Vinstri grænir breyta valdahlutföllum stjórnmálanna

Í áratugi voru valdahlutföll íslenskra stjórnmála þannig að Sjálfstæðisflokkurinn vann ýmist með Samfylkingunni, sem lengi hét Alþýðufokkur, eða Framsóknarflokknum. Vinstri grænir, áður Alþýðubandalag, voru mótmælaflokkur sem ekki fékk aðild að ríkisstjórn nema í undatekningatilfellum.

Vinstri grænir eru að festa sig í sessi sem 20 prósent flokkur og gætu farið hærra í kosningum. Sjálfstæðisflokkur er um og yfir 30 prósentum. Samfylkingin er að hverfa og Björt framtíð er dauðvona. 

Framsóknarflokkurinn er í sárum en gæti náð sér á strik þegar foringinn mætir aftur til leiks.

Píratar halda ekki nema hluta fylgisins sem þeir mælast með. Nýliðar á framboðslista og vandræði við að setja saman stefnuskrá mun tálga af þeim fylgið. Með Birgittu sem andlit flokksins er engin leið að heyja trúverðuga kosningabaráttu.

Að upplagi eru Vinstri grænir jafnréttissinnar með umhverfis- og landsbyggðasjónarmið. Gamla fylgið úr Alþýðubandalaginu er þjóðlegt íhaldsfólk. Með Katrínu Jakobsdóttur sem hófsaman leiðtoga eru Vinstri grænir stofuhæfir í stjórnarráðinu.

Uppgangur Vinstri grænna mun breyta áherslum Sjálfstæðisflokksins. Kratasjónarmiðin í flokknum eru komin yfir í Viðreisn. Sá flokkur er andvana fæddur vegna Evrópumála og báginda Samfylkingar. Sjálfstæðisflokkurinn mun teygja til yfir á málefnasvæði Vinstri grænna eins og þegar sjást merki, til dæmis í umhverfismálum.

Þjóðlegir íhaldsmenn mega vel við una.

Samfylkingin nálgast botninn