Ísland bíði eftir Lissabonsáttmálanum

Financial Times hefur eftir fulltrúum Þjóðverja og Frakka í Evrópusambandinu að möguleg innganga Íslands í Sambandið verði að bíða þangað til að Lissabonsáttmálinn fái fullgildingu. Írar höfnuðu sáttmálanum í þjóðaratkvæðagreiðslu en verða látnir greiða aftur atkvæði, líklega í október. Tékkar og Pólverjar hafa ekki heldur samþykkt sáttmálann.

Í Bretlandi er deilt um Lissabonsáttmálann. Íhaldsflokkurinn ætlar að gera andstöðu við sáttmálann að meginefni kosningabaráttu sinnar til Evrópuþingsins í júní. Í frétt BBC er haft eftir William Hague að Íhaldsflokkurinn muni setja sáttmálann í þjóðaratkvæði ef þeir komast í ríkisstjórn áður en sáttmálinn fær fullgildingu allra 27 ríkja ESB.

Athugasemdir

[Haraldur Hansson, 27.4.2009 kl. 13:37]

Til viðbótar því sem þú nefnir Páll er eitt sem gæti sett strik í reikninginn. Þingmaður frá Bæjarlandi kærði samþykkt Lissabon samningsins í þýska þinginu til stjórnarskrárdómstóls. Niðurstöðu er að vænta innan fárra vikna.

Ef þingmaðurinn vinnur málið gæti það leitt til þess að bera þurfi samninginn undir þjóðaratkvæði í Þýskalandi. Það veit enginn hvernig sú atkvæðagreiðsla færi.