Samfylkingin eyðilagði samstöðu vinstriflokkanna

Tvær stórar ákvarðanir Samfylkingar eyðilögðu samstöðu vinstrimanna. Samfylkingin gerðist útrásarflokkur og talaði máli auðmanna á fyrsta áratug aldarinnar. Ríkisstjórnaraðild með Sjálfstæðisflokknum, hrunstjórnin 2007 til 2009, var hluti af stækri hægripólitík sem lét jafnaðarmennsku lönd og leið.

Seinni mistökin voru að knýja Vinstri græna í ríkisstjórninni 2009-2013 til að samþykkja ESB-umsókn Samfylkingar. Sögulega skiptast vinstrimenn hér á landi tvo meginhópa, alþjóðasinnaðan sem áttu heimili í Alþýðuflokknum og þjóðernissinna í Sósíalistaflokki og Alþýðubandalagi.

ESB-umsóknin var umboðslaus, Samfylkingin var eini flokkurinn með málið á dagskrá og fékk 30 prósent fylgi. Umsóknin var illa undirbúin og byggði á rökleysu um að ,,kíkja í pakkann."

Sameiginlegt þessum tveim mistökum er tækifærismennskan. Samfylkingin ætlaði fyrst að verða stór í krafti auðmannadekurs og síðan í skjóli Evrópusambandsins. Hvorttveggja misheppnaðist og Samfylkingin er núna 5,7 prósent flokkur - en þykist samt ætla að verða ráðandi afl í ríkisstjórn. Frekjan er jafn mikil og málefnin eru lítil í Samfylkingunni.

Vel mögulegt að brúa bilið

Stjórnlist í hreinu þingræði

Þingræði í sínu tærasta formi felur í sér að sitjandi ríkisstjórn leitar eftir meirihluta á alþingi fyrir hvert einasta mál annars vegar og hins vegar að meirihluti þings getur samþykkt hvaða mál sem er án aðkomu ríkisstjórnar.

Ríkisstjórnir eru myndaðar á grunni meirihluta þingsins. Nú liggur fyrir að enginn ríkisstjórnarmeirihluti er á alþingi. Engu að síður höfum við ríkisstjórn sem prýðileg sátt er um í þjóðfélaginu.

Verkefni næstu vikna er að finna breiða samstöðu um þau mál sem brýnt er að fá samþykkt en leggja til hliðar þau mál sem teljast óveruleg eða ala á sundurþykkju.

Ef vel tekst til er von um að nýr meirihluti myndist í þingstörfum. Ef illa fer er hægt að efna til nýrra þingkosninga í vor.

Finna hvar sársaukamörkin liggja

Siðir og ósiðir hælisleitenda

Í Þýskalandi eru nýleg tvö dæmi um ofbeldi innflytjenda sem kljúfa þýsku þjóðina. Ungur Afgani er sakaður um nauðgun og morð á 19 ára þýskri stúlku, sem vann við að aðstoða flóttamenn. Önnur árás innflytjenda á þýska konu sem í sakleysi sínu gekk niður tröppur lestarstöðvar í Berlín náðist á mynd og vekur óhug.

Hælisleitendur til ríkja Vestur-Evrópu koma margir með þær hugmyndir að konur séu annars flokks þegnar. Verulegur fjöldi hælisleitenda eru múslímar. Háborg múslímamenningar er Sádí-Arabía þar sem klæðaburður og háttsemi kvenna er stýrt með lögum ríkisins. Á vestrænan mælikvarða eru þessi lög ofbeldi gagnvart konum.

Vestrænir siðir mæla fyrir jafnrétti karla og kvenna þar sem konur eiga að geta um frjálst höfuð strokið ekki síður en karlar. Hælisleitendur verða að aðlaga sig vestrænum síðum til að geta orðið nýtir borgarar á vesturlöndum.

Eftirfarandi þarf að hafa í huga við móttöku hælisleitenda: Í fyrsta lagi að taka við fáum hælisleitendum og tryggja sem best að þeir fái ekki tækifæri að rækta ósiðina sem þeir koma með sér að heiman heldur aðlagist vestrænum siðum. Í öðru lagi að senda þá tilbaka hið snarasta sem brjóta af sér.

Hælisleitandi ákærður fyrir nauðgun

Trú, von en engin ríkisstjórn

Smáflokkarnir fimm gátu ekki myndað ríkisstjórn vegna þess að málefni skorti. Kjósendur gáfu ekki kerfisbyltingarflokkum umboð til að stokka upp stjórnskipun og grunnatvinnuvegi þjóðarinnar.

Til viðbótar við málefnaskort afhjúpa Píratar pólitískan greindarskort. Leiðtogi þeirra segir í viðtengdri frétt:

„Kannski þarf að hugsa út fyr­ir boxið enn frek­ar. Kannski væri til­efni til að at­huga með utanþings­stjórn en mér finnst al­veg ljóst að ef við ætluðum að mynda þjóðstjórn þá þyrfti fólk að sætta sig við eng­ar breyt­ing­ar,“ sagði Birgitta.

Birgitta skilur ekki út á hvað utanþingsstjórn gengur. Slík stjórn væri ekki með neitt umboð til róttækra breytinga. Og þjóðsstjórn er ekki mynduð nema í stórfelldri kreppu - en hér er bullandi góðæri.

 

Samstarfið ekki fullreynt

Spuni um lok stjórnarmyndunar smáflokka

Smáflokkastjórn er fræðilegur möguleiki en varla raunhæfur. Í samfélaginu er ekki eftirspurn eftir kerfisbreytingum. Án kerfisbreytinga svíkja smáflokkarnir kjósendur sína. Píratar sætu uppi með stærstu skömmina.

Til að koma í kring kerfisbreytingum, t.d. nýrri stjórnarskrá eða stokka upp fiskveiðistjórnun, þarf víðtækan stuðning út í samfélaginu. Sá stuðningur er ekki fyrir hendi.

Smáflokkarnir fimm undirbúa hver um sig spuna til að útskýra hvers vegna þeir mynda ekki ríkisstjórn. 

Telja VG vera vandamálið

Birgitta giskar á byltingu smáflokka

Á föstudagskvöld nýliðið giskaði Birgitta Jónsdóttir leiðtogi Pírata að 90 prósent líkur væru á að fimm smáflokkar kæmu sér saman um að bylta stjórnskipun landsins, fiskveiðistjórnuninni og landbúnaðarkerfinu. Svona er ágiskun Birgittu orðuð í frétt mbl.is

Rifjað var upp að Birgitta hefði sagt á föstu­dag­inn að hún væri 90% viss um að flokk­arn­ir fimm gætu myndað rík­is­stjórn og spurt hvort hún væri enn jafn­viss. Svaraði hún því til að hún hefði látið orðin falla í skemmtiþætti þar sem hún hefði verið beðin um að skjóta á ein­hverja tölu. „Þannig að ég skaut bara á eitt­hvað.“

Birgitta sagði að hins veg­ar bæri mjög lítið á milli í raun og veru. „Við vilj­um öll breyta þess­um kerf­um á ein­hvern hátt en okk­ur grein­ir enn þá svo­lítið á um leiðina og það er þangað sem ég er að reyna að leiða fólk sam­an.“

Byltingarandi byggður á ágiskunum þar sem ,,skotið er á eitthvað" er fyrirboði þess sem koma skal nái smáflokkarnir saman um ríkisstjórn.

Málamiðlanir liggja enn ekki fyrir

Sigmundur Davíð sem stjórnmálahreyfing

Fjölmiðlar líta á Sigmund Davíð sem stjórnmálahreyfingu. Hann má ekki boða fund heima í kjördæminu án þess að fjölmiðlar geri úr því stórpólitískan viðburð.

Sigmundur Davíð má vel við una. Enginn stjórnmálamaður, eftir Davíð Oddsson, er slíkur miðdepill stjórnmálaumræðunnar að enginn kemst með tærnar þar sem hann hefur hælana.

Sigmundi Davíð eru allir vegir færir í stjórnmálum.

„Þetta eru skrýtnir tímar“

Írska uppgjörið við bankamenn og það íslenska

,,...staðreyndin er að fleiri hafa framið sjálfsmorð á þeim sjö til átta árum, sem liðin eru frá fjármálakreppunni 2007-2008, en voru drepnir á óöldinni í Norður-Írlandi í þrjátíu ár," skrifar Tim Pat Coogan í 1916 á hundrað ára afmæli írsku páskauppreisnarinnar.

Coogan bætir við um írska réttarkerfið: ,,Staðreyndin er, að á aldarafmæli páskauppreisnarinnar, þjónar írska réttarkerfið ekki tilgangi sínum. Það getur ekki tekist á við hvítflipaglæpi."

Enginn írskur hrunvaldur var dæmdur fyrir fjármálaglæpi sem leiddu til írska hrunsins.

Íslenska réttarkerfið stóð sig betur. Fjármálaglæpir voru rannsakaðir og auðmenn dæmdir.

Veiktust undan álagi

Saddam, Pútín og kommúnistaveiðar frjálslyndra

Stærstu mistök Bandaríkjanna og Vestur-Evrópu í utanríkismálum á þessari öld eru innrásin í Írak árið 2003. Innrásin var réttlætt með þeirri lygi að Saddam Hussein Íraksforseti ætti gereyðingarvopn og væri ógn við heimsfriðinn.

Innrásin í Írak hleypti öllu í bál og brand í miðausturlöndum og leiddi til flóttamannastraums múslíma til Vestur-Evrópu. Meira en áratug síðar sér hvergi til lands í þessum heimshluta.

Í beinu framhaldi af innrásinni í Írak gerðu Bandaríkin og Vestur-Evrópa tilraun til að endurskipuleggja Austur-Evrópu í þágu vestrænna hagsmuna. Með Evrópusambandið og Nató sem verkfæri var rifið í tætlur samkomulag um mörk vestrænna og rússneskra áhrifasvæða. Samkomulagið hafði verið í gildi frá lokum seinni heimsstyrjaldar en endurskoðað eftir fall Sovétríkjanna 1991 og lok kalda stríðsins.

Tilraun Bandaríkjanna og Vestur-Evrópu að leggja austurhluta álfunnar undir vestrænt áhrifasvæði strandaði í Úkraínu þar sem styrjöld blossaði upp snemma árs 2014. Líkt og nokkur ríki miðausturlanda, s.s. Írak, Sýrland og Líbýa, er Úkraína ónýtt ríki.

Saddam Hussein var drepinn af skjólstæðingum Bandaríkjanna, Gadaffi í Líbýu sömuleiðis. En Janukovits forseti Úkraínu, sem öfl hliðholl Bandaríkjunum og Vestur-Evrópu steyptu af stóli 2014, náði að flýja til Rússlands. Assad Sýrlandsforseti heldur völdum með stuðningi Rússa.

Pútín Rússlandsforseti er fleinn í holdi vestrænnar útþenslu, bæði í miðausturlöndum og Austur-Evrópu. Þess vegna fær Pútin sömu meðferð og Saddam Hussein um aldamótin. Pútin er sakaður um að vera ógn við heimsfriðinn þar sem hann stendur í vegi fyrir bandarískum og vestur-evrópskum hagsmunum.

Vinstrimenn í Bandaríkjunum (jú, þeir eru til þótt ekki séu þeir sósíalistar) segja herferðina gegn Pútín og þeim sem bera blak af honum minna á kommúnistaofsóknir á MacCarty-tímanum. Þeim svíður sérstaklega að stofnanir í bandarískri umræðu, t.d. New York Times og Washington Post, sem búa að langri hefð frjálslyndis, ganga fram af hörku í kommúnistaveiðum nú um stundir.

Valdastéttin í Washington, máttarstólpar úr röðum demókrata og repúblíkana, er sameinuð í andstöðu sinni við Pútín og Rússland. Þegar maður eins og Donald Trump sigrar forsetakosningarnar getur ástæðan ekki verið önnur en að Pútín standi þar að baki. Spurningin er aðeins að finna sönnunargögnin - búa þau til ef ekki vill betur.

Sigur Trump sýnir kreppu valdastéttarinnar í Bandaríkjunum líkt og Brexit afhjúpaði tilvistarvanda Evrópusambandsins. Í stað þess að horfast í augu við vandann, sem er margvíslegur og fjölþátta, er einfaldara að kenna einhverjum einum um ófarirnar. Pútín Rússlandsforseti þjónar því hlutverki ágætlega.

„Þessar upplýsingar eru rangar“

Skólar svindla á PISA-könnun

Brögð eru að því að skólar svindli á PISA-könnun með því að koma í veg fyrir að slakir nemendur taki prófið. Þar með hækkar meðaleinkunn viðkomandi skóla og sveitarstjórnarmenn geta barið sér á brjóst enda bera þeir ábyrgð á grunnskólum.

PISA-prófið, sem má nálgast í viðhengi í frétt mbl.is, er ekki unnið upp úr skólanámsefni heldur er það almennt þekkingarpróf. Til að ná betri árangri í PISA-könnun er ekki hægt að breyta einum þætti skólastarfs heldur verður að taka í gegn alla skólamenninguna: skipulag, kennsluhætti, námsefni, kennara og nemendur. Betri árangur í PISA-könnun gæti þýtt að öðrum markmiðum verði að fórna, s.s. almennri vellíðan nemenda.

Enginn skóli nær betri árangir í PISA-könnun nema með róttækri langtímaáætlun sem beygir skólastarfið undir PISA-mælikvarðann. Það er álitamál hvort það sé æskilegt.

Meðal kennara er rætt um að sumar skólaskrifstofur sveitarfélaga hafi einfaldlega stytt sér leið og beitt sér fyrir því að slakir nemendur tækju ekki PISA-prófið. Ómögulegt er að segja til um hvort slíkt svindl hafi haft áhrif á niðurstöður skóla einstakra sveitarfélaga án undangenginnar könnunar.

Það er vel hægt að komast að því hve PISA-svindlið var umfangsmikið. Það eru til skrár um hvaða nemendur tóku prófið og hægt að bera þær saman við nemendaskrár. Þá liggja fyrir upplýsingar um meðalforföll á hverjum degi, vegna veikinda og annarra fjarvista.

Þótt þessi færsla sé skrifuð í tengslum við frétt um skólahald í Hafnarfirði er ekki þar með sagt að skólaskrifstofan þar í bæ sé sek um PISA-svindl.

Hafnarfjörður hækkar í PISA