Tilfallandi athugasemdir

Þriðjudagur, 29. janúar 2013

Er einelti að vera ósammála Jóni Gnarr?

Jón Gnarr lítilsvirti lýðræðislegar leikreglur og gróf undan tiltrú almennings á kosningum með því að reka heila kosningabaráttu sem brandarasmiðju. Jón Gnarr ætlar sjálfum sér nokkuð vítt svigrúm til að draga dár að meðborgurum sínum. Aðrir hljóta að hafa sinn rétt til að láta ljós sitt skína.

Ef Jón Gnarr hefur orðið fyrir gagnrýni á opnum fundi getur það hvorki fallið undir einelti, sem sjaldnast fer fram í viðurvist margra vitna, né ofbeldi - nema hann hafi verið barinn, sem yrði auðvitað að harma.

Jón Gnarr verður að útskýra í hverju misgjörðir kjósenda í Grafarvogi felast. Voru þeir ekki nógu fyndnir? Eða er húmor úthverfafólksins annar en miðbæjarplebbanna?

Boltinn er hjá borgarstjóra. Koma svo, Gnarr.

	„Einelti og hreint og klárt ofbeldi“
Ábyrgðarmaður færslu Tilkynna um óviðeigandi tengingu við frétt

Flokkur: Dægurmál | Facebook

Athugasemdir

Viltu ekki bíða eftir lýsingu atburða Páll, áður en þú fellir dóma?

Jón Steinar Ragnarsson, 30.1.2013 kl. 00:18

Hmmm... voru það ekki einhverjir aðrir sem grófu undan tiltrú almennings og undirbjuggu þannig jarðveginn fyrir Besta flokkinn???

Sorrý, sannleikurinn er sár, en sjálfstæðisframsóknarfylkingin á Gnarrinn skuldlausann.

Fyndið, ekki satt...?

Haraldur Rafn Ingvason, 30.1.2013 kl. 00:47

Hvaðan hefur þú það Páll að einelti fari sjaldnast fram í viðurvist margra vitna? Það er bara býsna algengt að slíkt gerist því miður. Og einmitt ef þú varst ekki þarna hvernig veistu þá hvað gekk á?

Svava Theódórsdóttir, 30.1.2013 kl. 01:09

Ég er ekki að fella dóma, en leyfi mér að efast um að ,,einelti" og ,,ofbeldi" hafi farið fram á téðum fundi. En ég hvet borgarstjóra til að útskýra málið betur. Ef fram kemur að efi minn hafi ekki verið á rökum reistur er sjálfsagt að leiðrétta það.

Páll Vilhjálmsson, 30.1.2013 kl. 08:06

Ég var á umræddum fundi og leyfi mér að fullyrða að borgarstjórinn er að gera lítið úr umræðunni um ofbeldi og einelti með þessum yfirlýsingum sínum. Það er umræðunni ekki til framdráttar þegar menn taka sér stór orð í munn að tilefnislausu.

Emil Örn Kristjánsson, 30.1.2013 kl. 09:19