Píratar stórtapa - málefnadauði

Píratar stórtöpuðu í kosningum til sambandsþingsins í Berlín, fóru úr 7 prósetnum í minna en tvö prósent. Sigurvegari kosninganna er AfD, sem berjast gegn innflytjendastefnu stjórnvalda og Evrópusambandinu.

Hér heima blasir málefnadauði við Pírötum. Samkvæmt könnun RÚV á áhugamálum kjósenda eru Píratamálefni, ný stjórnarskrá og ESB-kosningar neðarlega á forgangslistanum. Aðeins 5 prósent sýna stjórnarskrármálinu áhuga og 1,5 prósent nefna Evrópumál.

Píratar segja mest lítið um stór áhugamál kjósenda, svo sem heilbrigðiskerfið og málefni aldraðra og öryrkja.

Merkel galt afhroð í Berlín

1,5% kjósenda vilja ræða ESB-aðild

RÚV lét könnunarfyrirtæki athuga áhugamál kjósenda - RÚV er farið að skammast sín fyrir að hringja á flokksskrifstofu Samfylkingar eftir þeim upplýsingum.

Ein niðurstaða er sláandi: aðeins 1,5 prósent kjósenda vill ræða ESB-aðild Íslands.

Þetta eru slæmar fréttir fyrir Viðreisn.

Hægri eða vinstri, stöðugleiki eða lausung

Undirstraumar kosninganna í október er stöðugleiki eða lausung. Vinstriflokkarnir, Píratar meðtaldir, bjóða stefnu lausungar þar sem stjórnarskráin, ESB-aðild og efnahagsleg tilraunastarfsemi er í forgrunni.

Hægriflokkarnir, Sjálfstæðisflokkur og Framsóknarflokkur, stefna á efnahagslegan stöðugleika og hafna tilraunum með stjórnskipun og efnahagsbúskap.

Viðreisn er framboð mótsagna, styður í orði kveðnu stöðugleika en boðar ESB-aðild.

Ýmis hávaðamál munu skjóta upp kollinum í aðdraganda kosninganna og kannski hafa áhrif. En meginlínurnar liggja fyrir.

„Hlakka til kosninganna“

Fjórflokkurinn er félagsauður

Fjórflokkurinn er niðrandi orð, notað um stjórnmálakerfið sem þróaðist hér á millistríðsárunum og fylgir lýðveldinu frá stofnun. Orðið gefur til kynna að ,,sami rassinn sé undir þeim öllum" og engu breyti hvaða flokkar myndi ríkisstjórn.

Hruni fjórflokksins er reglulega spáð síðustu tvo til þrjá áratugina. Netmiðillinn Kjarninn endurvinnur tugguna í kosningaspá.

Stjórnmálakerfi lýðveldisins, svokallaður fjórflokkur, hefur staðið af sér allar atlögur. Eina ástæðan fyrir þessari seiglu er að fyrirkomulagið gagnast þjóðinni, að öðrum kosti væri það ekki enn við lýði.

Stjórnmál snúast í grunninn um tvennt, hugmyndir og hagsmuni. Innan fjórflokksins rúmast nær allar hugmyndir og meginhagsmunir þeirra hópa sem mynda íslenskt samfélag. Á vettvangi fjórflokksins, bæði innan flokkanna og á milli þeirra, fer fram málamiðlun milli hugmynda og hagsmuna. Enginn fær öllu sínu framgengt, hvort sem um er að ræða hugmyndir eða hagsmuni, enda brýtur einræði í bága við málamiðlanir.

Þjóðin fær reglulega, ekki skemur en á fjögurra ára fresti, tækifæri til að kjósa um hugmyndir og hagsmuni sem stjórnmálaflokkar setja á oddinn. Þetta fyrirkomulag heitir lýðræði og er ekki fullkomið - en það besta sem völ er á.

Fjórflokkurinn er sameiginlegur pólitískur félagsauður þjóðarinnar, sem við ættum að bera virðingu fyrir. Jafnvel þótt okkur líki misjafnlega við einstaka hluta fjórflokksins.

Foringinn fær hyllingu - hvað gera Sigurður I. og RÚV?

Sigmundur Davíð er óskoraður foringi Framsóknarflokksins. Afgerandi kosning sem hann fær í forystusæti flokksins í Norðausturkjördæminu staðfestir stöðu hans. Mótframbjóðandinn, Höskuldur Þórhallsson, er sendur öfugur út af framboðslistanum og af þingi.

Sigurður Ingi, sem varð forsætisráðherra eftir aðför RÚV að Sigmundi Davíð, var nýlega settur á flot af Guðna Ágústssyni og RÚV til höfuðs sitjandi formanni.

Sigurður Ingi er með það í hendi sér að halda áfram ófriði innan Framsóknarflokksins eða verða maður að meiri og taka af öll tvímæli um að hann sé ekki verkfæri sundurlyndisafla.

Með stuðningsyfirlýsingu Sigurðar Inga við Sigmund Davíð getur Framsóknarflokkurinn einhent sér í að safna fylgi fyrir þingkosningar eftir sex vikur. Sigurður Ingi ætti að anda að sér heilnæmu sunnlenska sveitaloftinu og taka rétta ákvörðun strax í dag. RÚV er ábyggilega skammt undan með hjóðnemann.

Sigmundur með afgerandi forystu

Guðni Th. varar við Pírötum

Guðni Th. forseti varar við Pírötum, segir þá nánast óstjórntæka. Þegar hann ræðir stjórnmál á Íslandi talar hann um pólitíkina ,,up there" eins og honum komi mest lítið við hvað gerist á Fróni.

Eftir næstu þingkosningar er forsetinn með það í hendi sér hver fær umboð til að mynda ríkisstjórn. Það fer ekki vel á því að hann úttali sig hvaða mat hann leggur á íslensk stjórnmál.

Nema, auðvitað, að Guðni Th. ætli sér að feta nýjar brautir á fyrsta kjörtímabili sínu sem forseti. En þá væri eðlilegra að hann ræddi það á opinberum vettvangi hér á landi.

Píratar þyrftu að gera málamiðlanir

Sirkus Guðna smart og latir blaðamenn

Guðni Ágústsson, formaður á niðurlægingarskeiði Framsóknarflokksins, vill fá Sigurð Inga sem formann í stað Sigmundar Davíðs. Guðni stendur fyrir samþykktum fámennra félaga Framsóknarflokksins sem skora á Sigurð Inga að gefa kost á sér.

Blaðamenn, sem taka við áskorunum Guðna, nenna ekki að fletta upp á félagaskrám Framsóknarflokksins, sem þó liggja fyrir á netinu, til að setja hlutina í samhengi.

Í NV-kjördæmi eru á þriðja tug félagsdeilda Framsóknarflokksins. Þegar smáfélag í Austur-Húnavatnssýslu gerir Guðna greiða þykir það frétt. Blaðamenn ættu annað tveggja að afþakka hlutdeild í sirkus Guðna smart eða setja hlutina í samhengi og upplýsa lesendur. Blaðamennska á ekki að blekkja heldur fræða.

Skora á Sigurð Inga að gefa kost á sér

Framsókn: lykilflokkur eða jaðarflokkur?

Sigmundur Davíð varð formaður Framsóknarflokksins 2009 og gerði hann að lykilflokki íslenskra stjórnmála. Árin þar á undan var flokkurinn í upplausn, bæði stefnulaus, forystulaus og spilltur.

Framsóknarmenn, bæði í Norðausturkjördæmi um helgina og á landinu öllu í byrjun október, standa frammi fyrir vali á forystu.

Með Sigmund Davíð í brúnni getur Framsóknarflokkurinn áfram verið lykilflokkur í stjórnmálum. Án Sigmundar Davíðs er framtíð flokksins óræð en allar líkur eru að nýr formaður hrekist á jaðar stjórnmálanna með flokkinn. Formenn stjórnmálaflokka ráða verulegu um framgang þeirra. Spyrjið bara samfylkingarfólk.

370 kjósa um framtíð Sigmundar

Búvörusjokkið og ESB-höggið - ákallið til Guðna

Vinstrimenn og Píratar biðu sinn stærsta ósigur síðan ESB-umsóknin féll þegar búvörulögin voru samþykkt á alþingi í vikunni. Gunnar Bragi landbúnaðarráðherra afhjúpaði samhengið milli ESB-sinna og andstæðinga landsbyggðarinnar í RÚV-frétt í gær: 

Þeir talsmenn verslunar sem að æpa yfir þessu öllu saman og þykjast vera að vinna fyrir neytendur eru vitanlega ekki að því. Þetta er kannski sama fólkið og vill fara með Ísland inn í Evrópusambandið þar sem þessir styrkir eru með sama hætti í rauninni. Það er svolítið illskiljanlegt hvað menn eru að meina með þessu.

Bandalag vinstrimanna og auðhringsins Haga gegn almannahagsmunum birtist í öllu sínu veldi í afstöðunni til búvörulaganna. Niðurlægjandi tapið í umræðunni fær Atla Þór Fanndal til að skrifa um eymdarhyggju vinstrimanna.

Í umræðunni um búvörulögin eru öll einkenni vinstristjórnmála síðustu ára: yfirgengilegar yfirlýsingar, t.d. um dýraníð, ásamt tölfræðiruglanda og algjöru úrræðaleysi er kryddað með múgsefjun.

Eina ráð Pírata og vinstrimanna er að ákalla Guðna forseta til að hafna staðfestingu búvörulaganna. Vinstrimenn telja sig eiga hauk í horni í Bessastaðabónda og heimta fylgisspekt hans við úrræðaleysið.

Samantekið: vinstrimenn og Píratar kunna ekki stjórnmál, aðeins að öskra á Austurvelli.

Fylgi Pírata og VG dregst saman

Vinstrimenn eyðileggja innviði - ástæðan er eftirfarandi

Vinstrimenn eyðileggja innviði samfélagins, svo sem skóla, samgöngur og efnahagskerfi. Ástæðan er ekki sú að vinstrimenn skorti andlega spekt eða eru illa innrættir heldur er hún önnur.

Raunasagan í rekstri borgarinnar heldur áfram; skólahald er í upplausn og vegakerfið er bæði sprungið og illa viðhaldið. Nú stendur til að slátra Reykjavíkurflugvelli sem mun ekki bæta samgöngurnar - heldur þvert á móti veikja þær enn frekar.

En hvað er það við vinstrimenn sem gerir þá algerlega óhæfa til að sjá um rekstur, hvort heldur sveitarfélags eða ríkisins?

Jú, svarið liggur í pólitík þeirra. Vinstrimenn, Píratar meðtaldir, hafa ekki áhuga á hagnýtum úrslausnum - eins og að reka skóla eða viðhalda samgöngum. Pólitík vinstrimanna hverfist um frelsun af einhverju tagi; frelsun minnihlutahópa, frelsun flóttamanna, frelsun fátæklinga, frelsun náttúrunnar, frelsun siðferðisins og svo framvegis.

Vinstrimenn neita að horfast í augu við staðreynd, sem flestum hægrimönnum er augljós: frelsið þrífst best þegar meginreglur eru skýrar, innviðir heilir og einstaklingurinn fær andrými til að þroskast án óþarfa íhlutunar.

Frelsi vinstrimanna forræðishyggja dulklædd í mannúð. Á meðan vinstrimenn eru uppteknir við að troða forræðishyggjunni upp á fólk grotna innviðir niður.

 

„Óraunhæfar hagræðingarkröfur“