Píratar þrífast á illmælgi um þjóðina

Píratar eru slagorðið ,,ónýta Ísland" holdi klætt. Pólitík Pírata er að útmála stjórnkerfi okkar og samfélag sem óalandi og óferjandi.

Sumpart er þetta skiljanlegt. Píratar eru afurð hrunsins þegar þjóðin missti trúna á lýðveldinu og vildi helst flytja fullveldið til Brussel.

En það eru átta ár frá hruni. Við höfum sett helstu bankamenn landsins frá tímum útrásar í fangelsi og gert upp við þrotabú föllnu bankanna. Hér er hagvöxtur og allir með vinnu eins og þeir vilja.

Samt halda Píratar áfram að tala um Ísland og þjóðina sem hér býr eins og við séum þriðja flokks ríki. Og Píratar stefna á yfirtöku á ríkisvaldinu eftir þingkosningar í lok mánaðarins.

Ekki upplýstar ákvarðanir á Alþingi

Nýtt kalt stríð: 3 átakasvæði

Nýtt kalt stríð stórveldanna, Bandaríkjanna og Rússlands, er komið á skrið. Þrjú átakasvæði eru viðkvæmust um þessar mundir: Sýrland, Úkraína og Eystrasaltslönd.

Fréttaflutningur af alþjóðastjórnmálum ber merki nýja kalda stríðsins, sjá til dæmis NBC og Daily Beast.

Evrópusambandið er í samvinnu við Bandaríkin í gegnum Nató á tveim átakasvæðum, í Úkraínu og Eystrasaltsríkjum. Ólíkt Bandaríkjamönnum eru Evrópumenn nágrannar Rússa. Í Þýskalandi er vilji til málamiðlana. 

Liður í kalda stríðinu seinna er áróður þar sem óvinaímyndir eru dregnar upp og festar í sessi almenningsálitsins. Sannleikurinn týnist áður en fyrsta skotinu er hleypt af.

Pútín vill fresta Frakklandsheimsókn

Noregur herðir reglur vegna hælisleitenda

Hælisleitendur í Noregi fá ekki lengur vasapeninga heldur úttektarkort fyrir mat, samkvæmt nýjum reglum sem ráðherra innflytjendamála, Sylvi Listhaug, kynnti nýverið. Dæmi eru um að vasapeningarnir séu sendir til heimalandsins eða þeir nýttir til að greiða smyglurum.

Smyglarar standa fyrir allt að 90 prósent hælisleitanda til Evrópu. Hælisleitendur borga smyglurum fyrir þjónustuna þegar þeir eru komnir til Evrópulanda og fá félagslegan stuðning í formi vasapeninga.

Norðmenn vinna skipulega að takmarka rétt hælisleitenda til að koma í veg fyrir misnotkun á opinberu fé. Listhaug boðar frekari aðgerðir til að stemma stigu við komu hælisleitenda til Noregs.

Útlit fyrir þúsund hælisleitendur

Ást, hatur og brandarar í múslímatrú

Róttækir ungir múslímar, sem hyggja á hryðjuverk, þurfa ást, skrifar Omer Aziz í New Republic. Hann vísar í fjölda ungra manna sem á síðustu árum drápu saklausa borgara á vesturlöndum í nafni múslímatrúar.

Í Svíþjóð er ást og velferð á háu stigi. BBC segir að frá Svíþjóð streymi hundruð ungra múslíma til að berjast fyrir múslímatrú.

Hamed Abdel-Samad er egypskur múslími menntaður í Þýskalandi. Í uppgjöri við múslímatrú skrifar hann í niðurlagi að ekki fyrr en múslímar getið hlegið að spámanninum og sagt um hann brandara geti þeir losnað við hatrið sem trúnni fylgir.

Erasmus frá Rotterdam ruddi brautina fyrir kímni og kaldhæðni í kristni, ásamt fræðimennsku í eingyðistrúnni frá Jerúsalem. Erasmus er 15. aldar maður og múslímar eiga engan slíkan þótt komin sé 21. öld. Enda finnst fjarska mörgum múslímum rétt og skylt að drepa hvern þann sem dregur dár að spámanninum frá Mekka. Ástin mun ekki vinna bug á skorti á kímnigáfu.

 

Sprengiefnið tilbúið til notkunar

Rússagrýlan á ekki heima á Íslandi

Ísland á ekkert sökótt við Rússland. Á dögum Sovétríkjanna var Ísland útvörður vestrænna gilda í norðri gagnvart kommúnískri útþenslustefnu - en aldrei áttum við neitt nema vinsamleg samskipti við Rússa.

Lettland og önnur Eystrasaltsríki búa við aðra sögu samskipta við Rússa. Þessi lönd ásamt Póllandi voru lengi vel bitbein þýskra og rússneskra áhrifa í Austur-Evrópu. Eftir fall Sovétríkjanna var skiljanlegt að þessi ríki hölluðu sér í vestur með aðild að ESB og Nató.

Ýmislegt má segja um ástandið í Rússland en kommúnismi ríkir þar ekki, líkt og á dögum kalda stríðsins. Markaðsbúskapur er rekinn þar upp á rússneska vísu og jafnframt lýðræði.

Í kalda stríðinu áttu Íslendingar ekkert val. Heiminum var tvískipt og við hlutum alltaf að vera í vestræna liðinu. Í dag er heimsmyndin ekki jafn svarthvít. 

Öryggishagsmunum Rússa var ógnað í Úkraínu með tilraun Nató-ríkja að færa landið undir sitt áhrifasvæði. Af þessu leiddi aukin spenna milli næstu nágranna Rússa í Nató-liðinu, t.d. Letta. 

Ísland á ekki að láta teyma sig út í fjandsamlegar aðgerðir gegn Rússum vegna þess að Nató vill styrkja stöðu sína í Austur-Evrópu.

Rússagrýluna var kannski hægt að réttlæta á dögum kalda stríðins. En ekki lengur og allra síst á Íslandi.

„Rússland breytti öllu“

Raðframhjáhald, kvenfyrirlitning og næsti forseti

Hvort vegur þyngra raðframhjáhald Bill Clintons eða kvenfyrirlitning Donald Trump? Úrslit forsetakosninganna í Bandaríkjunum ráðast af svarinu við þeirri spurningu.

Kynjapólitík kemst ekki á hærra stig en þegar umgengni forsetaframbjóðenda við hitt kynið er úrslitaatriði í kosningu um valdamesta embætti heimsins.

Hvort heldur Hillary eða Donald hafi betur má öllum vera ljóst að hitt kynið sigrar. Spurningin er bara hvort kynið það verður.

Hvassar kappræður

Fávitafrétt RÚV um búrkur og héra

RÚV reynir að gera Þorgerði Katrínu Gunnarsdóttur, sem leggur til búrkubann, að fávita með því að semja frétt sem líkir búrkubanni við friðun héra.

Þeir sem nenna að lesa fréttina, sem byggð er á fésfærslu fyrrum dómara við Mannréttindadómstól Evrópu, átta sig á því að RÚV er fávitinn en ekki Þorgerður Katrín.

Niðurstaða dómarans er sem sagt:

Frakkar bönnuðu konum að hylja andlit sitt með slæðum á opinberum stöðum árið 2010. Karlar sem þvinga eiginkonur sínar eða dætur til að bera bannaða slæðu eiga yfir höfði sér mun harðari refsingu - þá má sekta um allt að 30 þúsund evrur eða næstum 5 milljónir og dæma í allt að ársfangelsi. Bannið var síðar staðfest af Mannréttindadómstól Evrópu sem taldi að búrkubann Frakka væri ekki trúarlegs eðlis. 

Búrkubann stenst samkvæmt Mannréttindadómstóli Evrópu. Aðeins fáviti á fréttastofu RÚV fattar það ekki og gerir hérasamlíkinguna að aðalpunkti fréttarinnar, gagngert til að afvegaleiða lesendur og hlustendur og gera hlut Þorgerðar Katrínar sem verstan.

Stétt með stétt eða ójöfnuður innherja

Samfylking féll í þann pytt að verða flokkur innherja samfélagsins. ESB-stefna Samfylkingar var þjónkun við efnafólk og sérfræðinga í efri tekjuhópum. Talsmenn Samfylkingar viðurkenndu þetta opinberlega.

Brynjar Níelsson þingmaður Sjálfstæðisflokksins útskýrir sígilda jafnaðarhugsun sjálfstæðismanna, sem slagorðið ,,stétt með stétt" nær yfir:

Öll erum við jafnaðarmenn ef sú stefna snýst um að halda uppi almannatryggingarkerfi, aðgangi að heilbrigðisþjónustu og menntun fyrir alla. En ef hún snýst um ríkisvæðingu og jafna kjör allra óháð framlagi eru fáir jafnaðarmenn, sem betur fer. 

Samfylkingin varð að flokki innherja og tapaði stórt. Viðreisn fetar í fótspor Samfylkingar og boðar ESB-lausnir sem hygla efnafólki. Innherjafylgið er ekki til skiptanna og Samfylking situr uppi með sárt ennið.

Ríkisstjórnin fór illa með árangurinn

Heimsstyrjöldin í Aleppo

Forsíðuefni þýsku útgáfunnar Der Spiegel er heimstyrjöldin í Aleppo þar sem bandalagsríki Rússa stríða við skjólstæðinga Bandaríkjanna um yfirráðin í stærstu borg Sýrlands.

Í bandarískri umræðu er að finna samanburð við Kúbudeiluna frá 1962 þegar heimurinn bjóst við kjarnorkuvopnastríði milli Bandaríkjanna og Sovétríkjanna. Í fjögurra mínútna myndbandi á youtube ræða bandarískir sérfræðingar um vandann í samskiptum við Rússa og tala allir á sama veg: bandarísk stjórnvöld klúðruðu sambandinu við Rússa eftir lok kalda stríðsins.

Í kalda stríðinu voru tvö stórveldi sem réðu mestu um þróun alþjóðamála. Yfirburðir Bandaríkjanna eru ekki lengur þeir sömu og enn síður Rússa. Bandaríkin guldu afhroð í Írak-stríðinu 2003-2008 og Rússar töpuðu forræði sínu yfir Austur-Evrópu eftir sameiningu Þýskalands.

Í miðausturlöndum keyrir gamalt stórveldi, Íran, eigin pólitík sem miðar að ná áhrifum yfir norðurhluta Íraks og Sýrlands til að komast að botni Miðjarðarhafs. Íranir eru bandamenn Rússa og eru shíta-múlímar. Nái þeir markmiði sínu reka þeir fleyg á milli stærstu súnní-múslímaríkjanna í þessum heimshluta, Tyrklands og Sádí-Arabíu, sem eru skjólstæðingar Bandaríkjanna.

Bandarísk utanríkismál eru í biðstöðu fram yfir forsetakosningarnar í nóvember. Þegar næsti forseti tekur við völdum í janúar 2017 eru allar líkur á að Aleppo verði komin í hendur bandamanna Rússa. Heimsstyrjöldin, sem kennd er við borgina, er samt sem áður rétt að byrja.

Ræddu Sýrland, jafnrétti og norðurslóðir

Píratar stela Samfylkingunni - ekkert me, segir Karl Th.

Stefnuskrá Pírata er afrit fengið hjá Samfylkingunni, segir varaborgarfulltrúi Samfylkingar. Fylgi Samfylkingar, sem var tæp 30 prósent 2009 en 12,9 prósent í síðustu kosningum, er mest komið til Pírata.

Karl Th. Birgirsson fyrrverandi framkvæmdastjóri Samfylkingar segir i brýningu til flokksmanna að nú gildi ekkert me. Flokkurinn sé kominn niður í sex prósent og verði að urra og glefsa síðustu vikur kosningabaráttunnar.

Samfylkingarhvutti geltir að Pírötum næstu daga.