Össur í hættulegum leik

Össur Skarphéðinsson utanríkisráðherra er herra ESB-umsókn Íslands. Þjóðin er á móti aðild og þingsályktunartillaga liggur fyrir alþingi um að umsóknin verði dregin tilbaka. Samfylkingin er einangruð í Evrópumálum og Össur sem ábyrgðarmaður umsóknar og de facto leiðtogi flokksins reynir að búa sér til vígstöðu bæði heima og erlendis.

Össur er stjórnmálamaður sem lýgur blákalt að sjálfum sér og öðrum. Honum munaði ekki um að segja við rannsóknanefnd alþingis að hann hefði enga þekkingu á fjármálakerfi landsins og nokkrum mánuðum síðar að staðhæfa í Króatíu að ef Ísland hefði verið í Evrópusambandinu myndi fjármálakerfið ekki hafa hrunið.

Össur er í heimsókn í Kína. Á vef utanríkisráðuneytisins má lesa eftirfarandi

Í gær átti utanríkisráðherra jafnframt tæplega þriggja tíma fund með Yang Jiechi, utanríkisráðherra Kína. Í umræðum um norðurslóðamál, og opnun nýrrar siglingaleiðar frá Kyrrahafi um Norður-Íshaf til Atlantshafsins hvatti kínverski utanríkisráðherrann til þess að löndin formgerðu samstarf á sviði rannsókna á norðurslóðum með samkomulagi. Kínverjar hafa sent fjóra stóra rannsóknarleiðangra til norðurskautsins, og stendur einn yfir núna.

Ennfremur

Varaforsetinn og íslenski utanríkisráðherrann ræddu margvísleg önnur málefni, svo sem fjármálakreppuna á Íslandi, stöðu efnahagsmála í heiminum og viðhorf Kínverja til þeirra, viðskipti þjóðanna með fisk auk þess sem norðurslóðasamstarf var ítarlega rætt. Ráðherrann lýsti jafnframt ánægju íslensku ríkisstjórnarinnar með nýlegt samkomulag Kína og Íslands um gjaldmiðlaskipti og þakkaði öflugan stuðning Kínverja við málstað Íslands innan AGS. Varaforseti Kína taldi meðal annars að hagkerfum heimsins myndi farnast mun betur á þessu ári en því síðasta, og lýsti ánægju með hversu föstum tökum Ísland hefði tekið fjármálakreppu sína í samstarfi við AGS.

Norðurslóðir eru sérstakt áhugamál Evrópusambandsins, sem gjarnan vilja aðild Íslands til að fá aðkomu að norðurslóðum. Báðar tilvitnanirnar eru dæmi um diplómatísk skilaboð þar sem utanríkisráðherra bendir Brussel á að Ísland eigi fleiri kosti en Evrópusambandsaðild. Samtímis lætur Össur þau boð út ganga að tilboð ESB í fiskveiðimálum verði að vera gott.

Eins og endranær er Össur fíll í postulínsbúð. Leikurinn sem hann fitjar upp á endar aðeins með hörmungum. Sá sem falbýður sjálfsforræði þjóðarinnar með jafn óskammfeilnum hætti og Össur stórskaðar orðspor Íslendinga.

 

Mafíuvinnubrögð í Magma-nefnd

Þingkjörin nefnd um erlendar fjárfestingar virðist tilraunavettvangur nýrra vinnubragða í íslenskri stjórnsýslu. Plottið er eftirfarandi: Nefndin fær ráðherraábyrgð, er skipuð pólitísku léttviktarfólki og fær yfirþjösnara frá ráðuneyti sem sér um að nefndin komist að ,,réttri" niðurstöðu. Markmiðið með þessum tilfæringum er að útvista pólitískri ábyrgð ráðherra og forystu stjórnmálaflokka. Vinnubrögð af þessu tagi tíðkast hjá mafíunni.

Fulltrúi Vg í nefndinni, Silja Bára Ómarsdóttir,  sagði í hádegisfréttum RÚV að hún vilji fá sig lausa undan ráðherraábyrgð. Þá staðfestir Silja Bára að hótun um að nefndarfulltrúinn myndi bera ábyrgð á stjórnarslitum ef hún myndi ekki tileinka sér ,,rétta" afstöðu.

Óþverravinnubrögðin eru með öllu ólíðandi og verður að uppræta strax.

Farsi Jóns Ásgeirs í boði Arion banka

Jón Ásgeir hótar Steinunni Guðbjartsdóttur lögsókn vegna rangs framburðar. Samtímis hótuninni eru birtar fréttir að Jón Ásgeir hafi selt fasteign degi fyrir frystingu eigna hans. Hvorki fasteignin né andvirði hennar er á eignalista Jóns Ásgeirs, sem hann lagið fram vegna dómsmálsins.

Jón Ásgeir beitir sömu aðferðum og í Baugsmálinu. Hann hótar, smíðar samsæriskenningar, sakar fólk um haturshug í sinn garð og svo framvegis. Hann lætur undirmenn sína í Fréttablaðinu taka við sig viðtal þar sem hann básúnar sakleysi sitt og illgirni annarra.

Arion banki er fjárhagslegur bakhjarl Jóns Ásgeirs nú um stundir. Bankinn leyfir Baugsfjölskyldunni að stjórna verslunarveldinu Högum sem aftur halda fjölmiðlarekstri Jóns Ásgeirs gangandi með auglýsingafé.

Farsi Jóns Ásgeirs stendur jafn lengi og Arion banki leyfir.

 

Segist ætla í mál við Steinunni