Trump-sigur: leiðrétting ekki bakslag

Vinstrimenn segja afgerandi sigur hægrimanna í Bandaríkjunum, undir forystu Donald Trump, vera bakslag. Greiningin byggir á þeirri forsendu að vinstrið sé ,,réttu" megin í sögulegri þróun en hægrimenn séu rangstæðir. Blasir þó við að vinstrimenn hafa verið röngu megin sögunnar allt frá dögum Karls Marx.

Vinstrimenn líta á sigur Trump sem harmleik. Vinstriútgáfan Guardian veitir blaðamönnum sínum áfallahjálp. En sleppum dramatíkinni og ræðum nánar meint bakslag. Fyrrum ráðherra í ríkisstjórn Jóhönnu Sig., einu hreinu vinstristjórnarinnar í lýðveldissögunni, Gylfi Magnússon hagfræðiprófessor, notar einmitt þetta orð, bakslag, í greiningu á sigri Trump. Tvö fyrstu bakslögin sem Gylfi nefnir eru manngert veðurfar, meint hamfarahlýnun af mannavöldum, og Úkraínustríðið.

Trump-sigur er leiðrétting á pólitík, undir yfirskini vísinda, um að maðurinn stjórni veðurfari jarðkringlunnar með útblæstri á koltvísýringi, CO2. Þetta er rangt. Um 97 prósent af koltvísýringi andrúmsloftsins er náttúrulegur, aðeins um 3 prósent stafa af mannlegri starfsemi. Lofttegundin er ómissandi lífríkinu, án CO2 yrði jörðin óbyggileg. Meðalhiti jarðar hefur hækkað um 0,1 gráðu á áratug frá litlu ísöld sem lauk um 1880-1900. Hækkunin nemur einni gráðu á öld sem hvorki er hröð loftslagsbreyting né hamfarir. Vinstrimenn halda á lofti firrunni um manngerða hlýnun til að réttlæta skattahækkanir og inngrip í líf borgaranna með margvíslegu reglugerðafargani. Yfir 1900 vísindamenn skrifa upp á yfirlýsingu um það sem öllum læsum er augljóst: það er engin loftslagsvá.

Trump-sigur er leiðrétting á fádæma hrokafullri utanríkispólitík Bandaríkjanna, Nató og ESB gagnvart Rússlandi. Á Nató-fundi í Búkarest í apríl 2008 var samþykkt sú stefna að Úkraínu skyldi boðin aðild að hernaðarbandalaginu. Gagnvart Rússlandi var Búkarest-samþykktin stríðsyfirlýsing. Efnislega þýddi hún að Nató ætlaði sér að sitja með óvígan her vesturlandamæri Rússlands. Yfirstandandi Úkraínustríð hófst með vestrænni ógnun og lítt dulum hótunum um að beita hervaldi yrðu Rússar með múður. Í greiningu sinni endurtekur Gylfi vestræna drýldni um að Rússland sé ,,bláfátæk, gerspillt bensínstöð með kjarnorkuvopn."    

Gylfi tæpir á fleiri atriðum sem hann telur Trump-sigur vita á, t.d. að erfiðara verður fyrir Hamas-hryðjuverkasamtökin að fremja fjöldamorð. Vinstrimenn eru með böggum hildar að hryðjuverkamenn þeim hugþekkir fái ekki að leika lausum hala og þjóna lund sinni. Það eitt segir nokkra sögu um hvar vinstrið er statt í siðmenningunni.

Eitt atriði nefnir Gylfi þó ekki, sem ætti honum að vera skylt, enda Gylfi háskólaprófessor.

Trump-sigur er leiðrétting á helstefna háskólanna undir formerkjum fjölbreytileika, jafnaðar og inngildingar. Tilfallandi skrifaði um fyrirbærið í vor:

Frjáls gagnrýnin hugsun, og þar af leiðandi frjáls umræða, á undir högg að sækja í háskólasamfélaginu. Frá útlöndum, einkum henni Ameríku, koma boðorðin um fjölbreytileika, jöfnuð og inngildingu (diversity, equity, inclusion). Á yfirborðinu falleg orð en kjarni þeirra er alræðishyggja. Frjáls hugsun skal víkja, banna, ef einhver móðgast. Einkum og sérstaklega ef sá móðgaði segist tilheyra bágindahópi af einhverri sort. Úr verður aumingjavald sem með hugsanalögreglu sér til halds og trausts kæfir frjálsa hugsun. Menn eiga ekki að hugsa gagnrýnið heldur tileinka sér dáðleysi frammi fyrir rétttrúnaði. Kapphlaupið er niður á við, markmiðið er að allir verði botnfall.

Hugmyndafræði vinstrimanna hefur verið ríkjandi alltof, allof lengi. Bandarískir hægrimenn undir forystu Trump reisa skorður við vinstriöfgum sem trölliðið hafa vestrænni stjórnmálamenningu um langan aldur. Löngu tímabært var að leiðrétta hugmyndafræði eymdarinnar. 

 

 

Trump kominn með 294 kjörmenn

Athugasemdir

[Guðmundur Örn Ragnarsson, 8.11.2024 kl. 10:12]

Páll Vilhjálmsson, eins og svo oft hittir þú naglann á höfuðið.

Sigur Trumps gefur Bandaríkjamönnum tækifæri til að leiðrétta svo margt sem vælumenning Demókrata hefur aflagað, bæði innan og utan Bandaríkjanna.

Nú nálgast kosningar á Íslandi. Þá höfum við einnig tækifæri til leiðrétta okkur, að losna út úr væluferli stjórnmálaflokkanna. Því miður virðist samt svo, að flokkarnir ætli að helga sig vælinu áfram.

En svo er Guði fyrir að þakka, að við eigum okkar TRUMP, Arnar Þór Jónsson sem ekki er neinn vælukjói. Hann hefur stofnað stjórnmálaflokk sjálfstæðra Íslendinga, sem afsegja sér öll tengsl við væluflokkana. Ef hann fær völd þá komumst við út úr því bakslagi sem við höfum verið í undanfarin ár.

[Jóhann Elíasson, 8.11.2024 kl. 12:06]

Ég tek 100% undir mjög góða athugasemd Guðmundar Arnar Ragnarssonar.  En það virðist ætla að sanna sig eina ferðina enn að "ENGINN ER SPÁMAÐUR Í EIGIN FÖÐURLANDI", Mér finnst alveg með eindæmum hversu LITLA ATHYGLI framboð Arnars Þórs Jónssonar vekur.  Annað hvort erum við Íslendingar steinsofandi upp til hóa eða landanum er alveg sama um framtíð lands og þjóðar og þar með sína og barnanna sinna......