ESB-umræða á ríkisstjórnarfundi

Í hádegisfréttum var sagt frá krísufundi ríkisstjórnarinnar sem gat ekki ákveðið hvenær skyldi gengið til kosninga til að greiða atkvæði um Icesave-lögin. Þrátt fyrir að fyrir liggi að ekki megi líða nema tveir mánuðir frá synjun forseta til þjóðaratkvæðis. Þrír mánuðir verða að líða frá samþykkt alþingis um að tiltekið mál skuli í þjóðaratkvæði - og stjórnlagaþingið er slíkt mál.

Í aukasetningu í fréttinni var þess getið að samningamenn Íslands við Evrópusambandið um aðlögunarferlið, undirmenn Össurar utanríkisráðherra, hefðu verið á fundi í stjórnarráðinu og dvalið lengi.

Kannski að ríkisstjórnin sé að fatta samhengi ESB og Icesave.

 

Athugasemdir

[Sigurður (IP-tala skráð) 22.2.2011 kl. 14:35]

Í 26. gr. stjórnarskrárinnar er notað orðalagið "svo fljótt sem kostur er" um þjóðaratkvæðagreiðslu í kjölfar synjunar forseta. Það er furðuleg túlkun á þeim orðum, ef ákvörðun um atkvæðagreiðsluna má bíða eftir, að nefnd um stjórnlagaþing skili af sér, ríkisstjórnin taki síðan ákvörðun á grundvelli þess álits og Alþingi fjalli loks um málið. Hvorki má né á að bíða eftir neinu, heldur ákveða dagsetningu strax. Auk þess er Icesave flókið og skoðanir skiptar, svo að bezt er að leyfa kjósendum að hafa frið fyrir öðru meðan þeir eru að gera upp hug sinn, í stað þess að drepa Icesave á dreif með umræðu um fleiri hluti.

Mikilvægt atriði í sambandi við undirbúning er að létta leynd af sem allra flestu varðandi Icesave (þar á meðal ummælum enska seðlabankastjórans) og gera kjósendum jafnframt fulla grein fyrir, hvað enn verði að fara leynt og nákvæmlega hvers vegna. Nú er svo komið, að það eru ekki ráðherrar eða þingnefndir, sem eiga að hafa vit fyrir almenningi, heldur öfugt, og til þess þarf að hafa allar upplýsingar á borðinu.  

[Vilhjálmur Grímsson (IP-tala skráð) 22.2.2011 kl. 15:24]

Laukrétt, Sigurður!  100% sammála