl Th. Birgisson, birtir orð á götunni vegna bloggs um tjáningarfrelsið. Karl Th. segir að þeir sem hafi aðrar skoðanir en hann á tjáningarfrelsinu eigi ekki að hafa vinnu og alls ekki hjá Heimssýn.

Karl Th. tilheyrir vinstrielítunni sem fer með völdin í landinu. Upplýsandi er hvernig völdin gera vinstrimenn að ofstækisfólki sem líður engar aðrar skoðanir en sannan rétttrúnað.

Hugleysið sem felst í að birta ásakanir undir nafnlausum dálkum og sleppa tilvísunum í heimildir er aftur á móti þekkt í kimum múgræðisins sem Karl Th. er verðugur fulltrúi fyrir.

Ekta fábjána á alþing

Á miðöldum spegluðu evrópskir furstar sig í hirðfíflum. Á Íslandi á 21. öld speglar íslenska stjórnmálaelítan sig í Besta flokkinum. Hvað sem segja má á um fábjánahjörðina þjónar hún göfugu markmiði.

Yfirfíflinu þrýtur vonandi ekki örendið áður en kemur að þingkosningum.

Besti flokkurinn á landsvísu

Bankarnir bjarga sér, aðrir tapa

Bankarnir stjórnuðu atvinnulífinu á tímum útrásar enda hreiðruðu helstu útrásarauðmennirnir um sig í Landsbanka, Glitni og Kaupþingi. Eftir hrun breyttist margt en þó ekki yfirvald bankanna yfir atvinnulífinu. Skuggastjórnendur bankanna eru í dag leynieigendur þeirra. Ábyrgð verður ekki komið við þar sem ríkisvaldið leyfir að máð sé yfir nafn og númer eigendanna.

Ákvarðanir í bankakerfinu ráða miklu um þróun atvinnulífsins á næstu árum. Bankarnir hugsa fyrst og fremst um eigin hag og eigendanna. Ónýtum rekstri er haldið gangandi til að sverta ekki bækur bankanna með afskriftum. Bankarnir eiga ógrynni húsnæðis sem þeir leigja undir lágmarkskostnaði og það setur aðra á hausinn.

Alþingi þarf að grípa í taumana og setja lög sem banna leynd á eigendum banka.

Jesú-komplexar Steingríms J. og kjördæmahagsmunir

Fjármálaráðherra er maður með Jesú-komplexa. Þegar hann afgreiddi verstu lög lýðveldissögunnar, Icesave II, sagðist hann ætla sjá til þess að þjóðarbúið stæði undir manndrápsklyfjunum á ,,meðan lífsandinn höktir í nösum mér." Stjórnmálamaður sem talar á þennan veg sér ekki þjóðina lifa án sín.

Það sem heldur lífi í stjórnmálamanninum Steingrími J. eru atkvæðin sem hann nurlar saman í kjördæminu sínu. Þar hefur fjármálaráðherra sýnt sig einstaklega örlátan mann hvort heldur sé um að ræða uppgjör vegna unglingaheimilis, lánafyrirgreiðslu til Saga Capital og umhyggju fyrir Sparisjóði Þórshafnar.

Stjórnmálamaður sem aðeins er með annan fótinn í heimi raunveruleikans á auðvelt með að sannfæra sjálfan sig að kjördæmahagsmunir gangi fyrir þjóðarhagsmunum.

 

Björgun Saga Capital mjög skrýtin

Leynieigendur bankanna stjórna atvinnulífinu

Vigdís Hauksdóttir þingmaður Framsóknarflokksins afhjúpaði svarthol endurreista atvinnulífsins á Íslandi: allir vita að bankarnir stjórna atvinnulífinu, ýmist með beinu eignarhaldi eða lánafyrirgreiðslu, en enginn veit hver á bankana. Vigdís beindi fyrirspurn til fjármálaráðherra en fékk engin svör. 

Bankarnir lutu forræði gegnheilla siðleysingja á tímum útrásar og ekki hefur frést af endurhæfingu stjórnendanna þar. Þeir lúta í dag eignarhaldi leynieigenda og ríkisstjórnin gerir nákvæmlega ekkert til að upplýsa okkur um hverjir stjórn atvinnulífinu í gegnum eignarhaldið á bönkunum.

Alþingi á ekki að láta bjóða sér þetta ástanda lengur. Þingmenn eiga að leggja fram lagafrumvarp sem segir að fjármálastofnanir sem hyggjast starfa hér á landi þurfi að gefa upp nafn og kennitölu eigenda sinna. Að öðrum kosti verði starfsleyfið tekið frá bönkunum.