Vextir eru uppeldi

Nú sem fyrr eru Samtök atvinnulífsins úti að aka og biðja um neikvæða raunvexti þar sem verðbólga er hærri en grunnvextir. Til að sparnaður eigi sér stað í samfélaginu þarf fólk að geta geymt peningana sína í banka og fengið vexti.

Samtök atvinnulífsins eru meira og minna skipuð sama fólkinu og stóð hrunvaktina. Góð hagspeki er að ganga þvert á stefnu samtakanna því þau hafa ekkert lært.

Með sex prósent atvinnuleysi er óverulegur slaki á vinnumarkaði. Meira vandamál eru þau handónýtu fyrirtæki sem enn eru starfandi en ættu að fara á hausinn - en þau greiða félagsgjöld til Samtaka atvinnulífsins til að halda upp áróðri fyrir lágum vöxtum.

Vaxtahækkun seinkar bata

Athugasemdir

[Þórir Kjartansson, 2.11.2011 kl. 16:23]

Þú ert glöggur maður Páll en virðist samt ekki skilja frekar en seðlabankastjórinn samhengið í þessu.  Vextir og fjármagnskostnaður er stór liður í rekstri margra fyrirtækja. (Og heimila)  Þegar kostnaður vex, alveg sama hvort það eru vextir eða annað, verður fyrirtækið að ná þeim kostnaðarauka inn með því að hækka verðið á sinni vöru eða þjónustu.  Það fer beint út í verðlagið og  vísitöluna sem veldur þar með meiri verðbólgu, sem að áliti seðlabankastjórans, kallar þá á enn hærri vexti.  Þetta er bara svikamylla sem ég hélt að menn hefðu séð hvernig virkaði fyrir hrun. En menn virðast ekkert hafa lært af því.

[jonasgeir (IP-tala skráð) 2.11.2011 kl. 16:46]

Ég er alveg hjartanlega sammála.

Fyrri hrun var reynt að gera fjármagn dýrara í Seðlabankanum.  -Þá flæddi bara enn meira af EES tengdum evrópskum og annarra þjóða peningum inn í landið.

Það var haldið áfram að lána.  Bara útlenda peninga.

Það var ástæða hrunsins.

Skortur á fjármagni er og var aldrei og verður ekki vandamálið.

Vandamálið er óábyrg meðferð ókeypis fjármagns.  Peningar eins og annað þarf að hafa ákveðið verð. 

[Sigurður (IP-tala skráð) 3.11.2011 kl. 00:31]

Mér finnst atvinnuleysi upp á 6% ekki vera "óverulegur slaki á vinnumarkaði." Mælingum ber reyndar ekki saman, og sumar sýna hærri tölu. Þetta atvinnuleysi er lítið áhyggjuefni fyrir atvinnurekendur. Nokkru meira fyrir vinnandi fólk, sem á þá erfiðara að sækja kjarabætur og jafnvel halda atvinnu með óbreyttum launum. En talsvert vandamál fyrir hina atvinnulausu og það samfélag, sem þarf að aðstoða þá og fjölskyldur þeirra. Í sambandi við vexti má ekki gleyma því, að vaxtamunur á innlánum og útlánum í bönkum er óvenju mikill á Íslandi. Bankarnir eiga einnig ósmáan þátt í því, að mörg fyrirtæki eru "handónýt," bæði af því þeir halda úti óréttmætri samkeppni á mörgum sviðum og krefjast af lántakendum endurgjalds, sem reynist í þúsundum skipta hafa verið ólögmætt. Hinir endurreistu bankar eru kannski fullt eins mikil byrði á þjóðinni og þeir föllnu.