Nýjasti aumingjahópurinn: miðaldra karlkennarar

Auðvitað hlaut að koma að því. Þeir sem áður voru tákn valdsins í samfélaginu, miðaldra karlar, eru orðnir að fórnarlömbum. Miðaldra karlar eru stærsti hópurinn í röðum karlkennara, sem aftur er minnihlutahópur í kennarastéttinni. Eins og á æ fleiri vinnustöðum er sterkara kynið, konur, ráðandi í skólum landsins.

Miðaldra karlkennarar eru líklegastir til að verða fyrir einelti, andlegu ofbeldi og kynferðislegri áreitni í starfi, samkvæmt forsíðuuppslætti Morgunblaðsins. Frá 17. maí 2017 eru þeir offisíellt aumingjahópur.

Fyrirsjáanlega verða gerðar frekari rannsóknir um einkenni yngsta aumingjahópsins þar sem ólíkum hliðum eymdarinnar eru gerð skil. Eintök úr hópnum verða leidd fram í fjölmiðlum sem varpa ljósi á fyrirbærið; vælandi miðaldra karlar eru gott sjónvarpsefni.

Verst af öllu er að karlaborðin í kennarastofum landsins verða ekki lengur vettvangur umræðu um pólitík, fótbolta og sterkara kynið heldur játningahlaðborð ofsótts minnihlutahóps á viagra-aldri. Maður nennir varla í vinnuna eftir þessi ósköp.

Karlkennarar áreittir

Athugasemdir

[Ragnhildur Kolka, 17.5.2017 kl. 10:07]

Far þú nú ekki líka að væla.

[Páll Vilhjálmsson, 17.5.2017 kl. 10:43]

[Ómar Ragnarsson, 17.5.2017 kl. 12:26]

Merkilegt er að lesa þá skipulegu afgreiðslu á því þegar einhverjir eru beittir óréttlæti, að þeir, sem fyrir því verða, eru afgreiddir sem vesælir og vælandi aumingjar.