Stefán jarðar frjálshyggju Árna Páls

Formaður Samfylkingar, Árni Páll Árnason, keyrir frjálshyggjustefnu sem miðar að því að gera flokkinn samstarfshæfan Sjálfstæðisflokknum, eins og Styrmir Gunnarsson bendir á.

Gleggst kemur frjálshyggja Árna Páls fram í afstöðunni hans til peningamála. Hann finnur krónunni og skipulagi gjaldmiðlamála allt til foráttu. Stefán Ólafsson prófessor tekur upp þykkjuna fyrir hönd sígildrar jafnaðarstefnu og mælir krónunni bót. Stefán beinir spjótum sínum að leiðarahöfundi Fréttablaðsins en öllum má vera ljóst að hverjum skeytin beinast. Stefán skrifar

Atvinnuleysi minnkar stöðugt og betur en hjá öðrum kreppuþjóðum (sjá t.d. hér). Þrátt fyrir gjaldeyrishöftin. Höftin eru alls ekki að gera okkur að “ríkisvæddu láglaunalandi” – heldur aftra því að við verðum óheft og markaðsvætt láglaunaland, með enn lakari kjör en nú er.

Ísland varð eitt að ríkustu löndum heims innan gjaldeyrishafta, sem voru í gildi hér til ársins 1995.

Afnám haftanna drekkti þjóðinni síðan í skuldum gráðugra braskara eftir aldamótin 2000. Sjálfsagt er að stefna að afnámi gjaldeyrishafta í framtíðinni, en það verður að gerast án þess að krónan hrynji um tugi prósenta, á kostnað heimilanna. 

Frjálshyggjumaðurinn Árni Páll telur atvinnuleysi og gjaldþrot heimilanna bestu efnahagspólitíkina fyrir þjóðina. Svokallaður jafnaðarmannaflokkur Íslands er í höndunum á auðmannadindli til hægri við Sjálfstæðisflokkinn. 

Athugasemdir

[Ásthildur Cesil Þórðardóttir, 9.9.2014 kl. 16:49]

Tekur einhver mark á Árna Páli?

[Jóhann Elíasson, 9.9.2014 kl. 19:45]

Ég þekki í það minnsta engan...............

[Ásthildur Cesil Þórðardóttir, 9.9.2014 kl. 19:51]

Nei ekki ég heldur.