Evran, trúðarnir og Össur

Hreinskilinn Þjóðverji, Peer Steinbrück, kanslaraefni jafnaðarmanna, segir niðurstöðu ítölsku kosninganna skola tveim trúðum til valda í gamla rómverska heimsveldinu. Ummæli Steinbrück valda míníkrísu í samskiptum Ítala og Þjóðverja.

Skilvirku og öguðu Þjóðverjarnir eru í myntbandalagi með Ítölum sem umgangast fjármál af öllu meiri léttúð en þeir þýsku. Með trúða í bílstjórasæti ítalska ríkissjóðsins líður Þjóðverjum illa, þar sem gjaldþrot Ítala kostar þá þýsku heila gommu.

Mörgum finnst skorta á háttvísi leiðtoga þýsku stjórnarandstöðunnar, þótt hægrimiðlar í Þýskalandi óttist að hreinskilnin muni afla Steinbrück atkvæða. Þeir sem vilja bera blak af foringja jafnaðarmanna vísa á fyrirsagnir breskra blaða um að víst voru tveir trúðar sigurvegarar ítölsku kosninganna.

Vopnabróðir Steinbrück á Íslandi, Össur Skarphéðinsson, sem víst er enginn trúður, hlýtur að senda skilaboð til Berlín um að allt sé í stakasta lagi með evruna. Evrópa öll geti sofið rótt því íslenskir samfylkingarmenn hafi tröllatrú á gjaldmiðlinum. Það munar um slíka traustsyfirlýsingu.