Fréttamenn RÚV falla á blaðamennskuprófi

Engin frétt er betri en heimildin fyrir henni, er meginregla í blaðamennsku. Sá sem ekki kann þessa reglu er ónýtur blaðamaður. Vinir og félagar Helga Seljan í stjórn Félags fréttamann senda frá sér stuðningsyfirlýsingu vegna þess að Helgi sagði frétt - um lögbrot Samherja - sem byggði á skáldskap en ekki heimild.

Helgi segist hafa heimild, skýrslu Verðlagsstofu skiptaverðs, en sú skýrsla er einfaldlega ekki til. Það er skorað á Helga að birta skýrsluna en hann þegir þunnu hljóði.

Fréttastjóri RÚV, ásamt útvarpsstjóra, bera blak af Helga, auk stjórnar Félags fréttamanna. Allt Efstaleiti er þar með meðsekt Helga í að skálda upp lögbrot fyrirtækis út í bæ.

Rúsínan í pylsuendanum. Í aðalfréttatíma RÚV kl. 18 í kvöld var ekki ein einasta frétt um skálduðu heimildina og Helga. RÚV þegir um aðalfrétt dagsins, - en sagði okkur að laxveiði hafði verið nokkuð góð í Hofsá í sumar. Efstaleiti er orðið söguvettvangur Kafka.

Gagnrýna Samherja harðlega

Athugasemdir

[Gunnar Heiðarsson, 11.8.2020 kl. 19:26]

Fréttastofa ruv hamast við að skrifa lokakafla ríkisrekinnar fréttastofu á Íslandi. Hvernig fréttastofan, undir handleiðslu fréttastjóra, tekur afstöðu í málinu, án þess að skoða hvort staðhæfingar Samherja byggi á einhverjum grunni, hlýtur að leiða til lokunnar hennar þegar sannleikurinn hefur verið opinberaður.

Þetta er svo sem ekki í fyrsta skipti sem þessi fréttamaður hefur farið hamförum í þjóðfélaginu, ekki fyrsta sinn sem fólk hefur þurft um sárt að binda vegna framgöngu hans. Þetta er hins vegar í fyrsta sinn sem hann ræðst með fölsunnum gegn fyrirtæki sem hefur þor og burði til að standa gegn ofurvaldi ríkisrekinnar fréttastofu. Þar skaut Helgi langt yfir markið.

[Þorsteinn Siglaugsson, 11.8.2020 kl. 19:31]

Ef það kemur á daginn að skýrslan sé til, þá er Helgi með pálmann í höndunum. Ef ekki, ja, þá er hann með eitthvað annað í höndunum.

[Guðmundur Ásgeirsson, 11.8.2020 kl. 20:26]

Þorsteinn. Það er komið á daginn að skýrslan er til.

Segist hafa fengið sömu gögn og Helgi Seljan - Vísir

"Guðmundur [Ragnarsson], sem sat í úrskurðarnefnd sjómanna og útvegsmanna, segist geta staðfest að hann fékk umrædda skýrslu frá Verðlagsstofu. Hann hafi jafnframt skrifað grein í tímarit VM sem byggði á skýrslunni þar sem fjallað var um verðmun á sjávarafla milli Íslands og annarra landa."

[Sigfús Ómar Höskuldsson, 11.8.2020 kl. 20:57]

Oft hefur höfundur verið fyrirsjánlegur með á stundum góða pistla sína.

Núna var það séð langt fyrir hornið á hvaða vagn höfundur hoppaði á.

[Guðmundur Ásgeirsson, 11.8.2020 kl. 21:08]

Sá vagn fór fljótt út í skurð.

[Sigfús Ómar Höskuldsson, 11.8.2020 kl. 21:34]

Þú átt kollgátuna í kvöld Guðmundur :)

[Kristinn Bjarnason, 12.8.2020 kl. 06:28]

Er þessi skýrsla einhverjir pappírar sem menn skiptast á í þröngum vinahópi. Var ekki hæstiréttur búinn að dæma í þessu.