Biðja Atli Fannar og RÚV Pál skipstjóra afsökunar?

Atli Fannar Bjarkason og RÚV halda úti afsökunarþætti þar sem blaðamaðurinn biðst velvirðingar á fyrri misgjörðum. Í viðtengdri frétt biður Atli Fannar Jón Ásgeir útrásarauðmann forláts á leiðindum frá árinu 2009. Sök Atla Fannars og RÚV gagnvart Páli skipstjóra Steingrímssyni er stórum meiri og nýrri af nálinni. 

Vorið 2021 starfaði Atli Fannar á RÚV eins og nú. Páli skipstjóra var byrlað í byrjun maí og ekki hugað líf; var kominn á dauðavagninn, eins og sagt er á spítalamáli. Hjartastuðtæki ræsti skipstjórann til lífs en hann var meðvitundarlaus í þrjá daga og haldið í öndunarvél. Á meðan var síma hans stolið og færður í hendur fréttmanns RÚV sem hafði tilbúinn síma af Samsung-gerð, sömu gerðar og sími skipstjórans. Á Efstaleiti var sími skipstjórans afritaður. Á RÚV voru samdar fréttir og sendar á Stundina og Kjarnann, sem birtu samkvæmt skipulagi samtímis þann 21. maí. Skæruliðadeildin er hugarfóstur RÚV.

Hvað gera Atli Fannar og RÚV eftir að samræmdur fréttaflutningur hefst um skæruliðadeild Samherja - fréttir unnar að undirlagi RÚV með haldreipi í stolnum gögnum fengnum með byrlun? Jú, Atli Fannar og RÚV senda frá sér þessa frétt 27. maí 2021: 

Namibía: Skæruliðadeild Samherja er ekki þáttur á Netflix

Fréttin hæðist að líkamsárás með byrlun og þjófnaði. Látið er eins og RÚV hafi hvergi komið nærri aðförinni að skipstjóranum. En Þóra Arnórsdóttir, þá RÚV-ari, nú á árshátíðardeild Landsvirkjunar, er sakborningur í byrlunar- og símastuldsmálinu. Þóra keypti Samsung-símann sem notaður var til afritunar. Með Netflix-líkingunni gaf Atli Fannar tóninn. Ekki löngu síðar gerði Gísli Marteinn gys að beiskum bjór skipstjórans. Napurt grín skyldi fela sekt.

Óþarfi er að fjölyrða um staðreyndavillur í RÚV-frétt Atla Fannars, þær eru fjölmargar. Eitt lítið dæmi: enginn aðili er tengist Samherja er ákærður fyrir mútur í Namibíu.

Ætla Atli Fannar og RÚV að biðja Pál skipstjóra afsökunar? Eða verður tekinn gísli marteinn á þetta; við erum siðlaus lítilmenni hér á Glæpaleiti. Takið samt endilega mark á okkur og borgið áfram útvarpsgjaldið. 

 

 

Rúv biður útrásarvíking afsökunar