Aðalsteinn og siðareglur blaðamanna

Blaðamannafélag Íslands efnir til málþings um blaðamennsku. Hver talar þar um siðareglur blaðamanna? Jú, Aðalsteinn Kjartansson á Stundinni sem er sakborningur í lögreglurannsókn á byrlun og gagnastuldi.

Engar siðareglur blaðamanna í víðri veröld heimila byrlun og stuld til að afla frétta. Samsæri um að byrla og stela var skipulagt á RÚV í apríl á síðasta ári þegar Aðalsteinn var þar enn fréttamaður. Kortéri fyrir glæp var Aðalsteinn fluttur á Stundina til að vinna úr afrakstri glæpsins. Engar siðarelgur blaðamanna réttlæta slík vinnubrögð.

RSK-miðlar (RÚV, Stundin, Kjarninn) nýttu sér brotna manneskju, sem kölluð er X í rannsókn lögreglu. X er verktakinn sem sá um byrlun og gagnastuld. Um meðferð RSK-miðla á X segir í lögregluskýrslu:

X kemur til þeirra á sennilega erfiðasta tímabili lífs síns, væntanlega mjög viðkvæmur og hugsanlega í hefndarhug. Í stað þess að staldra aðeins við og veita X stuðning og hjálp, virðast fjölmiðlar fara strax í að nýta sér augljós brot hans sér í hag, bæði faglega og fjárhagslega. Þeir huga ekki að því að þarna sé einstaklingur í viðkvæmri stöðu og sýna af sér algjört skeytingarleysi um hans líðan og líf.

Í þriðju grein siðareglna Blaðamannafélags Íslands segir: 

Blaðamaður vandar upplýsingaöflun sína, úrvinnslu og framsetningu svo sem kostur er og sýnir fyllstu tillitssemi í vandasömum málum. Hann forðast allt, sem valdið getur saklausu fólki, eða fólki sem á um sárt að binda, óþarfa sársauka eða vanvirðu.

Mun Aðalsteinn játa á málþinginu að hafa virt siðareglur að vettugi? Þeir eru ekki stórir í sniðum, hvorki sem einstaklingar né blaðamenn, sem nýta sér neyð og bágindi annarra. Aðalsteinn mun hvorki játa né biðjast afsökunar. Þegar hann er þýfgaður um lögbrot og siðrof svarar Aðalsteinn því til að hann sé hafinn yfir lög og siðareglur. En hann er meira en viljugur að segja öðrum til syndanna.

Aðalsteinn er varaformaður Blaðamannafélagsins. Formaðurinn er frá RÚV. Sambærilegt og að láta brennuvarga um brunavarnir. 

Ekki kemur fram hvort einhver flytji lokaávarp málþings blaðamanna. Við hæfi að það yrði Stefán útvarpsstjóri og fyrrum lögreglustjóri. Ávarp hans bæri yfirskriftina ,,Með byrlun og stuldi skal land byggja."

 

 

 

Athugasemdir

[Jón Steinar Ragnarsson, 31.3.2022 kl. 18:48]

Til hvers eru siðareglur blaðamanna þegar þær eru ekki lög heldur minnisatriði? Engin viðurlög eru við brotum á þessum þumalputtareglum og því enginn fælingarmáttur, enda virðist enginn taka þær alvarlega.

Blaðamannafélagið er gagnslaust apparat. Lög um mannuð, velsæmd og persónuvernd á bókum og innbyggt skikk, réttlætistilfinning og siðgæði sér um rest.

Lögjafinn tekur á alvarlegum brotum byggt á landslögum. Blaðamannafélagið er einn allherjar þykistuleikur og liggaliggalá utan um gagnslaus stöðugildi og fjáraustur.

[Jón Steinar Ragnarsson, 31.3.2022 kl. 18:57]

Blaðamannafélagið er í besta falli úrelt, því hefðbundin fjölmiðlun er dauð og enginn nær yfir hina opnu fjölmiðlun sem nú er, þar sem allir og amma mín geta verið með poköst og fréttamiðlun, hver með sínu spinni. Lögin ná þó ennþá yfir fólk, svo það er ekkert frumskógarlögmál sem ræður.

Tilhneiging hins opinbera til að stýra umræðu og skoðunum er og verður enn fyrir hendi eins og á einveldistíma RUV. Þar eru opin hugtök eins og hatursorðræða og upplýsingaóreiða óspart notuð. Blaðamannafélagið er alveg um borð þar. Þeir sem segjast vernda hlutleysi eru pólitískari og hlutdrægari samkvæmt eðli.