Ísland eftir amerísku öldina

Ameríska öldin sem gekk í garð eftir seinna stríð leið undir lok á flugvellinum í Kabúl, er ráðandi frásögn eftir Afganistanklúðrið. Ameríska heimsveldið er liðið undir lok, segir í uppslætti í Telegraph. Ógrynni álíka fréttaskýringa eru í öllum heimsins miðlum.

Það getur verið, en er hvergi víst, að Bandaríkin verði fráhverf hlutverki alheimslögreglu. Ein 14 ár eru frá frægri ræðu Valdimír Pútín Rússlandsforseta á öryggisráðstefnunni í Munchen þar sem hann harmaði bandarískan og vestrænan hroka í einpóla heimi. Líklega var skálað í Kreml þegar heimsfjölmiðlar veltu sér upp úr ræmum frá flugvellinum í Kabúl. 

Enn er óvíst hvort ameríska öldin sé runnin sitt skeið. Ekkert ríki kemst í hálfkvist við hernaðarmátt stórveldisins. Aftur er nánast öruggt að alþjóðahyggja, glóbalismi, er horfin af sviðinu. Bandaríkin og Evrópusambandið reyndu fyrir sér með glóbalisma á jafn ólíkum stöðum og Úkraínu, Írak, Sýrlandi, Líbýu og Afganistan. Eftir Kabúl er glóbalismi dautt hross.

Landafræði breytist ekki þótt hugmyndafræði kollvarpist. Á meðan Bandaríkin sleikja sárin og gera upp við sig framtíðarhorfur munu stjórnvöld í Washington treysta varnarlínuna sem liggur næst bandaríska meginlandinu. Ný hugmyndafræði, kennd við raunsæi, er þegar til á teikniborðinu.

Ísland situr í túngarði Bandaríkjanna landfræðilega. Það má gera ráð fyrir að Sámur frændi sæki Frón heim og búi í haginn fyrir nýtt hlutverk stórveldisins á alþjóðavísu.

 

 

Athugasemdir

[Jón Steinar Ragnarsson, 18.8.2021 kl. 19:27]

Bandarikjamenn ættu kannski að fara að einbeita sér að Kínverjum, áður en það verður of seint. Þessir atburðir eru vatn á millu kommúnistaflokksins, svo þeir eru þegar farnir að tala um að labba inn í Taíwan.

Stærstu óvinir bandaríkjanna eru þó innan þeirra og ráða ríkjum í Hvíta Húsinu og báðum þingdeildum eins og er.

[Grímur Kjartansson, 18.8.2021 kl. 19:49]

Kína hefur reynt mikið að koma sér fyrir á Grænlandi vegna málma sem þar er að finna í jörðu.
Því hefur verið haldið fram að í Afganistan sé mikið magn af Litíum 
ef það reynist rétt þá gæti áhugi á þessu fátæka landi gjörbreytast glóbalt

[Heimir Lárusson Fjeldsted, 18.8.2021 kl. 20:40]

Veri Sámur velkominn.

[Helga Kristjánsdóttir, 19.8.2021 kl. 02:13]

Víst er hernaðarmáttur Bandaríkjanna er öflugastur á hnettinum og nokkuð víst að honum verður ekki beitt gegn erkióvininum sem býr nánast i sama stigagangi. En af þeim fréttum sem ég minnist,lognum eða sönnum, er forsetinn Biden í slagtogi með Kína sem ku hafa lagt honum lið í forsetakosningunum.