RÚV skáldar og stundar aðgerðafréttamennsku

RÚV skáldar fréttir um Evrópusambandið og stundar aðgerðafréttamennsku í Evrópumálum eins og síðasta vika leiddi í ljós þegar RÚV leitaði um allar þorpagrundir að ESB-sinnum í Sjálfstæðisflokknum en kerfisbundið sniðgekk yfirgnæfandi meirihluta sjálfstæðismanna sem andvígir eru ESB-aðild..

RÚV er fagleg ruslakista blaðamanna sem ekki bera lágmarksvirðingu fyrir starfi sínu ef þeir á annað borð kunna eða vita eitthvað um blaðamennsku.

Utanríkisráðherra ríður á vaðið og neitar að veita RÚV viðtal nema í beinni útsendingu, - til að girða fyrir möguleika aðgerðasinna á fréttastofu RÚV að klippa veruleikann til í þágu ESB-sinna. Aðrir ráðherrar hljóta að fylgja í kjölfarið.

„Ef þið klippið ekki allt til“

Hrakfarir ESB-sinna: Sjálfstæðisflokkurinn stærstur

Sjálfstæðisflokkurinn styrkir sig þótt samfylkingaröfl innan og utan flokksins reyni að sprengja upp móðurflokk íslenskra stjórnmála. Undir einarðri forystu Bjarna Benediktssonar í ESB-málinu sópar Sjálfstæðisflokkurinn að sér fylgi og er nú 29 prósent.

ESB-sinnar eins og Þorgerður Katrín Gunnarsdóttir fyrrum varaformaður og Þorsteinn Pálsson fyrrum formaður gengu til liðs við Samfylkinguna og atyrtu Sjálfstæðisflokkinn. Samfylkingin mælist með 14 prósent fylgi, litlu meira en í síðustu kosningum (12,9%).

Hrakfarir ESB-sinna eru staðfestar í þessari könnun. Um fjórðungur þjóðarinnar er með áhuga á ESB-aðild; Samfylking og Björt framtíð bítast um það fylgi.

Auminginn í jöfnunni, VG, sem hvorki er eitt né neitt í ESB-umræðunni, fær minni stuðning núna en í kosningunum fyrir tæpu ári.

40,9% styðja ríkisstjórnina

ESB-sinnar vilja undanþágur, ekki aðild - hlé, en ekki slit

Íslenskir ESB-sinnar eru sérútgáfa; þeir vilja ekki Ísland sæki um aðild að Evrópusambandinu heldur um undanþáguaðild að sambandinu. Í málflutningi ESB-sinna er rík áhersla á allar þær meintu undanþágur sem eru í boði frá Evrópusambandinu.

ESB-sinnar, afsakið, undanþágusinnar, eru svo sannfærðir um undanþágurnar sem eru í boði að jafnvel þegar Evrópusambandið neitar að halda áfram aðlögun Íslands, eins og gerðist á síðasta kjörtíma vegna landbúnaðarmála, þá einfaldlega neita undanþágusinnar að viðurkenna þá staðreynd.

ESB-sinnar urðu engu að síður að gera hlé á aðlögunarferlinu á síðasta kjörtímabili vegna þess að þeir komust hvorki lönd né strönd af þeirri einföldu ástæðu að Evrópusambandið vildi ekki ljá máls á undanþágum. Og nú brjálast undanþágusinnar, sem gerðu sjálfir hlé á ferlinu, vegna þess að það á að afturkalla umsóknina.

Skýrsla Hagfræðistofnunar Háskóla Íslands fékk einróma lof í umræðum á alþingi. Ágúst Þór Árnason skrifaði þann kafla skýrslunnar sem fjallar um aðildarferlið. Hann segir sjálfhætt í aðlögunarferlinu þar sem engar undanþágur fást hjá Evrópusambandinu.

ESB-sinnar, afsakaði, undanþágusinnar,  munu brjálast yfir orðum Ágúst Þórs og fara í manninn en ekki málefnið, líkt og þeir ávallt gera, samanber meðferðina sem formaður Sjálfstæðisflokksins fékk alla síðustu viku.

Ríkisstjórn sem vill láta taka sig alvarlega getur ekki tekið mark á undanþágusinnum, innan þings og utan. Bara alls ekki.

Viðræðunum við ESB sjálfhætt