Boðvald staðreyndanna og ráðandi frásögn

Eðliseinkenni mannsins er að tileinka sér skoðanir í samræmi við staðreyndir. Innbyggt í fólki almennt og yfirleitt er vilji til að finnast það vera með staðreyndirnar sín megin. Stjórnmálamenn þekkja þessa hneigð og reyna iðulega að selja skoðanir sem staðreyndir klæddar í búning frásagnar.

Um árabil var sú skoðun seld sem staðreynd að Evrópusambandið væri forsenda friðar, framfara og hagsældar í Evrópu. Almenningur vítt og breitt um álfuna fékk í áratugi að heyra margvíslegar frásagnir byggðar á þessu stefi. Núna er að verða breyting þar á. Í meira en fimm ár, allt frá kreppunni 2008, hlaðast upp staðreyndir sem eru í beinni mótsögn við frásögnina um að ESB væri efnahagslegur hornsteinn Evrópu.

Krónískt atvinnuleysi upp á tugi prósenta og ríkisgjaldþrot í Suður-Evrópu eru staðreyndir sem öskra á almenning. Þessar staðreyndir rata inn í nýja frásögn, sem t.d. Heimssýn tæpir á í bloggi; önnur útfærsla á sömu frásögn er hér og leiðari Morgunblaðsins í dag sagði enn aðra útgáfu.

Nýja frásögnin um Evrópusambandið er að það standi í vegi fyrir aðlögun efnahagskerfa óhjákvæmilegum efnahagssveiflum. Þessi frásögn er orðin ráðandi í umræðunni. Evrópusambandið reynir að kaupa sér tíma, lofar t.d. að leysa efnahagsvanda Spánar á tíu árum.

Boðvald staðreyndanna breytir ráðandi frásögn um Evrópusambandið, bæði á meginlandi Evrópu og á Íslandi. Ráðandi frásögn skilar sér í niðurstöðum í kosningum, eins og t.d. sást á kosningum til alþingis á liðnu vori þegar Samfylkingin fékk 12,9 prósent atkvæðanna. 

Yfir 26% atvinnuleysi á Spáni

Athugasemdir

[Þorgeir Ragnarsson, 23.1.2014 kl. 11:34]

Við þetta má bæta mengunarhneykslinu í Napolí á Ítalíu. Rök ESB-sinna hafa allajafna verið að ESB muni vernda þegna einstakra landa fyrir spillingu innlendra stjórnmálamanna. Hvað hefur ESB gert til að aðstoða íbúa Napolí þar sem ítölsk yfirvöld brugðust svo stórkostlega?