Stolinn fundur á Austurvelli og slagsmál

Í gömlu stjórnmálunum á síðustu öld tíðkaðist að stela pólitískum fundum. Það var gert með smölun fólks sem annars hefði ekki mætt og í krafti fjöldans var fundurinn yfirtekinn. Þessi háttur var hafður í baráttu um yfirráð í verkalýðsfélögum og pólitískum félögum og jafnvel náttúruverndarsamtökum.

Sá skilningur varð þó ofan á að félagasamtök ættu að fá að hafa sína fundi í friði. Ef einhverjir voru ósammála eða vildu annað félag þá leyfir félaga- og fundarfrelsi í stjórnarskrá að það sé gert. Þeir funda saman sem eiga eitthvað sameiginlegt, ræða málin eða mótmæla, eftir atvikum, og allt fer siðsamlega fram.

Eftir hrun urðu mótmæli á Austurvelli algeng. Líklega finnst sumum að þeir eigi einkarétt á fundum á Austurvelli alveg eins og þeir eiga einkarétt á sannleikanum. Í gær var búið að auglýsa fund andstæðinga nýrra útlendingalaga á Austurvelli. Í stað þess að leyfa fundinum að fara fram hlupu til götustrákar, t.d. þingmaður Pírata, og reyndu að stela fundi mótmælenda.

Stuldur á fundum er ávísun á slagsmál. Íslensk pólitík batnar ekki við slagsmál.

„Þetta gætu verið glæpamenn“

Athugasemdir

[Jón Valur Jensson, 16.8.2016 kl. 12:39]

Enn sýnir Páll hér glöggskyggni sína -- og er ekkert að fela sannleikann þótt einhverjum þyki hann óþægilegur.

[Skeggi Skaftason, 16.8.2016 kl. 13:47]

Þingmaður Pírata, Helgi Hrafn Gunnarsson, mætti út á Austurvöll til að RÆÐA við mótmælendur.

Mótmælendurnir völdu fundarstaðinn væntanlega til að ná athygli þingmanna, það er furðulegt að yfir því sé kvartað að þingmaður veiti mótmælendum áheyrn og komi út á Austurvöll beinlínis og gagngert í þeim tilgangi að ræða við þá.

[Jón Valur Jensson, 16.8.2016 kl. 18:46]

Þessi þingmaður virðist athyglissjúkur, er sí og æ í fjölmiðlum, hefur reyndar verið hossað svo af Rúv og Fréttablaðinu og 365, að hans oft illa rökstuddi málflutningur fær meira pláss þar en ráðherrar ...  og sjóræningjar hífðir upp í 30 prósent.