Bjarni Ben tekur af skarið í ESB-málinu

Formaður Sjálfstæðisflokksins tekur af allan vafa um stefnuna í ESB-málinu í viðtali við Morgunblaðið: viðræðuferlinu verður slitið og ekki farið af stað aftur nema að undangenginni þjóðaratkvæðagreiðslu. Orðrétt segir í Morgunblaðinu

Stefnan er skýr um að halda okkur utan Evrópusambandsins. Það er sama stefna og verið hefur.

- Kemur til greina að efna til þjóðaratkvæðagreiðslu um það?

Já, það gerir það. Við höfum í tvígang samþykkt það á landsfundi að viðræðum verði ekki haldið áfram án þjóðaratkvæðagreiðslu. Ég hef áður tekið fram að það komi til greina að framkvæma hana á fyrri hluta kjörtímabilsins. Stefnan er að stöðva viðræðurnar, sem eru reyndar í þvílíkum hægagangi að það er ekki mikið verk, og setja þær ekki af stað fyrr en þjóðin hefur kveðið upp sinn dóm um málið.

Bjarni Benediktsson lýsir því sem fræðilegum möguleika að þjóðaratkvæðagreiðsla verði haldin á fyrri hluta næsta kjörtímabils um það hvort viðræður um aðild verði teknar upp að nýju. Til að möguleikinn verði raunhæfur þarf að vera eitthvað pólitískt afl í landinu sem hefur forystu fyrir málinu.

Samfylkingin er eini flokkurinn sem vill Ísland í Evrópusambandið. Fyrirsjáanlega verður fylgi Samfylkingar innan við 20 prósent. Allir óbrjálaðir sjá að það fylgi réttlætir ekki að efnt verði til þjóðaratkvæðis um sérmál Samfylkingar.