Tilfallandi athugasemdir

Sunnudagur, 10. júní 2012

Spænsk dula fyrir ESB-samruna

Spænsk stjórnvöld telja sig hafa loforð um allt 100 milljarða neyðarlán frá Evrópusambandinu án sömu skilyrða og Írar, Portúgalir og Grikkir urðu að sætta sig við. Líkur eru á því að spænska neyðarlánið verði notað til að hrinda af stað samrunaferli evru-ríkja á sviði ríkisfjármála.

Viðbrögð innvígðra ráðamanna í alþjóðasamfélaginu við ósk Spánverja um neyðarlán renna stoðum undir aukinn samruna. Í BBC ef haft eftir Timothy Geithner fjármálaráðherra Bandaríkjanna að björgun Spánar sé áþreifanlegt skref í átt að fjármálasambandi evru-ríkjanna. Evrópuvaktin fjallar um hugmyndir sem ræddar eru í Brussel um ríkisfjármálasamband evru-ríkja.

Þjóðverjar ráða ferðinni í Evrópusambandinu. Í Frankfurter Allgemeine (FAZ) er söguleg, efnahagsleg og pólitísk greining á stöðu evru-ríkjanna. Útgagnspunkturinn er að kostirnir séu aðeins tveir: aukinn samruni eða að evru-samstarfið splundrist.

Stjórnmálaelítur ESB-ríkjanna munu leggja allt í sölurnar til að verja evru-samstarfið, segir FAZ. Málið sé á hinn bóginn snúið vegna þess að hvergi í evru-ríkjum sé meirihluti kjósenda þeirrar sannfæringar að evran sé hagstæður kostur. Stjórnmálamenn komast ekki langt án stuðnings almennings.

Samkeppnisstaða Suður-Evrópuríkja er helsti akkilesarhæll evru-samstarfsins. Spánn þarf að bæta stöðu sýna um 20 prósent, þ.e. lækka laun og verðlag um 1/5. Það er gerlegt innan evru-samstarfsins en taki 10 til 15 ár. Grikkland og Portúgal þurfi að bæta samkeppnisstöðu sína um 30 prósent og það er ekki hægt innan evru-samstarfsins og því verða þessi ríki að fara út.

Á þýsku er aldrei talað um Stór-Evrópu, það er of sterk tilvísun í Stór-Þýskaland Hitlers. Í FAZ eru Bandaríkin tekin sem hliðstæða og sagt að til að evru-ríkin geti náð tökum á skuldakreppunni verði þau að koma sér upp her og ríkisstjórn auk sameiginlegra ríkisfjármála. Miðstýringin í þessu nýja stórríki Evrópu þarf að vera meiri en miðstýring Washington á fylkjum Bandaríkjanna.

Spánverjar gætu orðið Evrópumeistarar í fótbolta á ný en þeir munu ekki verða til þess að ríkið Stór-Evrópa fái hljómgrunn.