Píratar og tveir formenn verða undir í MDE-málinu

Píratar ætluðu sér ökumannssætið í vandlætingarvagninum er færi á blússferð eftir MDE-dóminn í Evrópu vegna excel-skjals um skipun í landsrétt fyrir þremur árum. Siða-Sunna steig á stokk og krafðist afsagnar Katrínar forsætis. RÚV hlóð undir, eins og við var að búast, bjó í haginn fyrir lamandi réttaróvissu og pólitískt blóðbað í beinni útsendingu.

Aftursætisökumenn í Sunnuvagni urðu strax Logi í Samfó, sem er svo illa gáttaður að hann þarf aðstoð í kjörklefanum og formaður Viðreisnar, sem ýmist spilar golf í Hveragerði í sóttkví eða fær afskrifuð lán í þrotabúi Kaupþings utan sóttkvíar.

En málsefnin í MDE-dómnum létu á sér standa. Sérfræðingar, vandir að virðingu sinni, finna varla flugufót fyrir staðhæfingum ökuþóranna þriggja. Stofnandi Vinstri grænna og siðameistari, Ögmundur Jónasson, klykkir út með að málið snúist um dópaðan bílstjóra í Kópavogi og sýndardómstól í Evrópu sem heiðrar mannréttindaböðul í Tyrklandi en níðir réttvísina á Fróni.

Tvennt ólíkt er að stökkva á vandlætingarvagninn og verða undir honum. Siða-Sunna, Samfó-Logi og Tobba Kata sitja dösuð í vegkantinum og vita hvorki í þennan heim né annan.

Dópaður bílstjóri og Mannréttindadómstóllinn

Athugasemdir

[Flosi Eiríksson, 4.12.2020 kl. 09:56]

Sæll Páll - afhverju finnst þér í lagi að uppnefna fólk eða snúa út úr nöfnum þeirra þegar þú ert að setja fram þín sjónarmið í samfélagsumræðunni ?

[Páll Vilhjálmsson, 4.12.2020 kl. 10:41]

Blogg er teikning með orðum, Flosi. Af hverju hnýtir þú ekki í skopteiknara fjölmiðla sem ýkja andlitsdrætti og líkamshlutföll viðfangsefna sinna?

[Grímur Kjartansson, 4.12.2020 kl. 10:47]

Maður skynjaði alveg spenningin og eftirvæntinguna í RUV  kl 8 á þriðjudagsmorgunin. Það átti sko að hjóla í mann og annan, en svo fjarði þetta hratt út og náði lágmarki í kvöldfréttum með viðtölum við hana Rósu og Sunnu, en þessa sömu Rósu hafði Heimir Már hjá Stöð 2 séð sig tilneyddan til að stöðva mjög ákveðið því bullið í henni gekk alveg fram af honum og er hann þó ýmsu vanur.

[Flosi Eiríksson, 4.12.2020 kl. 10:53]

Ég var ekkert að hnýta í þig Páll, lék bara forvitni á því af hverju þær þætti það eðlilegur stíll að nota uppnefni í umræðum.  Hafði ekki hugarflug til að sjá að þú teldir þig vera að teikna í orðum - og þar af leiðandi væru þetta mannasiðir. En hver metur það fyrir sig.

[Hörður Þormar, 4.12.2020 kl. 17:38]

Því miður er það allt of algengt að menn uppnefni þá sem þeim er í nöp við. Það er þó engum til sóma.

Adolf Hitler var ekki hátt skrifaður af Bretum á stríðsárunum, en í BBC var hann aldrei kallaður annað en "Herr Hitler", annað þótti ekki sæmandi.

[Sigfús Ómar Höskuldsson, 4.12.2020 kl. 18:10]

Þannig að höfundur er þá bara búinn að vera grínast öll árin með skrifum sínum eins þessi :https://www.ruv.is/frett/besti-flokkurinn-haettur-djok

Vissi að ég hefði ekki átt að taka höfund alvarlega.....

Hélt um stund að höfundi væri alvara með því að úthúða öllum öðrum stjórnmálaflokkum en þann sem átti dæmdan Dómsmálaráðherra sem braut mannréttindi.

En svo var þetta bara allt grín.

[Óskar Kristinsson, 4.12.2020 kl. 18:21]

Það verður skítlegur dagur Siða sunnu og braggadagur!!!