Loftslagskreddur, skattar, kristni og vanlíðan

Kjarni gróðurhúsakenningarinnar um manngert verður er að brennsla jarðaefnaeldsneytis, bensín og dísil, auki koltvísýring, CO2, í andrúmsloftinu. Koltvísýringur hindrar útöndun jarðarinnar, líkt og gler gróðurhúsa, og hitastig jarðar hækkar.

Kenningin hvílir á þeim flugufæti að CO2, sem er ósýnileg loftegund, hamlar útgeislun, en útöndun jarðar er geislun. Þetta er þekkt eðlisfræði. Flugufóturinn stendur ekki undir gróðurhúsakenningunni.

Ástæðan er m.a. sú að vatnsgufa H2O er þrisvar sinnum öflugri gróðurhúsalofttegund en CO2. Í umhverfinu sjáum við vatnsgufu í skýjum. Blaðamaður Die Zeit, með doktorsgráðu í eðlisfræði, ræddi við einn fremsta loftslagsvísindamann Þjóðverja og forstöðumann veðurfræðistofnunar Max Planck, Bjorn Stevens, og spurði hvort jörðin yrði brátt óbyggileg vegna áhrifa gróðurhúsalofttegunda.

Það er bull sem hefur ekkert með vísindalegan veruleika að gera, svaraði Björn Stevens. (Sjá hér enska útgáfu). Stevens segir skýjahugmyndir gróðurhúsasinna í ætt við skýin í myndabókum fyrir börn. Veruleikinn er flóknari en einfeldningsleg tölvulíkön hamfarasinna.

Spyrja má hvers vegna loftslagskreddur taka ekki á vatnsgufunni, frekar en CO2, til að hamla gróðurhúsaáhrifum. Ástæðan er að engin tök eru á búa til skattpíningu, lög og reglugerðir til að hamla myndun vatnsgufu. En það er hægt að skattleggja og setja lög um koltvísýring. Loftslagstrúin ræðst á garðinn þar sem hann er lægstur og hengir bakara fyrir smið.

Nýtt dæmi um kredduna klædda í pólitík. Helga Barðadóttir fer fyrir sendinefnd Íslands á loftslagsráðstefnu í Egyptalandi. Hún segir:

Okkar helstu væntingar eru að menn haldi áfram að horfa á markmið um eina og hálfa gráðu eins og kallað er. Að hitastig Jarðar hækki ekki meira en um eina og hálfa gráðu frá iðnvæðingu,

Hitahækkun sem Helga nefnir, 1,5 gráður, er nákvæmlega sama hækkun á hita og við fáum ef horft er tilbaka um þúsund ár. Við kristnitök á Íslandi var hitastigið 1,5 gráðum hærra en það er í dag. Vísindalega sannað með borkjörnum úr Grænlandsjökli. 

Helga og sálufélagar tefla fram tölvulíkönum sem segja að hitastig muni hækka nema og aðrir af sama sauðahúsi fái heimildir til að skattleggja og stýra samfélaginu. (Og ferðast á kostnað okkar til Egyptalands). En tölvulíkönin eru hönnuð til að gefa niðurstöðu sem styðja kreddurnar. William Happer loftslagsvísindamaður útskýrir á 5 mín. að tölvulíkönin geta ekki spáð fyrir um hækkun eða lækkun hita til framtíðar.

Ekki aðeins eru tölvulíkön hamfarasinna því marki brennd að vera rusl inn, rusl út heldur hafa þeir endaskipti á orsök og afleiðingu.

,,Breytingar á CO2 í andrúmsloftinu fylgja breytingum á lofthita, sem aftur fylgir yfirborðshita sjávar," skrifar loftslagsvísindamaðurinn Ole Humlum. Það er ekki aukið magn koltvísýrings í andrúmsloftinu sem veldur hækkandi hita heldur er hærra magn koltvísýrings afleiðing hækkandi lofthita.

Hamfarasinnar tala aldrei um að vegna hækkandi koltvísýrings grænkar jörðin. CO2 er aðalfæða plantna. Það spillir trú að skilja samhengi náttúrunnar. Einfaldar trúarkreddur haldast í hendur við valkvæða heimsku.

Einn helsti boðberi kreddunnar, sænski unglingurinn Gréta Thunberg, kom úr skápnum sem öfgavinstrimaður og segir borgaralegu samfélagi stríð á hendur. Trú á bábiljur leiðir óhjákvæmilega til öfga.

Loftslagstrúin, að maðurinn stjórni veðurfarinu, er pólitísk hugmyndafræði og menningarsjúkdómur. Stjórnmálamenn af ómerkilegri gerðinni sjá sér hag í að halda bábiljunni að fólki til að réttlæta skatta og gjöld og lagasetningar.

Það tekur sinn toll af geðheilsu ungmenna þegar fullorðnir tala af heimsendafávisku. ,,Ungviðinu líður verr á sálinni," segir í fréttum. Jón Viðar rýnir teflir fram þeirri tilgátu að áður lærði ungdómurinn um Jesú, kærleika og sáluhjálp.

Trúarstefið í hamfarahyggjunni er kýrskýrt. Stefið er endurómur úr Gamla testamentinu; syndugur maður og reiður guð.

Falskri hugmyndafræði um að heimurinn sé á heljarþröm vegna orkunýtingar mannsins er haldið að ungmennum. Kaldrifjaðir fullorðnir taka lífsgleði æskunnar í gíslingu hindurvitna. Með hjarta úr steini ætla þeir kaldrifjuðu að frelsa heiminn í nafni góðmennsku og skattheimtu. 

Athugasemdir

[Kristinn Sigurjónsson, 5.11.2022 kl. 11:59]

Flott grein hjá Páli

Sem efnafræðingur þá veit ég að þetta er hverju orði sannara.  Fjölmiðlar þegja bara yfir þessu og ráðast á alla sem andmæla þessu bulli.  Fjölmiðlar eru stóra vandamálið í þessu, oftast er sekt þeirra fólgin í að þegja yfir sannleikanum, en nú ráðast þeir á þá sem segja hann og halda lýginni fram.

[Sigurður Kristján Hjaltested, 5.11.2022 kl. 12:03]

Snilldar pistill.

[Emil Þór Emilsson, 5.11.2022 kl. 12:14]

Þetta er bara markaðssetning á sköttum og innleiðing á sósíalisma/kommúnísma, hvaða helvíta maður sér að skattar leysa þetta ekki.

[Guðmundur Jónsson, 5.11.2022 kl. 15:43]

Vel skrifa og satt Páll.  Ég  ætla að vekja athygli á að báðir frambjóðendur til formanns sjálfstæðisflokksins eru illa sýktir af þessari öfgahyggju glóballistanna.

[Gunnar Heiðarsson, 5.11.2022 kl. 15:44]

Nokkuð góð greining hjá þér Páll.

Enn er því þó haldið fram að ef allur ís á Grænlandsjökli bráðni, mun sjávarborð hækka gífurlega. Síðast var þetta nefnt í tengslum við ráðstefnu Artic Circle, hér fyrir skemmstu.

Í myndbandinu sem þú hengir við pistil þinn, um borkjarna á Grænlandsjökli, kemur fram að loks hafi tekist að ná borkjarna sem nær til botns á jöklinum, eða um 3 km. Þetta gefi sögu um hitastig jökulsins allt að 120 þúsund ár aftur í tímann. Þetta afrek segir þó kannski þann stærsta sannleik að jökullinn er a.m.k. 120 þúsund ára gamall, nær aftur fyrir þann tíma er hlýjast var á jörðunni og gróður mestur, nær aftur fyrir þann tíma er risaeðlur gengu um jörðina. Nær reyndar aftur til þess tíma er jarðskorpuhreyfingar færði Grænland að endingu að norðurpól jarðar. Hefur því lifað af löng og heit tímaskeið jarðar, mun heitari en nokkurn tímann á því hlýskeiði sem nú er að taka enda. Hlýnun um einhverjar gráður frá þeim tíma er kaldast var á okkar hlýskeiði mun því tæplega hafa burði til að bræða þennan forna jökul.

[Hörður Þormar, 5.11.2022 kl. 22:34]

Ekki tel ég mig þess umkominn að skera úr um loftslagsdeilur Björns Stevens og Potsdam Institute for Climate Impact (PIK), en finnst nauðsynlegt að birta svar hans við spurningunni um hvort loftslagsvandammálið sé alvarlegt.

Zeit: Are you saying that global warming is not a problem?  

Stevens: It´s huge problem, partly because we know so little about its actual impact. According to the IPCC, whether and where biblical droughts and floods will occur is uncertain for all regions."

Vandamálið er að við fullyrðum svo mikið en vitum svo lítið. Er ekki bara best að hafa vaðið fyrir neðan sig. Það er ekki víst að reykingamaðurinn deyi vegna reykinga, en hættan er sannarlega fyrir hendi. Nú sést varla nokkur maður að reykja og enginn kvartar.

[Þórhallur Pálsson, 5.11.2022 kl. 22:37]

Gunnar Heiðarsson:  Sé það rétt að elsti ís Grænlandsjökuls sé 120 þúsund ára gamall, þá verð ég að hryggja þig og minna á að talið er að risaeðlurnar hafi dáið út fyrir um 60 milljónum ára.  Þarna skakkar hjá þér um 59.880.000 ár !
Talið er að ísöld hafi hafist fyrir um 3 milljónum ára og að hún standi enn.  Við lifum m.ö.o. á síðasta hlýskeiði ísaldar.

[Halldór Egill Guðnason, 6.11.2022 kl. 00:08]

 Thakka fyrir godan pistil og raunsannann.

Kvedja ad sunnan.