Safnaðarfundur hjá Samfylkingu

Engar umræður eru leyfðar hjá flokksstjórn Samfylkingar sem kemur til fundar um helgina. Gagnrýnislaus safnaðarsamkoma er í anda samræðustjórnmála þar sem foringjahollusta er ekki aðeins æskileg heldur krafa.

Ráðherrar flokksins ætla að messa yfir kjánunum sem mæta til að hlusta og meðtaka.

Bílalán verða á dagskrá en hvorki Icesave né ESB.

Staða blaðamennskunnar á Íslandi

Flokksblaðamennskan var ríkjandi hér á landi um áratuga skeið. Flokkarnir fjórir gáfu út hver sitt málgagn sem sagði fréttir og birti efni í samræmi við tilgang útgáfunnar. Flokksblöðin fjögur Tíminn, Þjóðviljinn, Alþýðublaðið og Morgunblaðið þjónuðu tilgangi sínum sem var að birta heimsmynd sem kallaðist á við pólitíska sannfæringu lesenda.

Á áttunda áratug síðustu aldar gerðist þrennt sem gerbreytti forsendum útgáfu flokksblaða. Morgunblaðið náði afgerandi forystu sem almennur frétta- og auglýsingamiðill. Þrátt fyrir ýmsar tilraunir tókst hinum blöðunum þrem ekki að finna sér rekstrarhæfar forsendur.

Vonir stóðu til að fagleg blaðamennska leysti af hólmi flokksblaðamennsku. Um tíma í lok aldarinnar virtist það ætla að ganga eftir. Morgunblaðið, DV og Stöð 2/Bylgjan ráku ritstjórnir sem fyrir að vera með sínum annmörkum stóðu undir eðlilegum kröfum um fjölbreytni og faglegan metnað.

Innreið auðmanna í fjölmiðla í byrjun aldar skildi eftir sviðna jörð blaðamennsku á Íslandi.

Listinn yfir umsækjendur um starf fjölmiðlafulltrúa fjármálaráðuneytisins sýnir að blaðamenn eiga í fá hús að venda.  

 

33 sækja um fjölmiðlafulltrúastarf

Washington bjargar evrunni, Grikkjum og ESB

Alþjóðagjaldeyrissjóðurinn verður þátttakandi í að bjarga Grikkjum frá fjárhagslegu þroti. Sjóðurinn er í Washington og einmitt þess vegna var Trichet seðlabankastjóri Evrópu alfarið á móti aðild Alþjóðagjaldeyrissjóðsins í björgun Grikklands.

Samrunasinnar í Evrópusambandinu ætluðu að nota gríska vandann til að taka næsta skref í átt að sameinuðu Evrópuríkjunum. Sameiginleg ábyrgð evruríkjanna sextán á opinberum skuldum hvers ríkis myndi kalla á sameiginlegan fjárhag viðkomandi ríkja. 

Þegar til átti að taka höfðu Þjóðverjar engan áhuga á að ábyrgjast skuldir Suður-Evrópu sem á eftir að læra þýskan sparnað og ráðdeild.

Evrópuverkefnið sem kennt er við Brussel þarf að hreyfast til að viðhalda lífinu. Þegar framrásin er stöðvuð getur ESB ekki numið staðar og haldið kyrru. Sambandinu mun hnigna hægt en örugglega.

Þessi vika fer í sögubækurnar vegna þess að evran fékk sinn dauðadóm.

Hér og hér eru pælingar um evru.

Ráðherrar sem hóta þjóðaratkvæði

Í Silfri Egils helgina sem þjóðin hafnaði Icesave-frumvarpi ríkisstjórnarinnar hótaði Jóhanna Sigurðardóttir að hún ætlaði að setja kvótakerfi sjávarútvegsins í þjóðaratkvæðagreiðslu. Þegar ráðherrar hóta þjóðaratkvæði í umdeildum málum er vert að staldra við.

Við þingkosningar greiðir þjóðin atkvæði um hvaða fulltrúar skuli á alþingi. Verkefni þingmanna er að mynda starfhæfa ríkisstjórn. Meirihlutastjórn vinnur samkvæmt venju að framgangi mála enda með styrk til þess.

Þegar ráðherrar hóta að fara með mál í þjóðaratkvæði eru þeir í reynd að viðurkenna að ríkisstjórnin hafi ekki afl til að koma málum sínum fram.

Hvers vegna situr ríkisstjórnin enn?