Sólveig Anna: Efling er óþarfi

Verkalýðsfélagið Efling er óþarfi, segir Sólveig Anna nýkjörinn formaður, og rekur alla starfsmenn á einu bretti. Launþegar greiða félagsgjöld til Eflingar og fá þjónustu. Þeir sem veita þjónustuna eru starfsmenn Eflingar. Engir starfsmenn, engin þjónusta.

Þegar starfsmenn verkalýðsfélagsins eru á bak og burt situr Sólveig Anna ein á digrum sjóðum sem eru félagsgjöldin. Hún getur látið Andra í Jæja fá aðrar 30 milljónir, Gunnar Smári þarf líka skotsilfur og Viðar vinnu. Tilgangur stéttafélags er aftur annar en að hlaða undir hina fáu á kostnað hinna mörgu.

Félagsmenn Eflingar fá enga þjónustu en Sólveig Anna og vinir hennar maka krókinn. Almennir félagsmenn eru aukaatriði, afkoma sósíalísku yfirstéttarinnar er aðalatriði. Efling er mjólkurkú til að örfáir sósíalistar fái þægilega innivinnu.

Ef hægt er að leggja niður verkalýðsfélag si svona vaknar spurningin hvort stéttafélög séu ekki óþarfi. Þegar stjórn verkalýðsfélags er harður kapítalískur húsbóndi og stundar hópuppsagnir eftir hentugleikum - og verkalýðshreyfingin lætur það yfir sig ganga - tja, þá er verkalýðshreyfingin í heild sinni óþarfi.

 

Athugasemdir

[Halldór Jónsson, 14.4.2022 kl. 10:08]

Loks er gatan greið fyrir Gunnar Smára. Hann er búinn að bíða lengi þessi ritsnillingur sem koninn er tími á að fái eitthvað fyrir sinn snúð.

[Grímur Kjartansson, 14.4.2022 kl. 12:11]

Leikur á borði fyrir trúfélagið Zuism
að breyta starfseminni í stéttarfélag og innheimta stéttarfélagsgjöld í stað þess að standa í stappi við ríkið vegna sóknargjalda

[Ragnhildur Kolka, 14.4.2022 kl. 17:54]

Ætli atvinnurekendur séu ekki himinlifandi yfir þessu fordæmi sem Sólveig Anna gefur þeim. 

[Tryggvi L. Skjaldarson, 15.4.2022 kl. 08:50]

Atvinnurekendur sem byggja afkomu sína og velsæld á ódýru vinnuafli sjá fram á breytta tíma.  Stjórnvöld sjá líka fram á að stefnan gagnvart hinum lægst launuðu er ekki á vetur setjandi. Spurning hvort Íslandsbankasukkið sé boltinn sem kemur skriðunni af stað eða verður það Sólveig Anna?