Milljarðar til ferðaþjónustunnar

Á hverjum mánuði yfir sumartímann fara milli 60 og 70 þúsund Íslendinga til útlanda. Í ár fara þeir ekki neitt vegna farsóttar í útlöndum.

Í venjulegu árferði eyða þessir 160 - 210 þúsund landsmenn, sem ferðast til útlanda á sumrin, einhverjum milljörðum króna. Íslenskir ferðamenn eru alþjóðalega þekktar eyðsluklær.

Landsmenn munu halda áfram að ferðast. En núna innanlands.

Ferðaþjónustan situr á gullnámu. Áður er sumarið er úti biðja menn þar á bæ um framhald á einangrun landsins.

Katrín við Spiegel: „Komum tvíefld til baka“

Athugasemdir

[Þorsteinn Siglaugsson, 27.4.2020 kl. 17:21]

Heildarfjöldi erlendra ferðamanna 2019 var tvær milljónir. Þetta eru þá um 10% af þeim fjölda. Út frá tölunum er þá tekjufallið í ferðaþjónustunni 90%. Já, það er auðvitað ákaflega líklegt að ferðaþjónustan biðji um framhald á því ástandi!

[Sigurður I B Guðmundsson, 27.4.2020 kl. 17:24]

Er ekki núna lag fyrir hótel og bændagistinguna að bjóða t.d. Júni tilboð og fá landann til sín??

[Páll Vilhjálmsson, 27.4.2020 kl. 17:58]

Bloggfærslan er af tegundinni ,,glasið er hálf-fullt." 

Augljóst er að ferðaþjónustan verður fyrir áfalli. En, að gefnum fyrirsjáanlegum hömlum, munu margir Íslendingar ferðast innanlands og mun fleiri en í venjulegu árferði. Þá gildir að sjá tækifærin fremur en leggjast í bölmóð.

Ferðaþjónusta á landsbyggðinni nýtur fremur góðs af innlendum ferðamönnum en gisti- og þjónustuaðilar á höfuðborgarsvæðinu.

Farsóttin var ekki okkar val. En við veljum okkur viðbrögðin.

[Þorsteinn Siglaugsson, 28.4.2020 kl. 10:31]

Vitanlega er mikilvægt að hvetja fólk til að ferðast innanlands. En það bjargar ósköp litlu og það er fráleitt að ferðaþjónustan óski þess að ástandið verði viðvarandi.

[Steinarr Kr. , 28.4.2020 kl. 14:27]

Hef lítinn áhuga á að ferðast innanlands á verðforsendum frá því fyrir veiru og er ekki tilbúinn að borga sama verð fyrir sveitahótel og 4 stjörnu hótel í miðborg stórborgar.

[Þorsteinn Siglaugsson, 28.4.2020 kl. 20:13]

Það eru örugglega fleiri sem hugsa eins og þú Steinarr. Maður er ekki vanur að spandera miklu í hótel og veitingar þegar ferðast er innanlands. Og fáir fara í verslunarferðir út á land.