Ögmundur á pólitískt kapítal

Ráðherrar sem hvæsa á samstarfsfélaga sína í fjölmiðlum sýna þreytumerki, svo vægt sé til orða tekið. Fjölmiðlaupphlaup Össurar Skarphéðinsson gagnvart Jóni Bjarnasyni er ótvíræð vísbending um að í nánd sé uppgjör. Samfylkingin er líkt og fyrri daginn með mörg plott í gangi samtímis.

Fyrr í dag mátti lesa um fantasíu samfylkingarforkólfa að hluti þingflokks sjálfstæðismanna myndi ganga í stjórnarsæng með Samfylkingunni. Annað plott sem samfylkingarmaðurinn Gísli Baldvinsson var beðinn að koma á framfæri er að uppstokkun verði í ríkisstjórninni bráðlega.

Eina breytingin sem gæti styrkt ríkisstjórnina er að Ögmundur Jónasson gengi til liðs við hana. Ögmundur stendur fyrir málefni, hefur með sér grasrótina í Vg og víðtæka skírskotun út í samfélagið. Sannfæringastjórnmálamaður eins og Ögmundur veit líka að pólitískt kapítal gufar upp á örskoti ef málafylgja er seld fyrir valdastól.

Ögmundur er búinn að marka sér bás í Evrópumálum sem trauðla fer saman  við Brusseláfergju Össurar og félaga. Ögmundur gæti ekki hleypt nýju lífi í ríkisstjórnina nema umsóknin yrði dregin tilbaka. Og fjárfesting Samfylkingarinnar í ESB-málinu er slík að flokkurinn yrði pólitískt gjaldþrota ef aðlögunarferlið yrði stöðvað.

Ólíklegt er að Ögmundur fórni pólitískri stöðu sinni fyrir dauðvona ríkisstjórn.

 

Athugasemdir

[Gústaf Níelsson, 25.8.2010 kl. 23:27]

Páll, heldurðu að pólitískt kapítal Ögmundar sé ekki aðeins til brúks innanflokks? Algerlega verðlaus valúta að öðru leyti?  Allur performans Vg í þessari ríkisstjórn, ætti t.d að segja sjálfstæðismönnum að flokkurinn sé ekki stjórntækur. Nú bíður maður eftir róttækum breytingum á stjórn Samfylkingar, eða býst einhver við því að Jóhanna skrimti öllu lengur? Miklu nær væri að spyrja hvernær samfylkingarfólkið fær nóg af henni. Dagar hennar eru taldir og tíminn liðinn!!