Fageðjót í ráðherrastól

Gylfi Magnússon viðskiptaráðherra segir Seðlabankann prýðisstofnun en að stjórnmálamenn hafi í 70 ár misþyrmt krónunni þannig að hún sé ónýtur grunnur fyrir efnahagslífið. Yfirlætið í orðum viðskiptaráðherra ber með sér að hann telji sig þess umkominn, væntanlega í krafti hagþekkingar, að setja ofan í við hvernig lýðveldið hefur verið rekið frá stofnun.

Drýldni ráðherrann sesti í dómarasæti yfir tveim kynslóðum stjórnmálamanna sem voru í forsvari fyrir þjóðina á þeim tíma sem hún tók stökk úr torfbæjum í nútímann. Lýðveldið hefur búið þegnum sínum lífskjör sem mælast með þeim bestu í heimi.

Eðjótískur samanburður á verðgildi íslensku krónunnar og þeirrar dönsku dregur fjöður yfir þá staðreynd að kaupmáttur launa hér á landi stenst samjöfnuð við kaupmátt danskra launa. Ennfremur að við höfum notað krónuna sem sveiflujöfnunartæki til að komast hjá atvinnuleysi.

Gylfi kann ekki pólitík og akademískar hagfræðiæfingar eru ekki sniðugar fyrir mann í hans stöðu.

Gylfi: Þurfum traustari grunn en krónuna

Laumumilljarður Jóns Ásgeirs

Jón Ásgeir fyrrum Baugsstjóri lofaði að leggja fram einn milljarð króna í nýtt hlutafé í 365 útgáfuna, sem daglega gengur undir nafninu Baugsmiðlar, til að mæta kröfum Landsbankans. Jón Ásgeir neitar að svara spurningu Viðskiptablaðsins um margboðaðan milljarð.

Jón Ásgeir gengur lengra en flestir til að verja hagsmuni sína. Í slóð Jóns Ásgeirs liggja hótanir, mútur, lygar og Hæstaréttardómur um misferli.

Jón Ásgeir er einn af þeim sem ber höfuðábyrgð á hruninu. Endurreistu bankarnir, Landsbanki og Arion, ætla sér að eiga áfram viðskipti við Jón Ásgeir og taka orð hans góð og gild.

Baugslýðveldið verður til í skjóli endurreistu bankanna.

 

 

Samfylkingin efnir til fasisma

Samfylkingin bjó til leikrit á alþingi með það markmið að fá fasíska umræðu um mismunun gagnvart útlendingum. Þórunn Sveinbjarnardóttir þingmaður Samfylkingar og Árni Páll Árnason ráðherra sama flokks bjuggu til orðaskipti þar sem Fjölskylduhjálp Íslands var undir rós sökuð um fasisma.

Augljóst er hvers vegna Samfylkingin efnir til fasískrar umræðu. Málefnalega er flokkurinn ráðþrota og er tilbúinn að kveikja elda í samfélaginu til að draga athyglina frá ríkisstjórnarnefnunni sem flokkurinn leiðir.

Samfylkingin er til vansa fyrir íslenskt samfélag.

Ásgerður: Jafnvel mistök hjá mér

Frjáls umræða, ritskoðun og eftirlit

Fjölmiðlar léku lykilhlutverk í hruninu með því að auðmenn keyptu þá og gerðu að klappstýrum. Fjölmiðlalögin sem Ólafur Ragnar Grímsson forseti eyðilagði 2004 voru tilraun til að reisa skorður við yfirþyrmandi veldi auðmanna yfir fjölmiðlum.

Dagskrárvald fjölmiðla er ótvírætt; þeir geta ráðið miklu um hvað er hverju sinni til opinberrar umræðu og ekki síður hverjir komast að í þeirri umræðu. Netið hefur dregið úr dagskrárvaldi fjölmiðla með því að vera í senn viðbót við hefðbundna fjölmiðla og gagnrýnandi.

Hlutverk ríkisvaldsins í lýðræðisríki er að búa svo um hnútana að frjáls umræða fái þrifist. Ríkisvaldið á að hamla gegn fákeppni og einokun í fjölmiðlum. Stundum er það best gert með því að láta hlutina í friði en stundum með inngripum í formi lagasetningar um eignarhald eða opinberum stuðningi við útgáfur og miðla, til að tryggja lágmarks fjölbreytni.

SUS hefur áhyggjur af „fjölmiðlalögreglu“