Ráðherra, menntun og lífstíll ungs fólks

Ungt fólk getur lokið stúdentsprófi á þremur árum. Allir fjölbrautaskóla bjóða upp á þriggja ára nám til stúdentsprófs og sumir bekkjaskólar, t.d. Kvennaskólinn. Þrátt fyrir að þessi leið standi opin, og hefur staðið um árabil, er það aðeins í undantekningatilfellum sem nemendur ljúka stúdentsprófi á þrem árum.

Ýmsar ástæður eru fyrir því að ungt fólk tekur sér góðan tíma í að ljúka inngönguprófi í háskóla, en stúdentsprófið er einmitt slíkt inngöngupróf. Margir vinna með náminu og fá þannig bæði reynslu og tekjur en námið dreifist þá yfir fleiri ár. Þá lengist sá tími sem ungt fólk býr í foreldrahúsum og temur sér fremur afslappað viðhorf til þess að ljúka framhaldsskóla.

Illugi Gunnarsson menntamálaráðherra flaggar samanburðatölum frá Samtökum atvinnulífsins um að íslensk ungmenn taki sér lengri tíma en jafnaldrar erlendis að ljúka stúdentsprófi. Það er ekki skynsamleg nálgun að líta á íslensk ungmenni sem hagtölur. Ráðherra mun hvorki komast lönd né strönd með hagtöluaðferðinni.

Ekkert samráð við kennara

Athugasemdir

[Ómar Ragnarsson, 26.8.2013 kl. 18:04]

Ungt fólk á að sjálfsögðu að ráða sjálft námshraða sínum og meta það hvort það vill "græða" á því eitt tekjuár í framtíðinni að ljúka námi ári fyrr með því að fara í framhaldsskóla sem býður upp á kerfi sem gefur færi á þriggja ára námi.

Ég hélt að ráðherra úr Sjálfstæðisflokknum myndi vilja liðka fyrir því að unglingar og foreldrar hefðu um þetta val en ekki að beita einhverri forræðishyggju og þvingun í þessu efni.

[Alfreð K, 26.8.2013 kl. 18:22]

Sammála síðasta ræðumanni. Það er líka einkennilegt að beina athygli sinni eingöngu að framhaldsskólunum. Það væri miklu nær að byrja að skoða leiðir til að stytta grunnskólagönguna, sem er heil 10 ár, það skyldi þó ekki vera mildari aðgerð en að skera burt 1 ár af einungis 4 í framhaldsskóla.

[Austmann,félagasamtök, 26.8.2013 kl. 18:43]

Það er þrennt sem ég vil segja um þetta.

1. Menntaskóli í Danmörku (gymnasiet) tekur þrjú ár. En þar hafa forstöðumenn háskólanna kvartað undan því að nemendur með dönsk stúdentspróf séu yfirleitt ekki tilbúin til háskólanáms, þau kunna ekki nóg og hafa ekki lært öguð vinnubrögð. Þess vegna er stórt stökk að byrja í háskólanámi eftir þessi þrjú ár. Hvort það sé vegna of stutts nám, of slapprar kennsluáætlunar eða of latra nemenda er ekki gott að segja, sennilega blöndu af öllu þrennu. Hins vegar eru aðrar leiðir sem hægt er að taka sem miðast við aukna þekkingu á raungreinum, sem er mikilvægustu fræðin.

Hér á íslandi er eflaust hægt að undirbúa sig undir háskólanám á þremur árum, ef einhver ónauðsynleg kjaftafög eru skorin burt í mennta- og fjölbrautarskólum, og þetta ætti a.m.k. að standa duglegum nemendum til boða.

2. Menntaskólanám tekur þrjú ár í Ameríku, þ.m.t. Bandaríkjunum (high school), México (gimnasio) og Canada. Hins vegar, skv. upplýsingum frá HÍ, gefur þannig próf ekki aðgang að háskólanámi hérlendis, því að þessi þrjú ár þar eru eins og þrjú fyrstu árin í menntaskóla hérlendis. Til að byrja háskólanám hér þurfa þess vegna bandarískir, kanadískir og mexíkanskir nemendur að taka fyrsta árið í háskóla í heimalöndum sínum.

3. Ég held að Kennarasambandið þurfi ekki að örvænta, ríkisstjórnin gæti ekki með góðu móti breytt 4 ára námi í 3ja án þess að gera það í samvinnu við stjórnendur og kennara menntaskólanna.