Trump með vísindin með sér: COVID-19 er falsfrétt

Þrír vísindamenn frá háborgum heilbrigðisvísinda í Oxford, Harvard og Stanford gefa yfirlýsingu sem staðfestir stefnu Trump forseta í bak og fyrir. COVID-19 er ýkt hættuástand þar sem meðferðin, lokanir og höft, gerir samfélaginu meira illt en gott.

Sunetra Gupta, Jay Bhattacharya og Martin Kulldorff gefa út yfirlýsinguna Það er til önnur leið.  Í fáum orðum skal ekki loka og læsa samfélögum, heldur verja þá veiku og öldruðu á meðan hjarðónæmi næst.

Ef það er tilfellið, sem virðist vera, að Trump, aldraður og í yfirþyngd, kemur úr COVID-19 hress og sprækur er forsetinn lifandi sönnun yfirlýsingar vísindamannanna.

Með stílfærslu Trump: COVID-19 er falsfrétt vinstrimanna og frjálslyndra.

ps.

sá sem hér skrifar hefur verið hallur undir lok, lok og læs stefnuna. Rök vísindamannanna þriggja eru aftur býsna sannfærandi. En áður en sinnaskiptin ganga í gegn verður að hlusta á andmæli. Við hlustum, vegum og metum, og komumst að niðurstöðu. Burtséð frá Trump. 

 

Trump útskrifast af sjúkrahúsinu í kvöld

Athugasemdir

[Gunnar Heiðarsson, 6.10.2020 kl. 00:46]

Það er nokkuð rétt hjá þér Páll, við eigum að hlusta, vega og meta og komast þannig að niðurstöðu. Þar eiga engir stjórnmálamenn að hafa áhrif, hvorki Trump né Svandís, eða nokkur þar á milli. Sérfræðingar hafa gjarnan einhverja menntun að baki sér, sem hjálpar þeim að mynda sér skoðun, en varasamt er einnig að hlusta á þá, sér í lagi þar sem himinn og haf er á milli málflutnings margra þeirra. Staðreyndin er að þekking á veirunni er það takmörkuð enn að fáir ef nokkrir vita hvernig hún mun fram leiðast. Jafnvel þó sumir sérfræðingar, bæði hérlendis sem erlendis telji sig hafa höndlað sannleikann.

Til að vega  og meta höfum við þó staðreyndir, þ.e. það sem komið er fram til þessa. Flest þekkjum við samborgara sem hafa smitast, sumir illa en aðrir með væg einkenni og sumir fundið lítið fyrir eftirköstum meðan aðrir eru enn að berjast við mjög slæm eftirköst. Við vitum líka að eftirköstin eru ekki í beinni tengingu við hversu illa fólk veikist, að þeir sem fá væg einkenni sjúkdómsins geta orðið fyrir miklum eftirköstum. Enn vitum við ekki hversu lengi þau eftirköst muni vara. Sum okkar þekkja einnig verstu afleiðingu veirunnar.

Við vitum líka að engin örugg lækning er enn til við sjúkdómnum og að enn er ekki til lyf til bólusetningar gegn honum. Því er eina vörnin sú að reyna að forðast smit. Þetta eru þær staðreyndir sem við höfum í hendi og út frá þeim er hægt að mynda sér skoðun.

Þú nefnir að að verja eigi veika og aldraða meðan hjarðofnæmi næst. Hvernig slíkt skal gert geri ég mér ekki grein fyrir. Hvort loka á það fólk inni í einangrun og það starfsfólk sem því sinnir, frá umheiminum, þar til hjarðofnæmi hefur myndast. Hvað svo? Þetta fólk myndar ekki hjarðofnæmi og um leið og opnað er aftur mun það geta sýkst, með tilheyrandi afleiðingum. En það eru ekki bara veikir og aldraðir sem sýkjast illa. Fjöldi fólks er með undirliggjandi sjúkdóma, jafnvel án vitneskju um það. Þá er ljóst að fullfrískt ungt fólk hefur veikst mjög illa og sumt látið lífið.

Sjálfur er ég hvorki gamall né veikur, en hef undirliggjandi sjúkdóm sem greindist fyrir stuttu síðan, sjúkdóm sem ég hef sennilega gengið með alla æfi án vitneskju um það. Með réttri meðhöndlun get ég lifað eðlilegu lífi og stundað mína vinnu sem ekkert sé. Ég er hins vegar ekki tilbúinn að ganga í það verk að "búa til hjarðofnæmi" gegn covid 19. Ég er heldur ekki tilbúinn að láta loka mig inn á stofnun svo mánuðum skiptir, meðan aðrir vinna það "verk". Fram til þessa hef ég getað lifað eins eðlilegu lífi og hver annar, miðað við ástandið. Fer varlega, hlýði Víði og vona það besta. Hef getað stundað mína vinnu og lagt mitt fram til að halda þjóðfélaginu gangandi.

Við verðum að sætta okkur við ástandið. Þessi veira er ekki verk stjórnmálamanna og jafnvel þó viðbrögð þeirra um heiminn hafi verið misjöfn og sum gagnrýniverð, er ekki hægt að kenna þeim um ástandið. Svona heimsfaraldri fylgir auðvitað efnahagsleg áföll og þar geta stjórnmálamenn lagt eitthvað að mörkum. Enginn getur þó leyst þann vanda að fullu.

Þreyjum þorrann og vonum það besta.

[Jón Þórhallsson, 6.10.2020 kl. 07:46]

Ég tel að fólk ætti að kynna sér skoðun tuga vísindamana með Dr. gráður sem að vilja meina að það sé

5G-símturnakerfið sem að er að senda frá sér óæskilega geislavirkni

sem að hefur þau áhrfi á fólk sem að mælilst sem covid-einkenni;

en að það sé ekki þannig að um sé að ræða einhverjar sýklapöddur sem að séu svifandi um inn um öndunarfæri fólks eða með óhreinum höndum: 

https://www.youtube.com/watch?v=yNBYF2ry6lc&feature=emb_logo&fbclid=IwAR3FKQFHxTYXaVtH53bJ3TwWTRYVDBdRAFaYLnIrUTHIc4Hwmw4gQ237y-c

[Ómar Ragnarsson, 6.10.2020 kl. 08:36]

Það á eftir að útskýra þá "falsfrétt" að Boris Johnson, miklu yngri maður en Trump, var kominn í öndunarvél.  Og síðan hinar milljón falsfréttirnar um þá sem þegar eru látnir. Og um hjarðónæmið, sem aldrei náðist í Svíþjóð. 

[Þorsteinn Siglaugsson, 6.10.2020 kl. 10:52]

Nýjasta mat WHO sem birtist í gær er að 760 milljónir hafi þegar smitast. Ein milljón hefur látist. Það er 0,13% dánarhlutfall. Og það verður ekki annað séð en að það fari stöðugt lækkandi.

Á sama tíma benda áætlanir SÞ til að vegna sóttvarnaráðstafana gætu níu milljón manns til viðbótar farist úr hungri á þessu og næsta ári. Það eru miklu fleiri en munu nokkurn tíma deyja úr covid, jafnvel þótt engar ráðstafanir væru viðhafðar.

Það að benda á einstakt tilfelli eins og Boris Johnson og halda að það sanni eitthvað er auðvitað bara þrugl. Það er alger undantekning ef fólk undir sjötugu deyr úr þessum sjúkdómi. Kannski einn á móti hundrað þúsund.

[Ómar Geirsson, 6.10.2020 kl. 11:09]

Páll.

Eini gallinn við þessa færslu þína er að þú ert ekki Trump, og þér er mætavel ljóst hvað gerist ef Trumpistar heimsins ná að móta og stjórna dægurumræðunni.

Greinin sem þú vísar í er öfgalaus og laus við rangfærslur málaliðanna sem grafa undan sóttvörnum vestrænna landa.

Ekkert í henni réttlætir fyrirsögn þína, og þú veist það, enda útskýrir þú tilgang þinn, að fá Tumpista athygli.

Gunnar Heiðarson benti á veikleika þeirrar aðferða sem vísindamennirnir mæla með, sem er aðeins einn, að það er ekki framkvæmanlegt að loka á stóra hópa í samfélaginu.

Og í ljósi þess sem þeir segja "Fortunately, our understanding of the virus is growing. We know that vulnerability to death from COVID-19 is more than a thousand-fold higher in the old and infirm than the young." þá má spyrja sig, þolir siðmenningin drepsótt sem ekki er gerð tilraun til að verjast?

Praktísk spurning fyrir þá sem hafa það ekki innra með sér að sjá hvað það er rangt að leyfa farsótt með þeim rökum að hún drepur aðeins hluta af samfélaginu.

Síðan er ekki vitað hvernig seinni bylgjan leikur yngra fólk.

Í spænsku veikinni þá drap seinni bylgjan það, það er ekkert sem segir að þessi gerir það ekki líka.

Þá höfðu menn ekki veirulyfin sem við höfum í dag, það má vel vera að það hefði enginn fallið í spænsku veikinni ef þau hefðu þá verið tiltæk læknum.

Og þetta er kjarninn Páll, þraukum á meðan læknavísindin ná tökum á veiruskrattanum.

Það er sjúkt að opna á veiruna korteri fyrir lækningu.

Kveðja að austan.

[FORNLEIFUR, 6.10.2020 kl. 11:32]

Æi, Guð minn. Ganga menn öskrandi um götur Reykjavíkur, eða er þessi bloggari lokaður inni í einhverjum andlegum kjallara?

[Ómar Geirsson, 6.10.2020 kl. 16:35]

Fornleifur kæri.

Svona láta menn ekki á Moggablogginu.

Við erum samfélag sem virðum hvort annað.

Sem þýðir að við virðum hvort annað.

Kveðja að austan.

[Benedikt Halldórsson, 6.10.2020 kl. 16:42]

Segi það sama Ómar. Ef menn hafa ekkert að segja er engin ástæða til að kommenta til þess eins að ulla.