Birgitta fær umboð eftir lokun markaða - RÚV spuni

Eftir að markaðir lokuðu í dag fékk Birgitta Jónsdóttir leiðtogi Pírata umboð til að mynda ríkisstjórn. Forsetinn vildi síður valda hruni á mörkuðum með veitingu umboðs til Pírata yfir hábjartan daginn.

RÚV bjó til fréttaspuna sem líkist krýningu þjóðhöfðingja með tímasettum atburðum upp á hverja mínútu. RÚV hyggst verja ríkisstjórnarmyndun Pírata vantrausti í fjölmiðlum og hleður framtakið lofi með fréttatækilegum aðferðum sem almannatenglar nota.

Ef tekst að halda lífi í stjórnarmyndun Pírata fram yfir helgi munu markaðir, þar sem lífeyrir landsmanna er ávaxtaður, láta á sjá. Sú leiðrétting verður þó hátíð í samanburði hrunið sem yrði ef smáflokkaríkisstjórn Pírata verður að veruleika. En leyfum helginni að líða og hugsum með hlýhug til fréttamanna RÚV sem verða kallaðir út á aukavakt að halda spunanum á floti. Jólin koma snemma á Efstaleiti.

„Mun byggja á góðum grunni“

Fréttaþvottur í höndum RÚV

RÚV notar fréttaþvegin sjónarmið úr samfélagsmiðlum (mér finnst pælingar) og kynnir sem staðreyndir í fréttum.

Herferð RÚV gegn Sigmundi Davíð Gunnlaugssyni þáverandi forsætisráðherra var þessu marki brennd. Fréttamenn RÚV unnu yfirvinnu við að setja saman spuna af ,,mér finnst.." setningum andstæðinga Sigmundar Davíð og gera að staðreyndum. Fésbókarfærslur og prívatpælingar voru gerðar að stórfréttum - stundum í viðtengingarhætti, þar sem pólitískar áherslur RÚV eru klæddar í setningarfræðilega óskhyggju. 

Þegar flett var ofan af vanhæfisumræðunni, sem RÚV stóð fyrir, ákvað fréttastofan á Efstaleiti að ljúga með þögninni. 

Fréttastofa RÚV er í vinnubrögðum oft eins og áróðursmiðstöð. Wintrismálið var rekið áfram af pólitískum hvötum þar sem öllum brögðum var beitt, og m.a. fréttaþvegnum órum af samfélagsmiðlum stillt upp sem staðreyndum. 

Fjölmiðlar stunda „upplýsingaþvott“

Móðursýki án málefna

Stjórnarandstaðan á síðasta kjörtímabili knúði fram kosningar án málefna. Kosningar voru ákveðnar í móðursýkiskasti fjölmiðla og stjórnarandstöðu.

Til að mynda ríkisstjórn þarf málefni. Sitjandi ríkisstjórn er málefnalega sterk. Á Íslandi eru allir mælikvarðar á velferð og hagsæld í lagi; hagvöxtur, ekkert atvinnuleysi, lág verðbólga. Einu álitamálin eru launamál og hve mikið á að setja í uppbyggingu innviða. Það eru eilífðarmál sem engin ríkisstjórn leysir heldur eru alltaf í umræðu samhliða stöðugum málamiðlunum.

Sitjandi ríkisstjórn tveggja flokka vantar þrjá þingmenn í meirihluta á alþingi. En þeir fást ekki hjá stjórnarandstöðunni, sem er föst í móðursýki án málefna og klofin í fimm smáflokka.

VG efast um fimm flokka

Sjö flokka þjóðstjórn lýsir vangetu - einkum Vinstri grænna

Vinstri grænir eru nógu skýrir í kollinum til að skilja að fimm flokka smáflokkastjórn er andvana fædd. Slík stjórn væri samsæri gegn niðurstöðu þingkosninga sem gerðu Sjálfstæðisflokkinn að stærsta flokki landsins í öllum kjördæmum og þann langstærsta á alþingi.

En, því miður, eru Vinstri grænir eru of huglausir til að mynda ríkisstjórn með Sjálfstæðisflokki og einum til tveim öðrum flokkum.

Hugmynd formanns Vinstri grænna, um þjóðstjórn sjö flokka, er viðurkenning á vangetu flokksins að draga rökréttar ályktanir af lýðræðislegum þingkosningum. Þjóðstjórn sjö flokka útilokaði stjórnarandstöðu. Aðeins það eitt ætti að útiloka þann möguleika.

Hugsanlega þörf á þjóðstjórn

Smáflokkabandalagið - hádegisbrandari RÚV

RÚV, auðvitað, flytur þær fréttir að fjórir smáflokkar gera tilraun til að mynda minnihlutastjórn ,,óformlega". Þrátt fyrir samtöl formanna tekst ekki ætlunarverkið.

Smáflokkarnir Píratar, Viðreisn, Björt framtíð og Samfylkingarsmotteríið geta sem sagt ekki myndað óformlega minnihlutastjórn. En þeir vilja samt ólmir verða hluti af meirihlutastjórn fimm flokka - sem yrði formleg ríkisstjórn lýðveldisins.

Snjall hádegisbrandari hjá RÚV.

Falsfréttir og brotgjarn veruleiki

Falsfréttir eru sumar uppspuni frá rótum, stundum er flugufótur fyrir þeim en í öðrum tilvikum eru stórar ályktanir dregnar af litlu tilefni. Í enn öðrum tilfellum er það spurning um sjónarhorn á málefni líðandi stundar.

Falsfréttir eru ekki nýjar af nálinni. Aðdragandi fyrri heimsstyrjaldar var sneisafullur af falsfréttum,  eins og Niall Ferguson rekur, þar sem óvinaímyndun var haldið á lofti.

Markaður fyrir falsfréttir eykst á tímum óvissu og eðli þeirra er að magna upp taugaveiklun. Og nú eru tímar taugaveiklunar.

 

 

Endurvarpar tilhæfulausum „fréttum“

Stór-Ameríka og Klofnings-Evrópa

Stórvesírar í hagfræði, til dæmis nóbelshafinn Michael Spence, segja kjör Donald Trump marka tímamót í heimshagkerfinu. Alþjóðleg hugmyndafræði um frjálsa verslun víkur fyrir heimalningsstefnu um að hollur sé heimafenginn baggi. Stór-Ameríka Trump á fátt sameiginlegt með alþjóðahyggju síðustu forseta.

Evrópusambandið naut góðs af hugmyndafræðinni um alþjóðahyggju þar sem þjóðríkið skyldi gegna æ minna hlutverki en yfirþjóðlegar stofnanir setja í auknum mæli lög og reglur þvert á landamæri.

Frá bandarískum sjónarhóli hægrimannsins Patrick J. Buchanan er Evrópa (les Evrópusambandið) á hröðu undanhaldi frá sjálfri sér - og í faðm Pútín Rússlandsforseta. Buchanan, eins og margir hægrimenn, telur að bandarískir forsetar og leiðandi stjórnmálamenn í Evrópu hafi gert Pútín rangt til og vilja stöðva hernaðaruppbyggingu Nató á vesturlandamærum Rússlands. En rússagrýlan er síðustu ár sameinandi afl fyrir Evrópusambandið, samanber Úkraínu-deiluna.

Klofningsferli Evrópusambandsins er komið á það stig að ekki verður aftur snúið. Vinstriútgáfan Guardian, sem er hlynnt ESB, skrifar í leiðara að forsetakosningarnar í Frakklandi séu til marks um stórfelldar breytingar í álfunni. Hægripólitík, andsnúin ESB en hlynnt vinsamlegum samskiptum við Rússland, er óstöðvandi.

Án alþjóðahyggju og rússagrýlu fær Evrópusambandið ekki viðspyrnu að stöðva hnignunina.

Goldman Sachs-stjóri fjármálaráðherra

Yfirkennari Íslands sér varalit á svínum

Ragnar Þór Pétursson kennari er sá maður sem bæði mbl.is og RÚV leita til að túlka nýja kjarasamninga grunnskólakennara. Á mbl.is segir Ragnar Þór enga framtíðarsýn í samningnum og á RÚV að samningurinn sé ,,varalitur á svín."

Ragnar Þór er ekki aðeins í þeirri stöðu að vita allt betur en allir grunnskólakennarar landsins. Hann veit líka betur en allir aðrir hverjir eigi að vera skólastjórnendur í framhaldsskólum. Hann komst í fréttirnar, en þar finnst honum fjarska gaman, þegar skólastjóri Borgarholtsskóla var ráðinn, en Ragnar Þór var í skólanefnd. Brynjar Níelsson þingmaður sagði þetta um upphlaupið: ,,Ég held því að uppsögn Ragnars Þórs úr skólanefnd Borgarholtsskóla angi af venjulegri frekju."

Ragnar Þór var sakaður um kynferðislegt áreiti fyrir þrem árum og gekk rösklega fram eins og fyrri daginn í fjölmiðlum, með viðkomu í Kastljósi RÚV og viðtölum við netmiðla. Ásökunin um kynferðislegt ofbeldi kom hvergi fram opinberlega nema hjá Ragnar Þór sjálfum, sem skrifaði pistil og boðaði að hann ætlaði að hverfa til nýrra starfa.

En, eins og segir gamla kvæðinu, í skólanum er skemmtilegt að vera: í boði stærstu fjölmiðla landsins er Ragnar Þór orðinn yfirkennari Íslands.

Til hamingju, grunnskólakennarar, með þennan talsmann ykkar.

 

Sagði upp á kynningarfundinum

Ráðuneyti kaupir sér áhrif í pólitík

Utanríkisráðuneytið ætlar að kaupa fjölmiðil til að fjalla um mál sem ráðuneytið vill að fái aukið vægi í pólitískri umræðu. Tilraunaverkefni ráðuneytisins er þróunarmál. Ef vel tekst til gæti utanríkisráðuneytið notað sömu aðferð við annað stefnumál, til dæmis ESB-umsóknina.

Kaup ráðneytisins á fjölmiðlaumfjöllun spillir bæði opinberri stjórnsýslu og fjömiðlun. Pólitísk umræða gengur þannig fyrir sig í grófum dráttum að hugmyndir og stefnumál eru rædd á opnum vettvangi í fjölmiðlum og á netinu. Stjórnmálaflokkar sækja efnivið sinn í þessa umræðu og gera að pólitískri stefnu sinni. Með því að kaupa fjölmiðil til að fjalla um sérstök áhugamál sín reynir utanríkisráðuneytið að hafa óeðlileg áhrif á umræðuna.

Stjórnsýslunni er ætlað að framkvæma stefnu sem stjórnmálaflokkar bera fram og fá umboð frá kjósendum til að framfylgja. Ef stjórnsýslan, þ.e. ráðuneyti og opinberar stofnanir, kaupir sér aðgang að umræðunni, þar sem fyrstu drög pólitískrar stefnu verða til, jafngildir það tilraun til að svindla á lýðræðinu.

Talsmaður utanríkisráðuneytisins segist treysta fjölmiðlum að starfa faglega. En fagleg fjölmiðlun gengur út á að láta peninga ekki hafa áhrif á efnisval og efnistök. Með því að kaupa sig inn á fjölmiðla er ráðneytið í senn að lýsa yfir vantrausti á fjölmiðla og vilja til að taka þátt í spillingu. Utanríkisráðuneytið er komið langt út fyrir sitt valdsvið þegar það kaupir fjölmiðlaumfjöllun í sína þágu.

Ekki greitt til að fjalla um ráðuneytið

Gröf Nató er í Aleppo

Árás hervéla Nató-ríkja á sýrlenska stjórnarherinn, sem nýtur stuðnings Rússa, í september var til að hindra gildistöku samkomulags milli utanríkisráðherra Bandaríkjanna og Rússlands frá 9. september.

Samkomulagið gerði ráð fyrir samstöðu Nató-herja, undir forystu Bandaríkjanna, og Rússa við að knésetja herskáa múslíma í Aleppo, stærstu borg Sýrlands. Samkomulagið var óvinsælt í Pentagon, varnarmálaráðuneytis Bandaríkjanna, sem krefst nýrrar ríkisstjórnar í stað Assad forseta.

Aleppo er núna, tveim mánuðum síðar, við það að falla Assad og Rússum í skaut. Bandaríkin og Nató eru áhorfendur að endataflinu í Sýrlandi þar sem Rússar standa með pálmann í höndunum. Assad forseti gefur lítið fyrir eftiráskýringar Bandaríkjamanna um að árásin í september hafi verið mistök.

Sýrlandsleiðangur Nató og Bandaríkjanna er farinn út um þúfur. Nýr Bandaríkjaforseti, Donald Trump, er með horn í síðu Nató og sneypuför í Sýrland kaupir hernaðarbandalaginu ekki vinsældir.

Nató er að stofni til hernaðarbandalag Vestur-Evrópu og Bandaríkjanna frá dögum kalda stríðsins. Útþensla Nató í Austur-Evrópu og verktaka Nató-ríkja fyrir Bandaríkin í miðausturlöndum gerir bandalagið líkara málaliðaher frá miðöldum en vettvangi fyrir öryggi og samvinnu Vestur-Evrópu.

Aleppo var blóðvöllur vestræns málaliðahers árið 1119, á tímum krossferðanna, þegar um 4000 manna her þeirra var eytt. Sagan endurtekur sig.

Mistök ollu mannskæðri loftárás