Mínar staðreyndir og þínar

Skoðanir án staðreynda eru eins og fiskur á þurru landi. Staðreynir einar og sér eru þó ekki til þess fallnar að gára vatnið, fá fólk til að skipta um skoðun.

Samhengi staðreynda og ályktanir sem af þeim eru dregnar eiga það til að hreyfa við fólki, sé sæmilega staðið að verki.

Í hagfræði eru margar staðreyndir, ekki síst þær sem fengnar eru með tölfræði. Um þá sem iðka greinina er sagt að aldrei taki tveir hagfræðingar tal saman að ekki séu þrjár skoðanir á lofti í senn.

Nú ræða fjármálaráðherra og talsmenn verkalýðshreyfingarinnar saman og eru ekki á eitt sáttir um hlutfall fullvinnandi launþega með undir 300 þús. krónur í mánaðarlaun. Munurinn liggur í tveim þekktum staðreyndum, heildartekjum í einn stað og í annan stað dagvinnulaunum.

Á yfirborðinu snýst deilan um hvaða staðreyndir eigi heima í umræðunni. Í reynd er tekist á um hvor málsaðila eigi sviðið. Hávaðinn og bergmálið í samfélagsfjölmiðlum er aðalatriðið. Staðreyndir eru til skrauts.

Rifist um mismunandi staðreyndir

Athugasemdir

[Ragnhildur Kolka, 4.1.2019 kl. 00:29]

Talskona Trump notaði hugtakið - alternative facts- og fékk bágt fyrir af pólitískum andstæðingum. Ég sé ekki betur en að þessi umræða snúist einmitt um -alternative facts.

[Halldór Egill Guðnason, 4.1.2019 kl. 00:33]

"Valkvæðar staðreyndir" Ragnhildur. ;-)

[Halldór Egill Guðnason, 4.1.2019 kl. 01:48]

 Sú staðreynd, að ekki sé hægt að lifa af dagvinnulaunum á Íslandi, er til skammar. Er ekki kominn tími til að horfast í augu við þá staðreynd? Það þurfa ekki allir launahækkun. Það er líka staðreynd. Hvernig væri að taka Þjóðarsátt á þetta og hætta þessum skærum, erjum og óvild í hvors annars garð? Útúrsnúningar hafa aldrei leitt af sér góða niðurstöðu og flestallir skaðast af orðhengilshætti og þvaðri því sem af því hlýst.

 Góðar stundir, með kveðju að sunnan.

[Einar Sveinn Hálfdánarson, 4.1.2019 kl. 11:17]

Staðreynd er einföld. Það þurfa ekki allir launahækkun. -Af hverju ekki að hafa hana duglega, t.d. lágmárk milljón á mann í dagvinnu? svo þarf að kenna öðrum þjóðum íslensku hagfræðina; laun eru ákvörðunaratriði, ekki það sem framleiðslan stendur undir. Þá geta Þjóðverjar aldeilis bætt í lágmarkslaunin sem eru rúmur þúsundkall á tímann.