Stefán Ólafsson sakar Árna Pál um yfirstéttardekur

Árni Páll Árnason vill breyta Samfylkingunni í frjálshyggjuflokk, skv. grein sem hann skrifaði nýlega í Fréttablaðið. Mat Árna Páls er að Samfylkingin, sem fékk 12,9% í síðustu kosningum, eigi sér helst viðreisnar von sem frjálshyggjuflokkur með ESB-stefnu. Skoðanakannanir sýna að hlutfallslega er mestur stuðningur við ESB-umsókn Samfylkingar meðal þeirra sem eru með meira en milljón krónur í mánaðarlaun.

Stefán Ólafsson prófessor, sem tilheyrir vinstrivæng Samfylkingar, skrifar í annað sinn blogg á nokkrum dögum til að mótmæla Árna Páli. Í fyrsta blogginu leiðrétti Stefán rangan skilning formannsins á stöðu mála í Svíþjóð.  

Í seinna bloggi Stefáns eru málin ekki tekin vettlingatökum. Þótt nafn Árna Páls komi hvergi fyrir er morgunljóst að hverjum skeytin beinast.

Hákarlarnir fá aldrei nóg af fjármagni og nýfrjálshyggjan réttlætir taumlausa græðgi þeirra, sem getur svo af sér sífellt meiri ójöfnuð.

Stefán er með hárfínan húmor, sem er fremur sjaldgæfur meðal samfylkingarfólks, en það er yfirleitt reitt og með allt á hornum sér. Prófessorinn skrifar í niðurlagi:

Stóra spurningin á Íslandi er hvort Sjálfstæðisflokkurinn nái að rista þessa óværu af sér?

Jú, Stefán, Sjálfstæðisflokkurinn getur hrist af sér frjálshyggju Árna Páls og yfirstéttardekur hans. En það er meira álitamál hvort Samfylkingunni tekst það.

 

 

Athugasemdir

[Helga Kristjánsdóttir, 9.3.2014 kl. 15:19]

Obb,obb,obb, Stebbi kviðrista.

[Sigurgeir Jónsson, 9.3.2014 kl. 17:51]

Stefán Ólafsson var spurður að því niðri í kjallara á Hótel Natura fyrir einu og hálfu ári, af manni sem hann þekkti ekki, hvort hann væri ekki þessi Stefán Ólafsson í Samfylkingunni.Stefán fékk hláturkast, en náði loks að hiksta því upp, að það væri alltaf verið að bendla sig við hana,en hann væri ekki í henni.

[Wilhelm Emilsson, 9.3.2014 kl. 20:33]

Ég held að margir lesendur kunni að meta það, Páll, að þú settur inn í textann þinn hlekki við þær greinar sem þú vitnar í. Takk fyrir það.

Stefán Ólafsson skrifar:

„Stóra spurningin á Íslandi er hvort Sjálfstæðisflokkurinn nái að hrista þessa óværu af sér? Litlar líkur virðast þó vera á því.

Svartstakkar og harðlínumenn nýfrjálshyggjunnar reyna sífellt að herða tökin á flokknum."

Ég skil nú ekki alveg hvernig þú færð það út að það sé „morgunljóst" að skeytin beinist að Árna Páli hér. Er ekki miklu líklegra að Stefán sé að vísa til frægra og umdeildra orða Þorgerðar Katrínar?

„Þorgerður Katrín sagðist skynja að fólk liti svo á að það vildi ekki að harðlínumenn yfirtækju flokkinn eða að svartstakkar ættu meira í honum en almennir flokksmenn.“

Ef þetta er eitthvað álitamál geturðu auðvitað haft samband við Stefán sjálfan.

Heimild: http://www.evropuvaktin.is/stjornmalavaktin/32572/

[Páll Vilhjálmsson, 9.3.2014 kl. 20:53]

Þú ert illa lesinn í vinstrifræðum, Willhelm. Allt frá dögum kalda stríðsins þekkist það að skamma einn en meina annan, þetta var kallað að skamma Albaníu en meina Kína.

Árni Páll reynir að selja Samfylkinguna sem frjálshyggjuflokk handa Viðskiptaráði og einhverjum á þeim vængnum. Stefán sver sig í ætt við sígilda jafnaðar- og samvinnustefnu og finnst frjálshyggjudekur Árna Páls keyra úr hófi.

Ég þarf ekki að hafa samband við Stefán til að lesa hvað hann skrifar opinberlega - ekki frekar en þú þurfir að hafa samband við mig vegna bloggsins sem ég skrifa.

[Wilhelm Emilsson, 11.3.2014 kl. 20:19]

Takk fyrir svarið, Páll.

Ég hafði samband við Stefán og hann sagði um grein sína: „Hún er alls ekki um Árna Pál."

Góðar stundir.